lunedì 31 agosto 2015

Pipins


Lindo al jentrà te stale e si rimpinà sul tiezon, doprant la scjale di fier. 
Al veve bielzà preparât il mus, tacât il cjar, e ducj i doi a polsavin tal mieç dal curtîl. 
La bestie si parave des moscjis scoreantsi cu la code; cualchi colp al sunave sul riplan dal mieç, scovât di pôc, e netât dai fros, polvar e sclesis. Di adalt, l'om al de une businade, cuinçade di un porco, che e scjassà la place di un paîs inmò cuiet e cidin, in chê cjalde sabide di Lui. Bisugne movisi, al pensà, fasint i conts dal timp che i varessin metût a rivà a Rivignan e di trop che i sarès vanzât par passâ, tornant, ta lis ruinellis a tirâ sù un cuatri fassuts. Simpri che la femine i ves lassât fâ… al pensâ sielzint une bale di stran, e butantle jù pe trombe, dongje dal bo, che al molà, spaurît, une mugulade di fastidi.
Al smontà e al cjamà la bale propit tal mieç dal cjar, di traviers, e al tornà a voltâsi viers la puarte di cjase. Scolastiche e steve jessint propit in chel, e e veve mandât indevant i fruts, che a corevin tant che sfolmenâts viers di lui. Il plui grant al rivave denant, fasint valê la gjambe plui lungje rispiet aes dôs frutis, che cun di plui a pierdevin timp a tirâsi pai cjavei. L'ultin, il picinin, petenât e inflochetât, al steve tal braç di sô mari, cun doi voglons simpri scocolâts. «Sentaisi li!» al intimà Lindo, cjamaintiu sul cjar un ae volte. «E fers e cidins, di no spaurî il mus!»
I piçui a jerin cuinçâts come pipins. Luigjino cuntun golet inamidât dûr come il cret e la gjachetute prestade e botonade strente. Mariangela lu cjalave di sot la pinie, tocjantsi dut un dret il floc blanc che e veve tai cjavei e che le faseve sintî une principesse. I pareve, a ognidun, che chel altri al ves sielt il puest miôr, di sintâsi parsore de bale di stran, e cussì si sburtavin un cul altri, cul cûl, çocantsi cu lis scarpis pene lustradis, che a nulivin di gras. Lussie, invezit, si jere sintade di chê altre bande, dant la schene al mus, cuntune musate rabiose che no si capive di dulà che e rivàs a tirâle fûr. 
Se ducj i fruts, in chei agns cetant dongje de vuere, a jerin un tichinin salvadis – vûstu pe educazion, che e mancjave; vûstu pe fan, che 'nt dere simpri avonde – jê e jere teribile. Tignile ferme al jere impussibil, e cuant che si meteve tal cjâf une robe, di fâ o di no fâ, e rivave cuasi simpri a vêle vinte. Sô agne e jere convinte parfin che e fos striade, tant di puartâle no dome dal plevan, a fâle benedî, ma di fiscâ cussins e materàs par cjatâ e disfâ grops te plume e tai scartòs di blave che ju jemplavin. Chê dì, par convincile a montâ sul cjar, plui che i scufiots a jerin coventadis lis promessis pandudis di sô mari, su ce che e varès cjatât dulà che a vevin di lâ. 
«’nd à una grandonone», i veve dit Scolastiche, cimiant, «no tu âs mai viodude une compagne; ma se tu âs voie di stâ cjase…»


