mercoledì 28 gennaio 2015

I Tartars


Insome cumò us conti la storie dai Tartars. A jerin doi fradis che a vivevin tal gno paîs fasint i faris e lavorant un pocje di tiere. A levin vie gubits; a aravin ancjemò cul cjaval, a tignivin dut mâl te lôr cjase. Un si vistive simpri cuntune mimetiche di paracadutist e chel altri simpri di blu, come i operaris di Mao; se al ploveve i bastave taiâ un sac di farine pal lât lunc e fâsi cussì un bon capucjo.
Alore jo ur fasevi cualchi scherç: une dì, jo che o vevi buteghe di alimentârs, o vevi radunât un dîs-cuindis gjats dai lôr dongje de farie che e cunfinave cu la mê buteghe e che e veve une barconete cence veri. Alore ai gjats ur davi ratais e lôr si passevin: chel cence un voli, chel cence une orele, il gjat ciçon de Comari… ducj li po…
Alore ur buti un petart e chei no ti scjampino un daûr di chel altri pe barconete? Zann zann zann
I fradis Tartars a molin martiel e incuin e a tachin a porconâ… jo o ridevi come un mat…
Une altre volte o fasevi cuei sbrudiot pal cjan te rimesse che e cunfine cul lôr ledanâr; o vevi un di chei fornei cu la bombule.
Di là dal barcon de rimesse Rico Tartar mi fâs: “Ce profum, Milio, ce preparistu di bon?”
E jo i disei che o vevi i moredôrs in cjase e che o preparavi par lôr.
Alore Rico Tartar al ûl di cerce. I passi un cop di sbrudiot par cjan e lui: “Ustiment! Buine cheste mignestre… isal ancje ardiel? Tegnimi in bande un plat… ti pai…”
O soi tornât chê altre dì di chês bandis; cumò o soi in pension e la buteghe e je stade vendude dal paron: jo o jeri dome in afit. I doi Tartars fratant a son muarts, puarets. A jerin plens di bêçs fasint la vite dai miserabii… tropis voltis no levino in bancje cu la damigjane plene di banconotis? La lôr cjase e je biele e ordenade, cumò. E je a stâ int foreste… a àn cambiât dut, barcons, puartis, piturât ben dut.
Dome doi particolârs mi ricuardin il passât: la insegne CAMPARI e la targhe MANISCALCO cul fier di cjaval: a son su la parêt di misdì de farie, sfantadis. No coventarès zontâ che la farie e je stade trasformade intune sorte di rimesse di chei forescj che a son cumò a stâ.

di Milio dai cjans

venerdì 23 gennaio 2015

Cocteau Twins su Netun (ma no il planet)

