martedì 7 luglio 2015

I nemîs

imagjine cjolte di chi

So pari al disvuedave cantinis. La grant part dai catans e vignive mandade in discjarie ma ogni tant si cjatave alc di sest: insiemi a vecjos libris che a colavin a tocs e a cartulinis che a varessin interessât a cualchi colezionist al jere ancje un vecjo radioregjistradôr a cassetis. Marc al veve preât il pari di lassâial e cussì il zovin al provà a viodi se al funzionave ancjemò.
Une volte colegât a la prese di curint di colp l’aparât al veve tacât a sgrasaiâ… ondis AM… vôs lontanis… ondis FM… cjançons di musiche pop…
Crunk: Marc al veve cjalcjât il boton dal van des cassetis e dentri e jere juste une… e il nastri al jere partît e si sintive une vôs… une vôs regjistrade tancj agns prime… une vôs che e sameave vignî dal oltritombe.
Marc al jere dut orelis…

“Gno nono Rico mi contave simpri cheste storie… me à contade cussì tantis voltis che no le dismentei. Lui al veve tredis agns dal 1917; Pieri e Milian, siei amîs, sui cuindis…
Lis lôr maris ur vevin cusît des bielis divisis verdis cun tant di barete; un barbe marangon ur veve fat des sclopis a pueste: a vevin la sacume dal fusîl e parsore e jere fissade une fionde… insome a jerin dai fusîi a fionde; dopo a vevin ancje lis spadis di len, la trombe e parfin une bandiere. I trê si jerin zontâts a altris fantacins di Trivignan e a jerin lâts in vuere… in vuere cuintri chei di Viscon! Sì, va be… si jere dal ’17, astât… o fin dal astât… no, autun, insome… il front al jere za indenant ancjemò dal mês di mai dal ’15 e la vecje dogane fûr di Trivignan e jere deventade taliane come ancje buine part dal Friûl Orientâl e ancje Gurize…
Li de vecje dogane si cjatavin i zovins di Viscon, vistûts come i austriacs cuintri apont chei di Trivignan vistûts come i fants e i alpins talians. Milian al jere dut plen di braure vint tal cjâf un vêr cjapiel di alpin, il cjapiel plui biel di ducj… migo come chê porcarie di scufate de bufe? Insome, Milian si jere nomenât gjenerâl de armade taliane di Trivignan. Lui e i siei amîs a jerin rivâts li de dogane a pît o in biciclete e a vevin cjatât i austriacs che ju spietavin. La bataie e jere tacade. I talians a sparavin cui fusîi a fionde des palotulis fatis di emui ros ma cualchi bintarat al tirave parfin dai claps! E tal cuarp a cuarp si davin jù pachis cu lis spadis cence ponte che però se ti rivavin intor ti fasevin mâl distès…
E cussì e passave la zornade.
Rico al jere un dai miôrs tiradôrs e lu vevin promovût colonel de armade ancje se al jere zovin e po… al jere ancje za avonde alt pe sô etât… però… al jere masse spavalt: ta chê dì si jere cjatât bessôl tal mieç dai nemîs. Al jere vignût frescot, umit, al jere un timp di fumate e Pieri, il trombetîr talian, al veve za sunât la ritirade… ce biel sun che e à la ritirade… mi visi di cuant che o jeri militâr jo… bon, cumò anìn indevant però…
Alore Rico al jere bessôl tal mieç di chei di Viscon. Un bosgnacon al oreve sfidâlu a un cuarp a cuarp e Rico lu provocave, lu coionave parcè che chel frut al jere grues: no lu vessial mai fat! Chel i jere saltât intor metinti lis mans ator dal cuel!
Insome, al stave par viodile peloche ma ta chel al jere capitât alc…
Cuant che Rico al stave cuasi par jessi scjafoiât di chel bintar si sint sparâ! Colps vêrs!
Tal mieç de fumate i zovenuts a viodin rivâ dai oms a cjaval! Soldâts!
Insome… chescj soldâts a rivin li dal grup di bintars e alore i frutats ju cjalin e non crodin ai lôr voi: cavalîrs austriacs? Ma cemût?
A àn un strani cjapiel cuntune sorte di spazule parsore.
Ulani al murmure un di Cjopris.
I austriacs a viodi chê armade cu lis spadis di len e lis divisis repeçadis a tachin a ridi ancje se intun prin moment ju vevin cjapâts par soldâts vêrs. Di colp i fruts di Viscon a tachin a cori pes blavis come jeurs. Ancje Rico al decît di tornâ cjase.
I ulans lu lassin lâ vie cence problemis e continuant a ridi ma lui al è plen di pôre e po plui indevant al scugne ancje butâsi intun fossâl. Al sintive une mitraie: su la strade blancje a jerin dai combatiments. I talians, chei vêrs, a molavin dut. Insome… e jere la disfate!
A un trat un om al salte fûr di un blavâr. Al jere un fant talian che al stave scjampant ancje lui; al jere cence sclope e cence elmet. Al veve i cjavei bionts clârs tant che al podeve passâ par un cruc. L’om nol dîs nie e al continue a cori…
A chel pont Rico al pense che al è miôr gjavâsi gjachete e bregons e cussì al jentre in paîs in mudantis e maie sot! Al veve pôre di jessi cjapât dai austriacs par un vêr nemì… di lontan almancul al podeve sameâ a un soldât talian… al jere miôr no riscjâ…
Rivât a Trivignan al viôt però che lis avanvuardiis dal esercit austriac a son za alì! A àn cun lôr ancje dai fants talians presonîrs e tra chei al è l’om biont che al coreve inte blave pôc prime… nol jere rivât a fâle francje…
La ostarie de place e je plene di soldâts cu la divise grise cheee aaa bbbeeevvviiinnn vvviiinnn…”
CRUNK
di Checo Tam

