giovedì 15 ottobre 2015

CCaSZ - Ultime sere

O scomencìn cussì! Pôre eh...
E un pocje di pôre, îr di sere, ae ultime serade di Ce Contino a San Zorz, i nestris trê sfolmenâts le àn vude, a viodi une sale mieze plene e une vore di mangjative insomp de sale, in spiete di jessi mangjade... 
Ma si puès dî che le serade e je lade une vore ben, e il Berlon Michele Londero, l'Ostîr Raffaele Serafini e il Famei Checo tam a àn dât lustri ae nestre Ostarie Contecurte, ae leterature furlane e, al è clâr, a lis contis curtis. O almancul, la int che e jere e pâr jessi stade contente e vê preseât, parfin chei che a inizi de rassegne a no crodevin masse che il furlan si podès doprâ in ogni tipo di narative.
Ve chi, anzit, une fotografie de sale viers la fin de serade.
Ma vignin ae cronache e viodìn se ancje chest colp, chi a San Zorz, al è passât cualchidun di interessant... 
Sì! nuie luminârs chest colp, ma jessint une serade dulà che il teme al jere dediât a "E cumò che tu le âs contade?" - ven a stâi il messaç di chel che al scrîf a chel che al lei - a jerin tal public doi personaçs che a lein dispes par talian.
A son stâts individuâts dal ostîr par câs e o podìn ancje mostraiu intant che a jerin li, cuiets, a spietâ che la sedade a scomenci.
Il prin al è un letôr seriâl, Michêl Pagjine, che cuasi al dave di mat a viodi une cariole plene di libris... il secont al è invezit Checo Ledrôs, chel che al à regalât la maiute al ostîr, e che al lei, invezit dai luncs romançs, contis curtis par furlan. 

E insome... dopo i lôr intervents, che o vin cjapât su e che o tacarin insieme a ducj chei altris par metiusai chi su la Ostarie, la serade e je podude tacâ, leint nuiemancul che la conte misteriose. Ce robe? Manarie! 

Une conte voltade di Gianfranco Pellegrini e che o podês tornâ a lei achi, par chel che no le a mai sintude. Conte di Agota Kristof, che e à insegnât a ducj i spetadôrs a no lassâ mai une manarie dongje dal jet, prin di lâ a durmî. O almancul il Checo nus à insegnât cussì, inte sô interpretazion, une vore convincente.

E dopo? 
E dopo e je vignude la ore des curtissimis, e magari, se propit o vês voie di jentrâ inte serade ancje voaltris che no jeris, us lassin achì un dôs, e ancje une fotografie di Michele Dreteledrôs Londero, ancje lui pardabon brâf.
Us lassìn:
Gjeometrie de reson 
Si che duncje, a jerin sintâts ducj ator de taule: di une bande si jerin metût chei che a vevin reson, di chê altre chei che a vevin tuart. La taule e jere taronde.

e ancje:
Il predi 
“Ma ce dal diaul al fasial un predi dentri de mê cjamare!?” A jerin stadis chesti lis ultimis peraulis di gno nono.

E in bande di altris contis curtissimis, come tandem e spedizions, cjoltis dretis di cheste ostarie, o vin let ancje Calvino. Une conte che si cjate dentri des lezions merecanis, e si intitule "la masanete" e disin che al è stât dificil spiegâ parcè che cheste conte e sedi, inte sô brevitât, plene di significâts, ma l'Ostîr le à cumbinade.
E dopo?
E dopo il moment di X-tractor, cun la performance dai In doi rive no tocje, che a nus àn fat doi tocs gnûfs, e che a àn pardabon vint dut, o almancul, cussì o podês viodi su lis tabelis dai zurâts, che a àn medie "infinito"!
A proposit... i fan a àn preseât une vore il pivet di Fabrizio, ma lu prein di tornâ a fâsi cressi la barbe... (E ae fin, grandissime version di Setu mai stât a... San Zorz! cun test modificât)
Finide ca?
No! Il moment clou de serade al è stât presentât di Carli Pup, vôs di Onde Furlane, e autôr de postfazion dal libri in cuistion , che al à dât il cambio al Ostîr di Contecurte, par presentâlu in viest di scritôr. Eh, sì, parcè che in tal cors de serade e jere une super anteprime: la presentazion dal libri "Contis di Famee" jessût pe Kappa vu propite pôcs dîs fa. 
Checo nus à let Pipins e Michêl, Gusto, dos contis che a dan une idee dal libri e di ce che al à dentri, cun subit daûr cuatri cjacaris sul libri e su ce che al lasse, une volte che lis à contadis, lis contis.
Si siere cun un altri pâr di contis de ostarie... une propit di Carli Pup, e une di Xabi Xogrâr da Plêf, scrite par il San Zorz che al jere sul confin di vuere, e di chestis us lassìn cualchi fotografie.
 