Un di chei grops vignûts fûr ta chê fauste stagjon che e jere chê de musiche alternative dai prins agns ’80, al ven de Scozie, di Falkirk: a son i “Cocteau Twins”. E propit i “Cocteau Twins” o ai voie di ricuardâ. Aromai a son passâts trente agns e jo o soi come chei vecjos che a disin: «Ai miei timps al jere dut miôr…». Par me la storie e tache cuntun viaç lungjonon di Udin fin a la citadine di Nettuno, plui in jù di Rome, ai 10 di avost di chel lontan 1985, cuant che i “dark”, ven a stâi chei che a levin daûr a chê musiche o mode alì, a jerin coionâts de int cussì dite regolâr; al jere il timp che lis fantatis a ziravin cui bregons strents a lis cjavilis e la permanent tai cjavei, e i fans dai “Duran Duran” a sameavin vignûts fûr dal “videoclip” di “Wild Boys”. Cuant che Jim Kerr, il cjantant dai “Simple Minds”, al jere une vore nomenât… sì, al samee che il stes non “Cocteau Twins” al vignidi fûr di un toc dai “Simple Minds”, ma la musiche no.
Dut ce che mi visi di chel viaç al è che o leievi dai “Urania” e che tal gno scompartiment une zovine alte e secje e veve ufiert il puest a une muinie. Jo stes, dut vistût di neri, no jeri trop distant dal sameâ un predi.
Rivât a Rome o vevi fat nome un piçul zirut dongje de stazion, mi jeri apene nacuart dal plan inclinât di un cuel e o jeri tornât indaûr par cjapâ il tren par Nettuno. No vevi il timp par esplorâ l’“Urbe” chê volte. La mê destinazion e jere il stadi dal “baseball” dulà che si davuelzeve la manifestazion “Rock Now Nettuno”.
Insome il gno vistît al jere neri: cjamese nere, scarpis “college”, gjachete nere in zessât regalade dal bon barbe mostacjon e bregons neris in acrilic come Geordie Walker (ghitarist di un grup clamât “Killing Joke”… cheste e je la citazion di une riviste che lu coionave…).
Veju… a son i “coatti” che a passin cuntune machine scuvierte e mi berlin alc e a sunin il “claxon”; a fasin cualchi sconzûr vintmi probabilmentri cjapât par pizighet. Ta chê volte al jere normâl che ti coionassin se tu jeris o tu sameavis un “dark”. Ma nô o crodevin di partignî a une sorte di clape esclusive: o scoltavin la musiche plui biele, plui ricercjade, o leievin lis poesiis dai Maledets, si vistivin cun mudis cjatadis sul cjast, tai vecjos bagais… o crodevin di jessi nô i miôr…
Veju… i “dark”! A rivin a piçui trops o di bessôi cui cjavei drets, cotonâts. Il soreli al bruse, l’asfalt al sbuente… jo mi giavi la gjachete. I “dark”, chei mostris, chei modernis “freaks” a rivin tal stadi cuasi che a fossin in devot piligrinaç. Jo o riduci a viodiju stracs e cence flât. Sì, mi rint simpri plui cont che ancje jo o fâs dal dut part di chê schirie alì: a son “dark” dal 1985, a amin la musiche, si vistissin cun pôc no come cumò che tal “rock” scûr e domine la mode des “boutiques” todescjis che a vendin viestis che a costin un voli dal cjâf!
I “Nadja” a vegnin de Ligurie e a fasin un bon “dark” talian. I inglês “Woodentops” a sunin un bon “rock” neopsichedelic cun cualchi olme di agns ’60. Invezit i “Pink Industry” di Jane Casey, sedusinte fantate, no mi plasin: e je masse stonade e la musiche eletroniche masse scoloride. Doi piçui zovins di Firenze, fantat e fantate, a son in prime rie e mi disin: «Ti piacciono “Hocteau Twins”?». O tachìn a tabaiâ; mi disin se o soi mat a vignî di cussì lontan. Dal Friûl profont, des fumatis che a inglotin i cjasâi… des blavis… dal Friûl di contadins e cjaçadôrs come gno pari che, vint savût che a cjase o ai 100 discs “dark” mi fâs: «Al sarès come se jo o ves 100 sclopis!». Jo o soi alì pal complès di Falkirk. Lussie mi veve telefonât dôs seris prime par visâmi dal conciert; e je une zovine piemontese che mi scrîf.
Su “Dear Heart” la cjantante Elizabeth Fraser e berle come se a stessin copant un purcit. Durant lis provis e à vaiût. E à lis gjambis pelosis.
Ce bielis cjançons! Ce bielis che a son “Musette and Drums” e “Sugar Hiccup”! Ma sul palc no son cui sa ce. E chê bobine cui suns di base…
O soi devant dal gno mito e no soi content; a un dât moment o varès miôr viodi chel mat di Julian Cope tal puest dai “Cocteau”. Soio deventât mat? Il miôr grop “wave/dark” britanic al è li devant di me e jo o fâs il slichignôs?
«Io Franco, lei Paola!» mi disin doi piçui romagnûi. A la fin dal spetacul o larìn insiemit a mangjâ une pize e o spietarìn il tren par Rome fin a lis 5 di matine.
«Tu mi parli di “Smiths” quando io cito “Cocteau Twins”?» al fâs un cotonât “dark” roman cui ocjâi. Come a disi che i nestris scozês a son suntun çocul plui alt rispiet ai plui famôs “Smiths”. A la fin dal conciert si sin incontrâts jo e Lussie; mi samee Laura, forsi pe muse di gnotul. Cui ise Laura? Laura e je la morose di Zuan, l’amì che mi à prestât la cassete origjinâl di “Head Over Heels”, l’album che mi à fat cognossi il grant grop.
Un gjornalist al veve scrit che e vignarà la dì che cualchi sienciât al scuvierzarà la relazion fra il nestri çurviel e i biei suns dai “Cocteau”, suns che a menin il scoltadôr come intune sorte di flabe, suns che a fasin svolâ su lis alis de fantasie. Al è un toc, “Otterley”, che cuant che lu scolti mi prodûs un fuart sintiment di amôr materni; in sotfont si sint il rumôr dal mâr e mi plâs tacâ la radio e metilu sù cjalant il tramont bande de vile dai conts cuant che il ros soreli si plate tra i cedris dal zardin. Cuant che Paolo, l’amì di gno pari e gno cunfinant mi dîs: «Guarda il tramonto: sembra un quadro cinese!».
Jo e Lussie o sin un di front di chel altri cuant che la sdrume di int e va vie. O ai fermât il timp… chest fotogram… chest fotogram lu ai metût te sachete. A son passâts cuasi 20 agns e il mont al è cambiât. I “Cocteau” no fasin vignî fûr un album dal 1996. No esistin plui. O ai ancjemò cualchi foto di un lôr conciert di Bologne dal ’86 e la ultime volte che ju ai viodûts al è stât a Milan dal ’94. Mi mancjin. Ma mi mancjin ancje chei timps, chei moments…
di Checo Tam

