mercoledì 26 agosto 2015

Un calendari de etât de piere


E je di chescj dîs di Avost 2015 la gnove de scuvierte di un calendari di piere, vecjo di miârs di agns, fate in Val d’Aoste tal comun di Donnas dal archeoastronom talian Guido Cossard. Si fevele di un lûc tignût ancjemò platât par pôre che il va e ven di curiôs al finissi di fâ dams prin di podê protezi a dovê il sît e cirî di savê cuant che e je stade fate la opare. Te Val d'Aoste e plui jù fintremai te provincie di Turin tal teritori clamât Canaveis, a si cjatin un grum di pieris picadis a forme di piçulis copis par figurâ sedi oms sedi stelis e costelazions dal cîl, ch'a son stadis datadis a la fin de etât de piere e scomençâ de etât dal bronç, e par intant a si pues pensâ ch'a si trati de stesse ete, ven a stâi ator di 4-5000 agns indaûr. Ma cemût ch'al è fât chest calendari e cemût ch'a si dopre a nol è dificil di capî al dîs Cossard: al è un sisteme di nicjis sgjavadis ta un cret a la juste distance, e di un bûs taront parsore ch'al lasse passâ la lûs dal Soreli par lusorâ une sole nicje a la volte, secont da la altece dal Soreli tal cîl. Cuatri di chestis nicjis a àn alc di speciâl parcè che dôs di lôr e vegnin lusoradis dome tai dîs dai Ecuinozis di Vierte e Sierade e altris dôs dome tai dîs dai Solstizis di Istât e di Unvier, come a segnâ lis stagjons dal an a chei timps là vie. Altris nicjis a lavorin cu le lûs de Lune segnant la Lune plene in rispiet de posizion dal Soreli, tant che tal Lunari. Di sigûr cuant ch'al sarà finît il studi a vignaran fûr altris scuviertis di no crodi. Al zonte Cossard che le "tecniche dal bûs" e je gnove dal dut pal nestri continent, jessint che dome te Americhe, tai lûcs dai popui Anasazi, a si cjate alc di compagn. Bisugne dî che ancje i Egjizis e i popui de Mesopotamie a cognossevin ben il scori des stagjons, forsit ancje miôr di noaltris cumò, parcè cuant che tai agns '60 dal secul passât, par salvâ il templi di Abu Simbel dal inagament procurât da la costruzion de dighe di Assuan, a àn clamât i miôr inzegnîrs e astronomis dal mont e al la fin il templi al è stât taiât a tocs e tornât a fâ sù a 65 metris plui adalt e 300 metris plui indaûr, parsore une culinute. Il templi origjinâl al jere stât tirât sù dal faraon Ramses II, plui di 3.200 agns indaûr e al tignive ta une stanziute clamade il "Santuari" cuatri statuis di divinitâts, une e jere la sô, ch'a cjalavin la puarte de jentrade in mût di vignî lusoradis da lûs dal Soreli dome doi dîs al an: il 20 o ben ancje il 19 e 21 di Fevrâr e il 20 o ben il 21 di Otubar, e somee tes ricorencis de nassince e de incoronazion dal Faraon. No covente dî che i architets a vevin fât in mût che il plui lusorôs e ch'al tignive plui a lunc i rais dal Soreli, al jere propri lui, il grant Ramses II, ch'a si veve fat fâ Divin di bessôl. Po ben i architets e i astronoms modernis te ricostruzion dal templi tal gnûf lûc, a no son stâts bogns di otignî chês datis, e cumò chel câs al capite il 22 di Fevrâr e il 22 di Otubar. Ch'al sedi stât un svindic dal Faraon par vêi disturbât il so sium?
di Bepi Zefon

5 coments:

Anonimo ha detto...

Biele conte, cun salse storiche,di cert che chei di une volte no jerin mones,se vessin vut i mieçs di chei di vue ,cui sà ce che nus varessin fat viodi. lussian

Galliano ha detto...

Mandi Bepì.
Biele e interessante dal pont di viste de informazion, contade cun peraulis comprensibilis dai neofits in materie.

Anonimo ha detto...

Lussian, Galliano, a veis reson. Se noaltris a savessin lei e capî dut ce ch'a àn lassât scrit su la piere i nestris antîcs a vignaressin fûr sorpresis di no crodi... Bepi

Anonimo ha detto...

Bepi o soi tornât. E cun plasè o ai lete la to conte. Miôr il to articul sul calendari. È come al solit o scuvierz che tu sês un om che al cognos tantis robis
Nello Malisano

Anonimo ha detto...

Mandi Nelo, o soi stât tentât un grum di voltis di clamâti par sinti cemût ch'a tu stavis, ma o ai vût pôre di rompiti... il ritmi de cjaminade. Tu mi contarâs cemût ch'a je lade. Bentornât in contecurte. Bepi

O varès alc di dî

Ti sêstu visât di firmâti? :)