Comprendude cheste ultime, che e mostre la sierade, cuntun omaç a Dino Buzzati, grant scritôr di contis, e una biele trasposizion de sô conte "La mantele".
Finide? Ma ce... al vignût il toc miôr cun la fieste, prosec e fraulin di bevi, polpetis e fertaie cul sclupit, mortadele, coculis, e pan e salam metût doncje dal catering di famee di Sandro e Lucia par sierâ in bielece. 
O spietin i coments di cualchidun di chei presints par savê ce che a pensin lôr de serade e cemût che a viodin chest esperiment di "Ce Contino a" che nus plasarès riproponi ancje plui indenant, di cualchi altre bande, a cjatâ disponibilitât e cuissà, Magari in tes Ostariis.
Altris fotografiis su la nestre pagjine facebook.
Ma chestis che us metin sot, no podês pierdile, cun tant di maiutis furlanis di ordinance.



ps. dal Ostîr: un grassie speciâl par cheste serade a Checo e Michêl, a Pauli Kantarut (ancje pes fotos), a Emanuela, a Alessandra Kappa vu Kersevan e Giuliano Cariole, a Marina e so fradi, ai In doi In doi rive no tocje, a Carli, a Pablo, a Sandro e Lucia pal catering di famee, e soredut a chei che a son vignûts e che no si spietavisi propit che a vignissin e ancje a chei che a varessin vût di jessi ma no son podûts vignî. 

10 coments:

Anonimo ha detto...

Un salt indenant pâr Contecurte. Ben planc si rive pâr dut.
Nello Malisano

Galliano ha detto...

I miei compliments par chestis seradis di "Ce Contino a San Zorç". Si viôt e si sint dute une orchestrazion che busine daur de cuintis. Lis distancis no varan permetût a tancj di assisti, purpûr il rindicont fat dal Ostîr e la fantasie dal letôr a àn permetût di capì la impuartance di chescj incuintris.

gelo stellato ha detto...

graciis Nello e graciis Galliano. Disarès che e je vere, un pôc o vin fat savê ce robe che e je Contecurte, e pe lenghe dut al zove :)

Anonimo ha detto...

Gelo, tes fotos a tu mi someis un grum al "giovane Montalbano", mi sbalio Nelo, ce disistu tu ch'a tu vivis di chês bandis là vie? Bepi

gelo stellato ha detto...

mi tocjarà cjalâlu e viodi se tu âs reson :)

Anonimo ha detto...

Bepi tu s reson: spudât. Dome che che caj ù no mi capis cuant ch i feveli par furlan.
Nello Malisano

Giovanni Nello Malisano ha detto...

âs chel ca jù - che

Anonimo ha detto...

Nelo, prove a fai une punture di tocai ch'a lu clamin Friulano..no si sa mai...

Giovanni Nello Malisano ha detto...

Provarai se o cjati une butilie. Ma miôr bevilu che fassi sbusâ il cûl.

Anonimo ha detto...

Biele serade e plui int dal solit... pecjât nome che la magjie e sedi finide... cuatri seradis a son svoladis...
CT

O varès alc di dî

Ti sêstu visât di firmâti? :)