mercoledì 21 gennaio 2015

UFOs di îr e di vuê



E jere tor miezegnot e cundut che al fôs il mes di Avost le aghe dal canâl di irigazion e jere frede, glaçade di fâi vignî i grisui a Meni di Lene. Ben si intint s'a tu vâs discolç a dâ l'aghe a no tu puedis pretindi di sudâti la cjamese, massime di gnot. A chei timps là, pene finide la seconde vuere mondiâl, i stivâi di gome tu ju sumiavis e Meni cu la strache ch'al leve a durmî a nol veve nissune voie di sumiâ. Al veve pene viert il puartelon dal canâl par fâ jentrà la aghe tal cjamp di menighe, cuant che alçant il cjâf al viôt trê balis di lûs ch'a i vegnin incuintri e si fermin a plomp parsore di lui. Dî ch'a i à cjapât a colp une sbigule, un spali di fâse tes braghessis al è dome un toc di veretât, parcè che Meni a nol è stât plui bon di movisi e cun di plui dai pîts, ancje il sanc tes venis i veve glaçât. Nome i voi a àn rivât ancjemò a viodi i zîrs di inzirli che lis trê balis i àn fat parsore il cjâf e ator pal cjamp, prin di scjampâ vie tant che il folc. Pene ch'a i à tornât un pôc di calôr tes venis, cui bregons plens e bagnâts, al è stât dut un cjapâ la biciclete e pedalâ tant che un sfolmenât viers cjase. E tal doman: contâle o no contâle, cul risi di fâsi cjoli pal cûl par dute la vite. Cui bregons curts al monte in biciclete e al torne tal Palangon, il cjamp parsore la Stradalte, si ferme su la sgjavine e al dâ un voglade ator, al viôt trê maglis scuris, ancjemò cualchi pas indenant e i comparissin trê grancj cerclis te mediche brusade. Inalore cumò al podeve ancje contâle, che forsit cualchidun i varès crodût. 

La Stradalte! A le àn clamade in ducj i mûts: Flaminee, Ongjarese, Napoleoniche, ma Stradalte al è il non ch’al è restât salt tal cjâf dai furlans di mieç, parcè che li e je la linie da lis risultivis che e divît lis tieris altis da lis tieris bassis. Val a dì: Listize, Mortean, Bicinins, Antognan fin a Palme a saressin lis tieris altis, là che Bertiûl, Talmassons, Cjasteons di Strade, Morsan e Gonârs a saressin lis tieris bassis, dulà che une volte a scomençavin i palûts, prime da lis bonifichis dai prins agns dal 1900. Su chê strade li a son passadis, secont cualchidun, dutis lis plui grandis disgraciis ch’al vedi viodût il Friûl, a scomençâ da la concuiste dai Romans, lis invasions dai Visigôts, Uns cun Atile, Ostrogôts, Langobarts, Avars, Carli il Grant, Republiche di Vignesie, e i Turcs fin a rivâ a che di Napoleon ch’al à volût lassai ancje il so non. 

