lunedì 28 dicembre 2015

Il cercandul


Si clamave Gjovanin, ma di lui o sai nome ch’al stave des bandis di Rivignan. Al rivave ogni dì tor vot di matine e al poiave la biciclete tal sotpuarti ch’al deve tal nestri curtîl.
Al saludave mê mari: “Bundì Angjeline” e po al lave in place a cjapâ la coriere di Colavin. Al lavorave a Udin, jù pe setemane. A la domenie al lavorave a Codroip.
Al lavorave! Si fâs par mût di dî; al lave a cirî la caritât e tal so mistîr al jere babio.
Al varà vût cincuante agns, ma forsit ancje setante, no si capive ben. Al jere piçul, magri, scûr di muse e cuntune barbe lungje di almancul une setemane, grise e maltajade. Il vistît po al jere in tono cul personagjo. Une gjachetate dute scussade ch’a i pindulave di dutis lis bandis e un pâr di bregons ch’a vevin di vê viodût plui di une vuere. E no stin a tabaiâ des scarpis. Insumit, al faseve dûl nome a cjalâlu. Si tu vevis nome cent francs tal tacuin, minimo tu i devis cincuante. Se dopo i tu sintivis cemût ch’a ti diseve “Grassie” e ti cjalave cun chei voglins come par dîti “Tu mi âs salvât la vite…”, a ti vignive voie di dâi ancje chei altris cincuante.
A Udin al veve il so zîr e nol rivave mai a cjase cu lis sachetis vuedis. A la domenie po al rivave a Codroip tor nûf e mieze e al lave a metisi dongje de puarte dal domo. Al spietave la jessude de messe grande e po chê di messe ultime. Nol jere sfaçât; nol viarzeve neancje la bocje. Nol veve bisugne di fâ reclam. La int, a viodilu, no mancjave di lâi dongje e dâi une palanche.
Jessude dute la int de messe ultime e vênt finît di lavorâ, Gjovanin a si gjavave une sodisfazion, forsit la miôr de sô grame vite; al leve la di Galàs, a mangjâ. Al jentrave pal curtîl e po, par no meti in imbaraç i clients, al lave a metisi a taule ta che stanziute li che nol jere mai nissun. Dopo di vê siervît chei altris clients, Toni Galàs al lave di lui.
“E alore Gjovanin, un plat di tripis e mieç di neri, come al solit?”. “Sì, sì Toni, ma cence premure” al rispuindeve lui, e dentri di sè al finive il pinsîr. “Che tant il gjespui al tache a lis cuatri”.
Lu ai viodût ogni dì par plui di vincj agns, simpri compagn, po nol è plui vignût a poiâ la biciclete.
Agns dopo, tabaiant cuntun di Rivignan, al salte fûr che un puaret, ch’al lave a vore a Codroip ogni dì in biciclete, cuant che al è muart i àn cjatât sul libret, in pueste, plui di cincuante milions. Mi soi mitût a ridi e o ai pensât “Gjovanin, tu sês stât bulo a ingrumâju, ma ne vore mone a no gjoldiju!”

di Pauli Jacus  (IV3IAN)

5 coments:

Giovanni Nello Malisano ha detto...

une volte nd jere une vore di cristians che lavin a cirî la caritât. Mi visi che tal gno paîs a vevin lis lôr zornadis. La Joibe al passave un di Buie:il martars bambole e bamboloti; une volte al mês un Trasaghis. Chest mi faseve plui pore dai zingars. Un Friûl chest che cumò no si viôt plui. Sin viôt di piês. Brâf Pauli.

Giovanni Nello Malisano ha detto...
Questo commento è stato eliminato dall'autore.
Anonimo ha detto...

Pauli, tal gno pais e jere une che lave a pitocà a Udin, e cu le man slungjiade e contave che veve pierdut tre fis in russie,cuant dopo muarte ji an fat le utomie le an cjatade ilibade,e lis busis de cjase dutis colmis di rodui di cjartis di mil dai timps, pur se roseadis das pantianes e fur cors.Ma sa pensi ai dis nestris no sai ce dì,almancul lis sos palanchis no son lades a ingrassa il purcit a di chei altris. Ad ogni mut come cal dis Nelo ogni pais al veve i soi.Biele conte ancje parcè vere. Lussian

Galliano ha detto...

Il pitocâ in chei timps al jere une vore difondût. Mi ricuardi di vê viodût une tabele suntune parêt di cjase che diseve in talian:
"In questo paese è proibita la mendicità"
No sai cetant câs che i fasevin a chest consei, za che la miserie come la fam no à prudence.
Ben contade Pauli.

Anonimo ha detto...

Cinon te basse, tai agns subit daspò de seconde vuere, al passave cul so sacut simpri di miercus, za che i mulinârs a sieravin di lunis e di martars la int a scomençave a lâ a masanâ blave e forment tal mulin. Lui al cirive un pugn di farine di polente ch'a la meteve tun sacut misturant blancje e zale; pe farine di flôr al veve un sacut plui piçul ch'al jere simpri cuasi vueit, par vie che farine di fâ pan a 'nd jere une vore pocje. Bepi

O varès alc di dî

Ti sêstu visât di firmâti? :)