venerdì 6 novembre 2015

Gargantua cuintri i Panzergrenadieren

La grande bale di fûc e sclope in milante sclesis. Une grande colone di fum neri e penç si alce cuant che i pelegrins a clotein tal desert. Isal stât il Signôr dai esercits a tirâ chê bale di fûc?
La gnove si sparnice ator par dute la Tiere: DISTRUZION DAI LÛCS SACRIS!
L'SS-Obersturmbahnfuehrer Juergen Klinsmann al vualme la sene cul binocul a cualchi desene di KM di Jerusalem, dulà che e je stanziade la sô unitàt mecanizade.
“Ce dal diaul isal? Clamait daurman il Komant Ghieneral dal Fuehrer a Berlin!”
“Jahwohl, Herr Obersturmbahnfuehrer!”
E il radiotelegrafist al ubidìs...
Ma ta chel al fâs la comparse su la sene un... gjigant!!!
L'Obersturmbahnfuehrer nol crot ai siei voi! Al berle sec l'ordin...
“Ce dal diaul isal? Clamait daurman il Komant Ghieneral dal Fuehrer a Berlin!”
Il gjigant al berle cun vos tonante: “Clamà cui? Ca no si clame nissun! Cheste storie e fâs schifo! Ce dal caz seiso lâts a fâ a Jerusalem se no seis nancje rivâts a sfrondâ a El-Alamein?
E alore il gjigant al sofle vie il piçul regjiment di panzergrenadieren de Atlantik in scjale 1/32 e il neri trop di SS, simpri in scjale 1/32, che ju integre.
Cumò il gjigant si dediche a un altri gustòs passetimp.
Po al rive un altri gjigant, ancjemò plui grant e cun vistosis mostacjis colòr pél di orangutan. Al fevele cu la vòs dal ton:
“Goffredo, ven! Al è pront di merinde!”

NB: il grat di Obersturmbannfuehrer al corispuint cirche a chel di colonel.
di Checo Tam

5 coments:

Galliano ha detto...

Biele e ironiche cheste conte.
Dome i fruts a àn la capacitât di ridimensionâ la storie cui lôr zucs.

Anonimo ha detto...

Benpo,benpo Checo,lis tos contis e son simpri beligjerants, indula che incolin fats pasats cun fats presints ,cuntun biel leam di scrivi.Par furtune che il mont al torne seren cul gigant cal clame il frut a fa di merinde. Lussian

Anonimo ha detto...

Checo a tu âs fât vignî iniment Jo Condor e il Gjigant. " Gigante pensaci tu" di Carosello ambientât a Jerusalem. La grande bale di fûc e jere une bale di nutella...scusaitmi la fantasie malade..Bepi

Yaio ha detto...

O vevi ricognossût subite l'autôr e seben no sedi da ridi o ai leût le conte cun tune bocje da ridi viodint dulà che le tô fantasie mi varès menât a spas:-) Cert che il to mont al podarès sei piturât o filmât.
Jaio

Anonimo ha detto...

Eche? C'ho scritto Jo Condor? Ancje jo mi visi di chel carton di propagande e mi displaseve par chel astor cuant che al vignive cjapàt dal gjigant e al berlave "Lasciami! Non c'ho il paracadute! Non c'ho la Mutua?" Cumò, cuant che e rive la propagande in TV o cambii il canal... ta ché volte invezit al jere biel viodi il carosello!
CT

O varès alc di dî

Ti sêstu visât di firmâti? :)