E jere une strade militâr che e leve di Soreli Jevât viers Soreli Bonât e al contrari; ce podevino domandâ di miôr i invasôrs? Si capis inalore che a traviersâle al jere simpri un riscjo fintremai ai timps di vuê, ancje se daspò che vevin fat dute une schirie di tarondis a jerin un grum di mês che la strade a no faseve plui fevelâ di sè. A rompi il cidinôr, a metât Fevrâr dal 2012, al è capitât un câs une vore curiôs ch’al à fât pensâ a une gnove invasion, cheste volte nuie mancul che de bande dal cîl. A si conte che un zovin di Codroip tornant cjase di Palme in machine viers miezegnot, al vedi viodût propri dongje une grande taronde, une filze di machinis fermis e daspò dismontât, si è cjatât denant une sacume di om alt cuasi cuatri metris che al cjaminave spesseant su l’ôr de strade, un pipinat plen di muscui cul cjâf a forme di coni çoncjât, une sorte di omenon vert insume, ch’al è sparît talpinant cun lis sôs gjambonis lungjis e stuartis cence fâsi cjapâ e nancje fotografâ. A la domande cemût mai nissun a lu à fotografât cun ducj i imprescj ch’o vin tes sachetis, e àn rispuindût che i telefonins a no lavoravin, e jerin come blocâts. Il câs al à fât scjas tant di finî sui gjornâi e fintremai in television, ma l’omenon a no si è fât plui viodi lassant ducj in te curiositât plui grande. Cemût jerial fât di bon, e ce ch’al jere vignût a fâ, al è restât un misteri, tant che un gno nevôt che al vîf a Rome, ma che al cognòs ben i nestris paîs e dulintor, savût il câs, al à cirût di figurâlu denant dal Municipi di Mortean come te figure. Nome cumò a mi ven iniment ch’al podarès jessi stât un di chei pâi ripetidôrs de rêt celulâr, plens di orelis e altris argagns, che stufât di sintî dutis lis monadis ch’a si conte la int par telefon, al vedi displantadis lis fondis de tiere e al sedi scjampât vie par simpri.
di Bepi Zefon


lunedì 19 gennaio 2015

L'om su la casse

Ta chel frêt Dicembar l’aiar al sivilave fuart, al urlave: un berli spaventôs, come di tancj spirts.
A un dât moment un dai scûrs dal coredôr si spalancà fasint vierzi ancje la puarte de cjamarute dulà che la piçule Dine e durmive cun sô sûr.
Il pai al veve sintût il rumôr dai scûrs che a sbatevin e si jere jevât sù. Lât jù abàs al tornà disore subit dopo: al veve ricuperât un vecjo filistrin par peâ ben i scûrs par dentri. Po al veve rinfrancjât lis frutis apene dismotis e al jere tornât te sô cjamare. La sûr e tornà a indurmidîsi daurman e invezit Dine e restà tal inprin dismote ancje se ogni tant i sameave di jentrâ tal ream dai insiums… i pareve che alc le tiràs dentri opûr e rivave cuasi a vuidâ jê lis senis che si insumiave… a un ciert pont e ve come un spac e si sveà dal dut!
Tor cuatri o cinc di matine il pai al tornà te stanzie des frutis e si sentà su la casse che e contignive i vistîts, posizionade dongje dal mûr par da pîts dal grant jet. Di fûr simpri un aiaron di sgrisulâsi.
Dine e veve cucât fûr dai linzûi bande dal pai che al comparive come une sacume scure; i sameave che al durmìs poiât cuintri il mûr ancje se no si sintive il so respîr… no si sintive nie, forsi a cause di chel esercit di spirts che al berlave di fûr. La sûr intant e continuave a durmî un sium profont.
Al cricâ dal dì un fregul di lûs al jere jentrât te cjamare a inluminâ un pôc il pai che al stave ancjemò sentât su la casse.
Dine no rivave propit a durmî; tornant a cucâ fûr dai linzûi e podè viodi miôr e si nacuarzè che l’om su la casse nol jere il pai ma… un zovin scognossût! Al veve une gjachete sul verdon e su la muse si notavin un pâr di finis mostacjis.
Lu veve cjalât ben: la muse di chel om i jere restade ben imprimude ma dopo, pe pôre, e jere tornade a platâsi sot di cuviertis e capots. Di fûr a vevin tacât a cjantâ i gjâi e planc planc l’aiaron al stave calant.
Alore la frute e ve ancjemò il coragjo di tornâ a cjalâ bande de casse ma l’om al jere sparît! Po e sintì dai pas… al stave rivant cualchidun… cheste volte al jere propit il pai. Jê i domandà se al veve viodût chel om che al veve fat vegle prime de albe ma lui al tacà a ridi disint a la fie che nol jere nissun om e che e çavariave. Intant ancje la sûr si jere sveade: e sintive Dine che e tabaiave cul pai di chel om che al jere jentrât e si jere spauride. Il pai ur riduçà, ur disè di stâ cuietis e al le jù abàs. Dopo ve fat i lavôrs te stale lui al veve di fâ un salt fin in centri al paîs, li dal fari, par fâsi fâ un gnûf clostri par chel barcon che si spalancave a ogni bugade di aiar.
“No si po tignî fer un barcon cuntun filistrin de Vuere dal Cuindis” dissal a la sô femine.