A Rivignan, a pearin il mus te ombrene dai morâi, in mieç de place, e a jentrarin ducj tal negozi di Vigji, il fotografo, prin a vê metût sù un studi, tai paîs li ator. 
Lindo al jere stât li pôcs dîs prin, a domandâ trop che al costave, e jessint che al leve pandint par dute Talmassons che i siei fîs a jerin i plui biei dal paîs, al veve decidût che cuntune fotografie di picjâ in cjase e mostrâ a ducj, la robe si sarès rinfuarçade inmò di plui. Si usave fâ une foto de famee, in chei agns, e no si veve plui pôre come prin, framieç lis vueris, cuant che cualchi vieli al refudave di metisi in pose, convint che la robe e podès fâi mâl, o che al fos pecjât o opare dal diaul. Il diaul però, in cualchi maniere, al metè il piç: Lussie e veve tacât a vaî.
E vuicave e e bateve i pîts par tiere, cuasit come se e fos in marce. E jere une sene colaudade, la frute lu saveve ben, e ancje se e meteve in cont cualchi pataf, un grant dispendi di vôs e energjiis, e puartave a un sucès cuasi sigûr.
Vigji si tignì lis mans su lis orelis, disperât. 
«Cence no la fâs! Cence no la fâs!» e leve scandint la frute, a ogni colp sul paviment.
E dopo mieze ore di chê naine, cuntun rosari di blestemis di so pari – che però no le tocjave nancje cuntun dêt e sot sot des mostacjutis al riduçave – e i patafs di ordinance de mâri, la frute e otignî. Ancje se delicade, e ancje se e veve scrit “non toccare”, suntun biliet di cjarte poiât su la cotule, Vigji si rindè e la tirà jù de grande scansie dulà che e jere poiade, masse cjare par jessi vendude a chê puare int.
Lussie e tirave sù cul nâs, musticade, recitant la sô part fin insomp, ancje cuant che il scat de machine fotografiche al fissà par simpri, tal blanc e neri de imagjine, la sô vitorie: una pipine di siôrs, lustre e petenade, sentade sui zenoi.
Contis dal Ostîr
di Raffaele Serafini

____________ 
Cheste conte no je une come dutis chês altris, dal Ostîr, e neancje la imagjine, che e je une fotografie autentiche dai siei vons pe bande di mari (agns '50). E je une conte in anteprime par ducj i contecurtârs che e rivuarde une gnove di bande dal Ostîr che e rivarà intal mês di Setembar o ai prins di Otubar.
Si podarà lei dome chi su Contecurte, e speri che us plasi. 
L'Ostîr

12 coments:

Anonimo ha detto...

Gelo, che foto li e je stade come un lamp , o ai ricognossût Lindo, e la conte con ducj i parecjaments a mi àn fât tornâ iniment il studi fotografic di Rivignan, cu la pipine, il spieli, il pietin e la padielone dal flash..noaltris o jerin lâs in sîs cun trê bicicletis...Bepi

gelo stellato ha detto...

Tal sens che tu ti visis di gno nono? E in ogni câs tu confermis dut ce che mi à contât mê mari. Graciis... Pensi che o zontarai la padiele dal flash :)

Egle Taverna ha detto...

Une vore biele. La foto di epoche de famee cu la frute che e ten la so pipine e mostre dute la sodisfazion te muse pe so vitorie.
Chel scat al restarà par simpri a ricuarda chel fat cun tante simpatie.
Compliments!
Egle

Anonimo ha detto...

Al lavorave te fabriche di cjadreis come gno pari...Bepi

gelo stellato ha detto...

Verissime... Che ogni volte mi soi di maravee a pensâ un fabriche di cjadreis in chel di talmassons :-)

Anonimo ha detto...

Magari cussì no a le àn sierade daspò cuasi un secul di ben servît..

Galliano ha detto...

Ben contade clare e tonde. Tant la storie come la fotografie a rapresentin une epoche che po sei chê di ognidun di noaltris, un spieli dulà viodi il propit passât.

Luciano Marinig ha detto...

Biele conte, mi plas parcè ripuarte chei biei timps passats ,che sepur in miserie e lassavin spazi al cur di gjondi su piçulis robis. Lussian.

gelo stellato ha detto...

Graciis a ducj! O ai gust che us plasi, mi plaseve ancje a mi :)

Anonimo ha detto...

Biela la conta! Secont me, ta foto a si viôt ben ancje la flusumia di famea!
Mandi

Xabier

gelo stellato ha detto...

adiriture! in efiets, no tu âs tuart :)

Anonimo ha detto...

Une fotofrafie perfete in blanc e neri di chel vecjo di chel friûl che nol é plui. E po' scrite cun maestrie
Nello Malisano

O varès alc di dî

Ti sêstu visât di firmâti? :)