venerdì 20 novembre 2015

La vilie di San Zuan

Jere la sere de vilie di Sant Zuan, e a Davai, un paîs de Cjargne, ancje in chê sere, come che si faseve ogni an, une clape di fantatis si jerin cjatadis dopo il rosari, a cjase di Mariute par pierdisi intun zûc che al induvine il destin di ognidun.
Chel il zûc che di ete in ete, come che e vûl la tradizion, lu fasin dome in chê sere lis zovinis dal paîs.
E cussì ancje in chê sere a vevin començât chês fantatis cuntune di lôr che e jere jessude fûr tal curtîl, intant che chês altris dentri te cjase a vevin platât tai cjantons imprescj de cjase. 
Par prime, come parone di cjase i à tocjât a Mariute, e dopo une e dopo un’altre chês altris, tant che il zûc al è lât indenant di bot fin a lis oris piçulis. Une volte ladis fûr, chês fantatis, ogni dune, veve, une volte tornade dentri, di ciri i imprescj che chês altris a vevin platât. 
E a secont di cemût che ju cjatave e podeve cognossi i so destin.
La clâf, la tace, il pietin a jerin i imprescj plui doprâts in chel zûc. 
Cussì se la fantate che jentrave e cjatave subit la clâf voleve dî che jere dongje a un matrimoni cuntun fantat bon paron e cun tant di cjase. Se invezit e cjatave la tace par jê no restavin che lagrimis di butâ par dute la sô vite. Infin se e cjatave il pietin voleve dî che e varès cjatât tal troi a jê destinât dome grops di disgredeâ. 
Cussì ancje in chê sere par dute la gnot Gjiovane, Mariute, Lisute, Alme e vie indenant, fûr e dentri fra chê cjase e chel curtîl a son ladis indenant cun chel mostri di zûc fin a lis oris piçulis.
E par fortune San Zuan cun dutis lôr al someave che al fos stât propit bon e gjenerôs. Dutis cence tant scombati a pene jentradis a vevin cjatade la clâf il simbul de fantate fortunade.
Pecjât che tal doman Gjovane lant a balâ e à cognossût un fantat che le à striade. Biel pardabon e cun chês mostacjutis, chei cjavei neris e cun chei voi di cjamoç i à smot tal cûr la suste dal amôr. 
Puare Gjovane chel biat al jere si biel, ma nol jere paron nancje di un claut e cun di plui no i pocave tant nancje lavorâ. 
Propit puare frute, il destin cun chel om che i à metût su la sô strade le à propit tradide. L'amôr al è vuarp e ancje jê e je restade svuarbade.
Nuie ce fâ, Chel al jere il so destin, plui potent de gracie che al sere prime i veve prometût il zûc di San Zuan.
di Mariangela De Campo

9 coments:

Anonimo ha detto...

Mariangela, il zuc di san Zuan a nol'è ne pi ne mancul chel de margherite, par fale la drete bisugne prin conta lis fueis par pode dreça il destin de to bande.Mandi e ben sintude cu le biele conte. Lussian

Anonimo ha detto...

Benvignude a Mariangela su contecurte cun cheste conte gustuse. Spearin che sedi la prime di tantis altres contis. Brave par dabon.
Nello Malisano

Anonimo ha detto...

Biele conte, bon proseguiment su contecurte.
Compliments e ben rivade!
Egle T.

Galliano ha detto...

Benvignude Mariangela,
Tu âs reson a dî che l’amôr al è vuarp, cetantis voltis che si svuarbisi paiant un presi masse alt.
Ben contade la conte tal fânus capî usancis di une volte.

Anonimo ha detto...

Butìnle in ridi Marieanzule, a no si à simpri di vaî. Par gno cont se Gjovane e vês doprâts ancje chei altris cuatri sens e no dome la viste, cence contâ il sest che lis feminis a lu àn une vore svilupât, e varès induvinât subit. Pense dome a Sante Luzie: cemût fasaressie a puartai i bebei ai fruts, cui voi tal plat, e a metijai tes scarpis sa no vês vût un bon nâs? ... Scusimi la stupiditât, Anzule. Bepi

Anonimo ha detto...

Lussian, Nello,, Egle, Galliano scuen ringraciâus ducj vualtri dal "plui font dal me cûr"! I soi stade tant contente di vei puartât "alc" des mes monts a la planure dal nestri Friûl e soredut ancje a chei contecurtârs che son a tor pal mont... I sai che storiis vecjis àn d'è par dut, ma de Cjargne pocje int lis conte. Sperin di rivà a contâus, plui indenant, alc altri di biel inte me fevelade un tic divierse de vuestre..Us lassi pal moment cuntun gnûf gracie!! M A N D I a Contecurtegnove. Mariangela De Campo

Yaio ha detto...

Insume, le clâf dal destin ! Ma si tratial di Davai o Davâr ?
Mandi e buine continuazion!

giulia casolo ha detto...

Mariangela, tu sôs une grande! Cence Te, Làuc, al sares muart :-/

Anonimo ha detto...

Marieanzule, si sa che l'amôr al è vuarp, ancje se Mariute e veve almancul altris cuatri sens di doprâ, cence contâ il sest sens che lis feminis a àn une vore svilupât. San Zuan a le à freade, la che invezit Sante Luzie e je buine, pûr cui voi tal plat, di cjatâ lis scarpis dai frutins par puartai i bebei. Je forsit e dopre il nâs... juste par fâ une ridade ogni tant. Bepi

O varès alc di dî

Ti sêstu visât di firmâti? :)