Agns dopo Dine, vignude fantate, e jere lade a cjatâ une cusine plui vecje di jê intun altri paîs; bevint il cafè e ve mût di cjalâ lis fotografiis di matrimoni di chê femine: a jerin vecjis di cualchi an.
A un ciert pont i vignirin i sgrisui parcè che intune fotografie e viodè o e crodè di viodi l’om che ta chê sere di aiaron di agns prime si jere sentât a fâi vegle su la casse. E cjalà ben ben chê foto… sì, al jere lui… ancje a distance di cualchi an Dine no si jere dismenteade la muse di chel om che sô cusine i disè jessi un barbe muart in vuere.
di Milio dai cjans

sabato 17 gennaio 2015

Un temporâl estîf


Al jere un daspò misdì d’Istât, la calme atmosfere e imbombave la pesantece dal ambient. Chê part di mont contornade di montagnis e jere statiche, sicu sospindude tal vueit, no si moveve un fros, no coreve une bavesele di aiar. Lis besteutis dal curtîl cu la lôr sensibil telepatie a ziravin confusionadis e instupididis, rompint il cidinôr che al veve cjapât pît dapardut, biacemai a spietavin che al sucedès alc. 

I oms si movevin cun premure metint a sotet i scjalârs cjamâts cu la racuelte, la mandrie cence ordin si leve sotetant li che podeve, lis feminis di buride a sieravin scûrs, barcons e puartis, la canaie cui siei - siò..siò.. - e cirive di logâ la clocje cui poleçuts, che si jerin metûts tal broili a becuçà jerbutis, intant la none e stiçave lis boris tal fogolâr movint i lavris modulant des preieris.

Lenti sù, si viodeve il cercli des monts coronant la valade, bastave cjalâlis par capî che al jere un spetacul de nature, sore di lôr il cîl si jere fluscât menaçôs, scurint chel côl di piere, che e cjapave il colôr de perturbazion. Il scûr cidinôr al faseve pôre.

Dibot e rivà la montafin, gruessis gotis a discjadenarin un temporâl che al mandave jù aghe a palotis, sdrumant man man dut chel che nol resisteve ae sô fuarce, i tons e i lamps si incrosavin come spadis belicosis, ognidun difindint il so. La nature e meteve in at l’incrosament dai elements, sfogant la sô bulidure di stagjon estive. 

La int dentri cjase, e cjalave pinsirose cuantificant i pussibii dams al colt, soredut ai vignâi che a varessin patît in cheste ocasion. Lis boris de none a vignivin metudis sore un lamarin disot de lobie, la viele e pogneve parsore un ramut di ulîf benedet che si brusave, intant che un fîl di fum si alçave sicu volint rivâ dret al Diu des sôs preieris... : - Sante Barbure e Sant Simon, che nus vuardin di fûc e di ton, di ton e di saete, Sante Barbure benedete.

E cussì sicu dut chel che al scomençave, tal ben o tal mâl al finive, in chest câs ancje la burascje e le pierdint la sô spavalde sigurece iniziâl. La vite come simpri si le ripiant, dreçant il stuart, comedant il rot e vaint il pierdût. I rais dal soreli a tornarin a fâsi viodi slambrant i za debii nui. Tai curtîi e tes cjasis, lis mans e lis azions si metevin di gnûf in vore.
di Galliano di Buenos Aires

venerdì 16 gennaio 2015

Pantianutis


Al oreve puartâ la Rai sul telefonut chel politic panzon cu la muse plene di bielecis; e la sô amie bionde, che e comandave il ministeri di no sai ce, e veve il desideri di traghetâ dute la int tal 2.0.
Ma lôr no vevin fat i conts cuntune tremende tampieste solâr e cul bloc dai imprescj eletromagnetics di dut il mont civilizât. Si imagjinaiso i avions che a colavin? I computers di dut il mont in tilt… i frigorifars vuasts, la Mercedes di Hamilton che e leve fûr strade a Abu Dhabi par colpe de eletroniche vignude a mancjâ intune curve… i siorats blocâts su lis teleferichis a Sant Moritz, la portaerei USS Reagan isolade tal mieç dal mâr ocean a larc di Diego Garcia… e dut a cause di un impuls… di une robe vignude dal soreli…