8 coments:

Ophrys apifera ha detto...

Le conte mi è plasude, o ai votât "nuie mâl", ma mi lasse perplesse che tal '17 a jerin rivâts in biciclete. E se a jere "astât… o fin dal astât… no, autun, insome…" no mi spieghi tante fumate.

Anonimo ha detto...

Intant lis bicicletis, cu la rovede plene, mi samee che a esistevin bielzà ta chê volte e daspò... la persone che e conte la storie sul nastri magnetic (che dopo al ralente e si ferme... par chel al è un crunk a la fin) e podeve confondisi... i vielis a voltis si confondin...

/CT

Ophrys apifera ha detto...

Si, naturalmentri, lis bicicletis a esistevin in dotazion militâr... ma o soi dacordo che il ricuard dal nono no si tocje.
A mi, di piçule, la befane mi veve puartât une biciclete blu cjarte di zucar. Me sôr, ca veve 18 ains plui di me, mi veve contât che la befane a jere stade tal negozi di nestri pari par comprà regai. Cualchi an dopo la biciclete a jere sparide parcè il pari a la veve vindude e me mari mi veve dit che par me a jere diventade piçule; a mi mi ere colât il côr di rabie.
Par là a scuole, che jeri in seconde elementâr, mi veve date une cuissà tant vecje, cui cerclons di len che, par dì la veretât, a sameave a che di Fred Flingstone.
Une gnove, rosse, mi è rivade cuant che ai finît la cuinte.
Però no mi soi mai vergognade di che vecje biciclete, anzi, contavi a ducj la so lungje storie e che dai parons ca la vevin doprade prin di me... robis di fin agns '50...

Anonimo ha detto...

ancje jo insumiavi une biciclete tai agns 50,e par cuistale e lavi a piels di farc e us di furmie,no ai mai rivat a ingruma il necessari pal acuist.E jere une vecje bici di bersaglir a gome dure dal 15-18.Lussian

Anonimo ha detto...

Jo mi visi che e jere stade la mê buine none maternÆ a regalâmi une biele Atala verde a ûs une "Graziella" parcè che o vevi passât i esams di seconde elementâr. Jo, par fâ il figo, o vevi tacât sul parefango devant une medaie di fier cul leon de Benelli e dopo, si sa, i fruts a metin simpri un argagn che al tiche sui ragjos par fâ rumôr di motorin. Orbene, agns daspò, intai '80, une mê sûr e jere lade signorine a Lignan intes coloniis dai predis e si jere partade daûr la Atala/Benelli che no dopravi plui. Ce fin che e à fat? Robade! :-(

CT

Anonimo ha detto...

Fritz Weber al contave che i crucs a vevin profitât de fumate par passâ cence jessi notâts inte valade di Cjaurêt...
CT

Ophrys apifera ha detto...

Perfet, se Fritz Weber le conte cussì a va ben come glosse.
Ancje le me bici rosse a jere une Atala, cerclis dal 24. Une dì mi soi mitude a decorale di dissens indians fats di tocuts di nastro isolant di ducj i colors, di chel cal servive par fà passà sul telâr il fîl dal fanâl. Cuant che mio pari le à viodude a l'è lât in bestie e al à provât a tirà vie dut ma no je riussît di fâlu.

Anonimo ha detto...

E la modifiche che si faseve une volte? Piturà la bici e dai la flame de cjandele par rindile tigrade! Ah, lis vecjis bici cui manis di cuar e la grande siele, il fanàl e la dynamo! Ti sameave di jessi un re a montà parsore!
CT

O varès alc di dî

Ti sêstu visât di firmâti? :)