lunedì 3 agosto 2015

Kepler 452b




Il gno spirt al à misurât il cîl

E cumò al misure la profonditât de tiere.

E je la epigrafe (voltade par furlan dal todesc) ch'al veve preparade prin di murî Zuan Keplero, di meti parsore la sô tombe, rindintsi cont di bessôl di ce che al veve fat in vite pe sience. Ma nancje lui al podeve strolegâ che invezit, cuasi cuatricent agns dopo muart, al varès dât il vie, propri in so non, a la plui grande ricercje, mai pensade prin, di planets fûr dal nestri sisteme solâr. Parcè che il telescopi spaziâl ch'al smire e al scrusigne il cîl dì e gnot a si clame propri Kepler. Lui sì ch’al pues dî di jessi rizirât te tombe par podê tornâ a cjalâ adalt, cui voi eletronics, tal spazi fûr de tiere. Bon, ducj a varan sintût lis cronichis di chescj dîs di Lui, ch'a contin la scuvierte di un planet fûr dal nestri sisteme solâr, ch'al somee un grum a la Tiere e al podarès vê vût, o ben vê ancjemò, cualchi forme di vite sul sô scus. Duncje te costelazion dal Cign e je une stele grande plui e mancul tant che il nestri Soreli, clamade Kepler 452, che i dâ lûs a un planet un tininin plui grant de nestre Tiere ch'a lu àn clamât Kepler 452b. A ‘nde a miliarts di stelis come cheste e plui ancjemò planets cussì fâts, ma in chest câs il planet i zire intor a une distance juste, là l'aghe e pues restâ licuide e la durade dal zîr e je di 385 dîs, dome vincj di plui dal nestri an di 365. Cun di plui la etât de stele e dal planet e je dome un miliart e mieç plui vecje dai nestris, ch’a ‘ndan 5 miliarts il Soreli e 4,5 la Tiere; come a dî che sedi la stele sedi il planet a ân vût dut il timp di nassi e davuelzi par gjenerâ la vite. Ch'a sedin o no i omenuts verts li parsore, noaltris a podarìn savêlu dome il linie teoriche, parcè che in pratiche i vuelin 1.400 agns a la velocitât de lûs par lâ a cjatâju. Inalore, noaltris oms di strade a si domandin: ma valie la pene di fâ ducj chei sfuarçs e butâ vie ducj chei bêçs dome par une scuvierte teoriche? I sienziâts a nus rispuindin che ai timps di Zuan Keplero nissun i veve crodût a i siei gnûfs calcui su lis orbitis dai planets solârs, che lui al veve intuidis elitichis e no circolârs come ch’a pensavin ducj, ancje parcè che lui nol podeve cognossi ancjemò lis lôr distancis dal Soreli. Dome cuant che Newton al à publicade la sô teorie su la gravitazion universâl, doprant i calcui di Zuan, la sience uficiâl e à scomençât a scoltâlu. E di chê volte là, parfin ai nestris timps, la NASA e à doprât chei calcui, cun cualchi corezion, par fâ "aterâ" l'om su la Lune cu la mission Apollo 11. Ai timps di Zuan, altri che lâ su la Lune, a si crodeve ancjemò che la Tiere e fôs al centri dal Univiers e guai a pensâle divierse ch'a tu riscjavis di finî cuet tant che persut.

di Bepi Zefon

4 coments:

Giovanni Nello Malisano ha detto...

Gracie a Bepi, om di sience e di bielis suazis dal Friûl, che cu lis sôs contis scritis intun furlan gustôs us insegne simpri une gnove.

Anonimo ha detto...

Cui sa nie se une civiltât galatiche e à inmaniât une spedizion esplorative a ûs Star Trek dome cun robots o umanoits in ibernazion, o civiltâts che a frontin un viaç lungjonon che al vûl gjenerazions e gjenerazions o... che si trati di formis di vite inmortâls, cui sa? E su Kepler 452b... ce forme di vite saraie? Nissun no lu savarà mai, almancul al stât di cumò... magari, cui sa, tra cualchi centenâr di agns o miâr di agns i 452bkeplerians a mandaran un segnâl di lûs a nô (a ûs il film Contact) ma magari no a sarìn tornâts indaûr al medioevo o o sarìn muarts ducj... e dopo, aldì di vuê e je tante int che e crôt ancjemò che la Tiere e sedi ferme e il Soreli al zire... e la cause e je l'oscurantisim di ciertis popolazions ma ancje i astronoms... sierâts intune tor di ivori e nancje bogns di divulgâ... apart cualchidun... sì sì, si clame Bepi Zefon e al è babio une vore!
CT

Anonimo ha detto...

Nelo, Checo par amôr di Diu! No stait a fâmi passâ par ce ch'a no soi. Un passionât di astronomie a nol pues jessi un astronom, se mai un astrofil. E in Friûl a 'nde tancj come chei dal CAST di Talmassons che a fasin un grum di divulgazion par dibant, tes placis, tes scuelis, tal lôr osservatori e vie discorint. Ancje ca vie in Piemont a si fâs un grum di ativitâts di divulgazion un pôc par dut ma soredut jenfri i zovins. O vin po la fortune di vê in Friûl un grant astronom di chei vêrs ch'a si clame Nando Patat di Dartigne, ch'al è il coordenadôr dai programs di osservazion di ducj i Telescopis dal ESO - Organizazion Europeane di Ricercje Astronomiche tal Emisferi Sud de Tiere - e ch'al fâs plui di cualchi intervent di divulgazion, ancje par furlan. Si capis dome cuant ch'al à un tic di timp libar, lui si ch'al è un vêr astronom. Us vuei ben istès, Bepi

Mario Sommarti ha detto...

Bon da savê. No cognossevi il Kepler, forsit parce che pe glêsie nol si é masse compromes:-) come Copernic, Ticho Brache, Gjordano Bruno e Galileo. Un salût
Jaio

O varès alc di dî

Ti sêstu visât di firmâti? :)