Ma Mahmoud Ben Ali nol veve di chei problemis. Partît di Timbuctù cul so fidêl dromedari plen di vivars e di aghe… al podeve afrontâ il desert… al veve ancje des trapulis e al varès podût caturâ cualchi pantianute di chês cu lis çatis daûr lungjis. Sì, Mahmoud nol veve vût casins par vie di chel impuls… lui si sbateve lis balotis.
di Checo Tam

mercoledì 14 gennaio 2015

Planets



«A e lade, capissistu? La-de!» a si traeve vie la Tiere, vaint poiade al bancon da l'Univiers, il bar preferît dai planets di dute le Galassie.
«Oh, daimo, Tiere – al cirive di confuartâle Mercuri – al è sucedût a ducj di vê incomprensions cui siei satelits!»
«Tu tu disis cussì dome parcé che no tu ju âs – e rispuindè mareade la Tiere – tu no tu sâs tant ch'a si patìs: cheste volte la Lune a no tornarà, i lu sint! A domandarà il divorzi!»
«Sumo, sumo, no stâ a fâ une tragedie – si impaçà Uran – tu sâs in ce maniere ch'a e fate, a è cussì... lunatiche!»
«Propite chel che mi plâs di plui di jê...» e disè la Tiere cun voli inmagât.
«A funzione cussì: – al tacà Saturni cirint di menâ il discors di une altre bande – al è une vore plui facil barufâ cun chei chi vin plui dongje, cun chei chi tignin plui di cont. E al sucêt propite parcé che a nus stan plui dongje: l'orbite da lis nestris debilecis a jentre facilmentri in colision cun lis debilecis di chei altris e...»
«E a fâs mâl!» e sunsurà la Tiere.
«Sì, bon, ma tu no tu âs di butâti jù, cumò! – al cirì di intervegnî Venere cun dolçôr – L'Amôr al è fat cussì: al è la fuarce ch'e governe l'Univiers!»
«Aaah no stâ a tabaiâmi dal Amôr – e berlâ la Tiere – l'Amôr al covente dome a semplificâ lis rimis dai poets, par gnò cont!»
Nissun di chei altris planets al olsà plui dî cic; par cumò e lave cussì. A coventave cualchi ere gjeologjiche, ma ancje la Tiere e varès tacât a crodi al Amôr.
di Jacum Trevisan

lunedì 12 gennaio 2015

Particulis subatomichis

Insome a jerin lâts ta chel teatri, Toni e Jacum, sì, lôr, a viodi chel strani spetacul moderni.
Une zovine intune grande scjaipule e jere voluçade di un dîs lungjis galis di stofe e dai volontaris dal public a tindevin lis lungjis galis e ogni tant jê si moveve e e dave un tîr e cualchidun al molave la prese… chest par cirî di descrivi une teorie subatomiche. Tal ambient si sintive une “musiche” di aiar misturât a rumôr di trapano. Ce monadis, o disarês voaltris. Eh, no! La zovine e jere crote!
Za Toni, cjalantle, le veve paragonade a alc di grêc, a ûs la Papas inte Odissee TV, o a la Mangano, Calliope, Nausicaa… sì, chês li po…
Bon, finît il spetacul al jere il party dai inteletuâi e dai inteletualoits e ancje Toni e Jacum si jerin fermâts a la fieste. Sorprese: la zovine artiste si jere mitude a balâ, cheste volte vistude.
Toni alore al fasè une bulade metintsi a balâ devant di jê come il miôr Toni Manero.
Però di lì a pôc al rive un coçon cui ocjâi a ûs chei di Nicola Di Bari, vistût di nere piel… sì mo, chei li… chei che no podês viodi nancje voaltris…
Il coçonat al veve dât un sburt a Toni par metisi lui a balâ devant de artiste. Lui! Po si sa! Alore e jere tacade la barufe che, chê discjadenade di Francis Begbie in “Trainspotting”, no jere nie a confront. Jacum e Toni a vignirin agredîts di milante!
Par disgracie dal nestri eroi chel maladet coçonat al jere ancje palestrât e cussì puar Toni si cjatà intun jet di ospedâl dut macolât di botis. Nol saveve nuie di ce fin che al veve fat l’amì Jacum.
Ma…sorprese des sorpresis… Toni al viodè jentrâ inte cjamarute la zovine artiste dal teatri… e i veve puartât une rose… i diseve alc… ma lui al jere sort… i jere rivade une butilie tal cjâf juste li de orele çampe e un pugn i veve sfolmenât la orele drete… e cussì nol sintive nuie Toni… e dopo la zovine e jere sparide, forsi smaterializade tes particulis subatomichis e lui al fo voluçât des tenebris ma parsore e jere… une lûs! Al fo tirât sù di chê lûs e si cjatà denant come un figure di agnul, alc come un spirt che… al veve la muse di chê fantate!
Si tornà a ricjapâ daspò di cualchi dì. Pene sveât al veve domandât di Jacum, de zovine, di sô mari e parfin di Nicola di Bari e Toni Manero, sì che i miedis lu vevin tornât a indurmidî, par precauzion, ma a vevin disniçât la prognosi. 
Lu compagnà cjase, cun inmò cualchi vuès di comedâ, propit Jacum.  Di une orele inmò nol sintive ben, di chê altre al sintive a tuttoandare une cjançon dai agns otante, brute, di chês che tal puest de batarie a dopravin chês drum machine orendis. I someave un toc dai pet shop boys, ma pene che si concentrave par sintî chel rumôr dentri dal cjârneli i doleve dut e al tacave a viodi tarlupulis di ducj i colôrs, altri che particulis subatomichis.

