martedì 14 luglio 2015

Rondò a la turca


Da cuant che an metût la "Cjargna in plastica" agne Lene no si fide plui di nissun. No 'nd e ni âgas pudias ni âgas radioativas, ni chês dal Dean o di Ludaria che sedin frescjas come chês das monts da Pesarina.
Ah, chês si ve ch'a son buinas!.
La Gjildina, la sô amia da simpri, a é dacuardi. Baste che no si metin a cjacarâ su Depardieu, "chel orrent atôr francês ch'al somea a un gnognosauro cul so nâs como 'na cartufula mal cressuda e le sô bocja da ridi da biât ritardât a dîs jê alore che, pae Gjildine, a nol sarà biel ma almancul al é un bon atôr, âti che chel biel merecan che lôr a clamin dal Nescafé parce che no si impensin mai cemut ch'al si clame.
Aí, lis confrontazions a puedin fâ lâ di mâl il café, laip il lat, in schiribiçs lis teoriis e in sdrondine le amicizie. Alore prime che le Gjildine a rivi:
=Masceda tu, masceda! A dîs cun ironie a so nevôt ch'al é rivât juste in timp pal café, ven a stâi par lassâi cjapâ le corse, sí, tirâ il flât prime di meti a boli lis sôs cuatri veretâts che vuê a scuen dî ae Gjildine une volte par simpri. Ho!
Il puar Nino nol sa cun ce cadence mazenâ e al scomence a zirâ le manivele dal mazenin cun pôre di lâ mase svelt.
- Su mo sù, masceda mo! No sta vê pôra che chel aí nol é un Moulinex. A nol cji mola!
E lui al mascede. Al sa bielzà che Depardieu al é un lari ch'al à robât il frico cjargnel come che an robât le âghe e che a robaran ancje 'l vin e che dut al finirà sot plastiche. foderât, sfondrât e vendût no si sa indulà, forsit dapardut e par diu, no 'nd é Depardieu ch'al tegni o merecan ch'al vegni a fâ publicitâts pai svuizars cul lôr café za mazenât tai filtros di plastiche che dome diu al sa ce porcaria ch'al ven fûr di ài.
- Folc ti trai, Nino, ce si clamial inmó chel merecan dal Nescafé... no dal Nespresso?
- Cluny, George Clooney! Agne.
Eh! ...E ce si clamial chel todesc ch'al mi fâs tant lâ mata?
- Alzheimer. Agne, Alzheimer.
- O sai ch'o çavarii cualchi volta ma no chel mo, chel ch'al passa 'n ta radio.
- Mozart?
- Ho! T'in volial tant par ricuardâti?
- Ma ce fâtu aí? Mi sunistu il rondó a la turca cul mazenin cumó? Sù mo sù plantila di masenâ cussí svuelt, tant la Gjildina vuê si à di sei pierduda pa strada.

Te radio, Lan Lan il pianist al dà le sdrondinade finâl, si sint i aplausots. Nino al poie il mazenín, si suie il sudôr. Agne Lene si zire par no mostrâ le sô bocje da ridi disint: Ce 'nd êsal di miôr che un café a pene mazenât fat a la turca cuntune buina aga di achì? E a met sù il cjalderín par fâ boli le aghe.
di Jaio Furlanâr

9 coments:

DoneBete ha detto...

Biele conte Jaio! Lis contis di agne Lene a son alc e ce.
Di Gae Aulenti o vevin propite tabajât sul Fûrlanâr, velu achì il link: http://furlanar.blogspot.it/2010/02/opera-di-parigi.html

Mario Sommarti ha detto...

Salve Gio (tante par fâle curte ae Gae:-) si m'impensi de tabaiade ma da cuant chi soi tal paîs dai cii serens mi sint plui responsabil di zirâ lis robis tal biel che tal brut. O vevi scrit mieze furlane e po o ai scancelât le mieze par fâle furlane dal dut, tant la Gae a é muarte tal 2012 e cumó no à plui nuie da dî:-) Mi rint cont chi cjapi le manie di fâ furlan ancje chei che no vuelin seilu par nuie tant che altris a fasin di dut par ignorâ chei che cirin a ducj i coscj di fâ alc par sei furlans. Mandi
Jaio

Galliano ha detto...

Brâf Yaio, sâstu che lis contis cun la agne Lene lis lei variis voltis, no parcè che no le capissi la prime, ma parcè che ad ogni leture co fâs o scuvierç simpri alc di gnûf de fuarte personalitât di cheste "Agne Lene", une femine come pocjis, cence pei inte lenghe.
Mandi

OSCAR B. MONTOYA ha detto...

Un saludo para Agne Lene y la Gjildine. Mi plasin une vore. Mandi desde Buenos Aires.

Mario Sommarti ha detto...

Hola Argjentinos-furlanos, que tal? He preguntado a mi tia si tiene algunos sobrinos en Argentina también. Me a dijo que si y que le gustaría mucho visitar este grande país pero con todos los sobrinos que tiene aquí ella es ya demasiado ocupada.De todos modos, muchas gracias por vuestra visita. Un saludo.
Jaio

Anonimo ha detto...

Nie, o volevi dome visâ i nestris contecurtârs e ducj chei che a intervegnin che sabide 18 di lui, inte arie ex tiro a volo di Bagnarie dongje Palme, cun inizi a lis nûf di sere e je la fieste/conciert Viva Onde Furlane, cun diviers artiscj tanche Carnicats, Claudio Cojaniz, Volvodrivers, Daisy Chain e altris. Fasêt un scjampon par sustignî la nestre radio che e à ancje dedicât oris a la difusion di contis che a son publicadis te ostarie!
CT
PS... come simpri, biele la conte... a vignaressin fûr dai curtmetraçs bogns o ancje une vore teatrâl cun dute la serie di contis dediadis a agne Lene!

Anonimo ha detto...

PS Miôr il cafè masanât sul moment che no lis capsulis, lis supostis, i filtris e altris maraveis :-(

Giovanni Nello Malisano ha detto...

Jaio ben tornât. Alore la globablizazion mi somee ch à glotude ancje la nestre Cjargne e la nestre int. E tu ses brâf a contâle

Mario Sommarti ha detto...

Graziis CT, forsit une dí a rivarà ancje a Bagnarie. O viôt bielzà chei dai raps trai cualchi rime e agne Lene platâ un lagrime di emozion. Mandi Nello, si sintín cule prosime conte.
Jaio

O varès alc di dî

Ti sêstu visât di firmâti? :)