mercoledì 30 settembre 2015

I prins bregons luncs


Valantin, sentât intune bancje di place, al jere cul cjâf a nolis, tu lu viodevis come se i siei pinsîrs a vagolassin mo ca mo là cence un ordin precîs di timp e di spazi. Di colp il ricuart dai siei prins bregons luncs lu fasè riduçâ. Al varà vût sì e no disesiet agns, a dî il vêr nol deventave mat par vêju, dome che, seont sô mari, e jere rivade la ore di meti a salf il pudôr, il decôr e lis buinis usancis.
A domandarin ad imprest dôs bicicletis e intune avostane buinore a cjaparin la strade che ju puartave sù a Bueriis, li al viveve un parint sartôr. Chest ur mostrà un campionari di telis, la mari e sielzè une e par capî che no fos di trê braçs un franc e taià une ponte e i de fûc, che si le studant di bessôl, il fum al puçave di plumis brusadis:
- Buine, buine, e je lane - e disè.
Come doi sensârs a concuardarin il presi patafantsi la man. Intune setemane Valantin al varès screât inte sagre di Sante Filumene i siei prins bregons luncs. Une ocasion uniche par meti in mostre la sô braùre e il so svant, pavonantsi lant sù e jù pal borc, fermantsi tai barachins dai goloseçs e tes barachis che par pocjis palanchis si tirave cinc tîrs al bersai.
I gnerfs sveâts pe ansie dal screi no lu lassarin durmî, cussì e rivà sabide sere. Lis cjampanis a forin moladis al vint, i lôr glons a jemplavin cence sostâ lis stradis imbandieradis, i barcons ornamentats e lis bocaletis sfloridis, intant che i globui ae veneziane a luminavin la cjalde gnot di Avost.
I prins lusôrs da la albe i derin fuarce ae vegle. Valantin si sveà, un picjot tal claut de parêt i mostrave i bregons gnûfs, par tiere, lustradis a dovê si viodevin lis vecjis scarpis dal nono insueladis. Il zovin al cjalave dut chel vistiari maraveât. No sai se al jere cussient de ambiguitât dal moment che si cjatave: il passâ a sei adult, in altris peraulis: piçul par sei grant e grant par sei piçul.
Si vistì, cjalantsi tal spieli dal armaron, cui jerie chê presince? Al cirive di scrusignâ la gnove figure, di chi indevant al sarès stât Lui, al veve di mostrâ a di chei altris chest gnûf Valantin, compit par nuie facil, di fat al voleve cori dabàs par che lu viodessin i siei e… nuie di fâ, nol podè. Fintremai che al sintì la vôs de none che lu clamave:
- Tinut, Tinut, e je ore di lâ a messe!
La puarte e jere lì, bastave vierzile e lâ fûr, ma lui le viodeve come se fos sierade cun siet clostris, il cûr i galopave pensant che salacor cualchidun fûr lûc lu varès coionât. Finalmentri e sintint la presse dai ultins glons des cjampanis, al vierzè la puarte e… sfidant il mont si butà te brentane. Al fo rasintant i mûrs des cjasis plombant intune glesie colme di fedêi.

Nissun… ma propri nissun si jere inacuart dai siei prins bregons luncs.
di Galliano di Buenos Aires

11 coments:

Anonimo ha detto...

Galliano,mi ricuardi i miei prins bregons luncs,puare gno mari ju veve cusits intune vecje e rigide tende militar inglese,jo minut di vuess e debil di fisic mi soi scussat ducj i zenoi tal puartaiu, tant che par fur si viodevin dos tacjs di sanc a mud de sacre sindone.La to biele conte mi à riviert chist ricuart lontan.Galliano tante salut di lussian

Giovanni Nello Malisano ha detto...

Brâf Galiano, soredut par cemût che tu contis i sintiments dai personaçs che e dan vite a lis tôs contis. E mi plâs ancje il timp dai verps che tu dopris. Tu varessis di dami un pocje de tô scuele ancje a mi.

Giacomo Trevisan ha detto...

Compliments Galliano, par me al è une vôre valevul contâ i sintiments pal tramit di robis concretis e tu tu lu as fat veramentri ben. Mandi!

Mario Sommarti ha detto...

Il biel a nol é dome tal fat che i bregons luncs no sedin stâts notâts da nissun ma che il tissût al jere di lane e che si jere in plen mês di avost:-) Biele idéé che mostre trop che si puès sei gnôgnos da zovins par vê asolutamentri alc ch'al somee necesari, indispensabil e che dome plui tart si si puès rindi cont che i sintiments a no son simpri chei che si crôt.
Jaio

Galliano ha detto...

Nello, graciis des tôs peraulis. No mi permetarês mai di scuelâ a di nissun, podopo se la mê scriture e sierf a tal fin, al vûl dî che la frece dal arcîr e à fat centri tal bersai.
Maman

Galliano ha detto...

Mandi Lussian e graciis dal to coment. Il to simpatic e torturadôr ricuart al po la de man dal gno capot: (si po leilu ca) http://centroraicesfriulanas.blogspot.com.ar/2012/06/il-capot.html
fat cuntune cuvierte di soldat, la mê torture e jere che il cuel al sfreolâmi la cadope mi provocave un sbulium che no ti dîs. Lis nestris maris a àn fat il miôr, no vint altri.
Un salût

Galliano ha detto...
Questo commento è stato eliminato dall'autore.
Galliano ha detto...

Mandi Jacum, graciis par vêmi let e dal coment.
La intensitât dai ricuarts a van de man dai stâts di umôr.
Un salût

Galliano ha detto...

Yaio i tiei coments a son “veretâts riveladis”.
Se jo i vês domandât a mê mari (cuant po mai) un bregon lizerin mi varès dât un scapelot. Chel di lane al veve di durâ “in vita aeterna”
Mandi

Egle T. ha detto...

Al è biel niçulȃ i ricuarts, al fȃs ben al cȗr.
Biele conte.
Mandi
Egle T.

Galliano ha detto...

Siore Egle,
Graciis des sôs peraulis.
Niçulâ i ricuarts al è come viodi il mont a traviers di un caleidoscopi.
Le saludi

O varès alc di dî

Ti sêstu visât di firmâti? :)