La fantate dal teatri i veve lassât un numar di telefon e un biliet scrit intune lenghe che nol capive. Lui nol cirì nancje di lei, ni la clamà. No si sa cemût al vignî a savê che il spetacul, il stes, al zirave inmò ator pe Italie, e nol jere lontan. Al volè fâsi compagnâ di Jacum, e si presentarin in doi, lui inmò cuntun braç inzessât, li de fantate. No si viodeve ator nissun Nicola di Bari, chest colp, ma Toni al jere come mut. Si sint come un eletron. Jacum un neutron e la fantate il proton che lu tire a sè. Al passe un biel pôc prin che al rivàs a dî une peraule: "Ti piacciono più i Pet Shop Boys o Nicola di Bari?" i domandà prin di voltà la schene e cori vie.


di Milio dai cjans

venerdì 9 gennaio 2015

Met un altri tai

Doi a zero e veve pierdût. Come la scuadre dal paîs: doi a zero ancje chê. E ce magon, simpri pierdi…
Nol jere tart, e fûr aromai si jere fat za scûr, ancjemò prime che al les a mont il soreli, che  in chê dì nissun al veve viodût.
Intune zornade, po dopo, indulà che al veve plot dut il timp, jenfri une fumate penze che a gloteve mûrs, cjasis, stradis e dute la int su la strade. Se tu jeris ator pal paîs, e no tu volevis lâ a cjase, par parâti dal frêt, tu podevis jentrâ dome intune ostarie.
“Met un  tai”. Chês a jerin stadis lis unichis peraulis che Bruno al veve fat jessi de sô bocje di cuant che al jere jentrât dentri te ostarie. Puar Bruno cui chei bregons, che al pareve di un moment a chel altri vessin di sclopâ cun dute la sô panze e, cuntun peçot di cjamese che al jere plui di dôs setemanis, fieste e dîs di vore, che al tignive intor, al someave un biât.
“Met un altri tai”, cussì Bruno, a pene svuedade, la prime tace, come un pampagal, al veve ripetût une altre volte, cul voli pontât tal schermi de television, sistemade tal cjanton dal locâl, dut al dì impiade ancje se no le cjalave nissun. E bevût le seconde tace, di gnûf, cjalant in muse l’ostîr al veve ripetût: “met un altri tai”.
E vie indenant, cidin come che al jere e, cence premure, ancje se e jere passade la ore di cene, Bruno no si fermave plui. Cun dute la sô calme, al svuedave lis tacis une daûr chê altre, vierzint la bocje par dîsi dome  chês cuatri peraulis: “met un altri tai”,
E jere pardabon une domenie di mierde. Une domenie propit grise, sglonfe di ploie,  cun dut il pais glotût de fumate e, po, cun chel doi a zero patît che tu lu viodevis stampât ancje su la muse di ducj i cristians dentri te buteghe. Someave di jessi propit finîts tal paîs des disgraciis.
Propit ce domenie ledrose, une zornade che une volte, invezit, e jere fieste par ducj. Oms, feminis, fantats e fantatis, un plui braurin di chel altri, soredut chês fantatis o chei fantats che a screavin cualchi vistît par lâ a messe. Chê si, che a jere pardabon une vere fieste: la fieste di dut il paîs, in dulà che a scampanotavin lis cjampanis e ducj si fasevin plui biei.
A chest al pensave Bruno tra un tai e chel altri, ma soredut al pensave, cuntune vore di nostalgjie, a chês zornadis di fieste là che ancje lui al onorave chel Diu  che di un piès nol preave plui, no si sa se parcè che nol cjatave il timp o parcè che chel Diu si jere dismenteât di lui.
“Met un altri  tai”, cussì Bruno, clamant l’ostîr, al veve di gnûf ordenât la sô tace di blanc. E intant  su la sô muse, dute rosse, cui sa se pal frêt cjapât vie pal dì, o pes masse tacis bevudis, e sbrissavin jù lagrimis penzis, tant penzis che al someave vessin sgarfât su la piel un riûl.
Mario sentât di chê altre bande de ostarie, viodintlu cussì ingropât e cu la muse strafonde i domande: “Bruno ti ise vignude la cjoche vaiote?”
Ma Bruno nol sintive lis sôs peraulis, al jere jentrât intun altri mont. I pareve che chel Diu che inte sô vite al veve simpri cirût, smenteât, blestemât, preât fos vignût a bevi un tai, li, cun lui.

