lunedì 27 luglio 2015

Là che no nus viôt nissun

cuadri cjolt di Renoir

Al someave che là di fûr tal curtîl il soreli che cun tante uce, fin des primis zornadis di Lui, al picave cun dute la sô fuarce al ves spacât ancje i claps. Il cjalt nol deve padin. Nol jere nancje un fregul di aiar che al movès lis fueis des vîts de piergule. Al pareve di murî. 
Sul braç e sul cerneli di Sergji su chê piel cussì zovine e lusint il sudôr al coreve jù spissulant come se al fos stât sot la ploie.
Lu stes, tal pet di di Marie tant biel, zovin e taront che nissun al varês olsât no pierdisi cul voli in tant ben di Diu, gotis finis di sudôr e sbrissavin jù come se a fossin stadis tancj trois. 
Sergji tal viodiju al varès volût butâsi in chel mâr tant salât, sintî il savôr di chê aghe jenfri la sô bocje che par dute la zornade e veve bramât par studâ la sô sêt.
Ma no si podeve, ancje se Marie e varès suspirât che Sergji cu la sô man al ves sfredât chel cjalt che la brusave; fermâts chei riui che a finivin jù inagant fintremai lis sôs gjambis. 
Marie e varès podût slontanâsi dal voli di sô mari, che come un brigadîr e fermave chê man, chê cjarece che le varès fate suspirâ, magari cu la scuse di puartâ i plats tal seglâr.
Vere là no ju varès viodûts nissun, ma no si podeve e po une man no sarês bastade par studâ dut che cjalt, chel fûc. 
“Miôr spietâ usgnot cuant che o larai a puartà il lat”. – si diseve di bessole Marie intant che Sergji le cjalave tai voi leint fîl par fîl, segn par segn, ogni so suspîr. - “Là te braide di Nibil platâts dal scûr e des spaleris des vîts sglonfis di ue no nus viodarà nissun.”
di Nello Malisano

6 coments:

Mario Sommarti ha detto...

Ben plan, o jeri lât sù di zîrs e mi viodevi bielzà di sei il Sergji par menâle a fâ il bagn in tun riù:-) Invezit tu mi âs fat vignî sù le cjançon di Modugno che forsit aventi jù pe Sicilie si ricuardin inmó chel so core a core di: Ie mammete e tu..
Jaio

Anonimo ha detto...

No, no Mario. Dute colpe de braide di Nibil e dai raps di american che jerin jenfri lis vîts.
Gracie
Nello Malisano

Galliano ha detto...

Nello e somee une poesie.
A chei di une cierte etât nus scjalde i vues e l'anime.
La cjalade incuisitore de mari no faseve altri che sveâ ancjemò di plui i ardôrs dai doi zovins.
Biele, mi a plasût.
Un abraç

Anonimo ha detto...

Nelo, o lei dome cumò la conte. O jeri sigûr che la braide di Nibil e jere a Feagne.... Bepi

Anonimo ha detto...

Galiano i tiei preseaments mi drecin la creste par dabon. Gracie E po o soi content di veti scjaldade la anime. Bepi, vere le braide di Nibil e jere a Feagne dongje de latarie. Al jere il vignâl che cul so bacò, merlot e merecan al clamave la zoventût sot lis sôs spaleris a disfredâ un fregul i lôr ardôrs.
Mi plaseve la ue ancje a mi.
Nello Malisano

Anonimo ha detto...

Dispo Nelo,no al'è che Marie si avodave a la braide di Nibil, par mangja uve intant che Sergji al disbratave la vore? chi sì che a Sergji ai varess savut di sal "il pane altrui" Lussian

O varès alc di dî

Ti sêstu visât di firmâti? :)