“Ostîr met altris doi tais, un par me e un par lui. Par fortune… nol va  dome tes glesiis, je propit vere al è par dut e cui sa che vuê nol sedi vignût culì propit par me. E cun domenie une altre solfe: mi vistarai di fieste.” 
di Nello Malisano

mercoledì 7 gennaio 2015

Pujesis

(Edward Hopper, 1936 - Bubley platform)


Ta chel setembar dal ’82, cuant che e stave rivant la prime grande invasion di pujesis, Toni al jere cun so barbe bande dal pin di Lauçà a gjavâ gjardon tun cjamp. Ma il so cjâf al jere intun altri lûc… si pensave a cuant che, durant la ultime purcission dediade a la Madone, une bielissime fantate more lu veve cjalât. Une funzion in grant stîl, cul paggetto, il chierichetto, la bande e un grant arome di incens. La fantacine lu veve cjalât, lui, un anonim ocjalon che a scuele a jerin dome che lu coionavin.
La fantate no le veve viodude plui: forsi e jere vignude di un altri paîs a la messe… ma intant lui si jere inamorât!
Tal cjamp so barbe i deve dai conseis e i diseve alc come… “O soi passât ancje jo, ancje jo o pensavi cussì, ma lasse pierdi i insiums… cul biel no tu mangjis… tu cjatarâs une zovine brave par fâti une famee… pense a la fie di Nives…”
No, no… lui nol oreve la fie di Nives, cu la muse rosse come un cjapon… i plaseve la fantate more.

Passâts i agns une dì Toni si cjate in stazion des curieris a Udin e su la bancjine dongje de sô cui ti viodial? La fantate more! E jere ancjemò plui biele di chê volte de purcission… e varà vût 18/19 agns. Il biel al jere che la dì dopo lui al sarès partît militâr in Basse Italie. Toni alore al pensà: “Graziis, bon Diu, tu mi âs fat il regâl di tornâ a viodile prime di partî pe naie… tu mi âs dât la oportunitât di cognossile… ma cemût puedio tacâ boton? Domandâi la ore? No, masse sempliç… ispirimi, bon Diu…”
Ma ta chel ve rivâ su la bancjine un biel fantat, cul codin a ûs Miguel Bosè, i jeans a tubo, i stivalets camperos e un gjacon di corean… chel zovin al busse la fantate more, le cjape a braceto e al monte cun jê su la curiere par Cjarpenêt a pene rivade ta chel moment…
di Checo Tam

venerdì 2 gennaio 2015

Refusion



Il siôr Jurai Nemec al veve pierdût il so tacuin, dismenteantlu intune cabine telefoniche di Portsmouth, in Ingletiere. Lu veve cirût di ogni bande, ma il tacuin al someave sfantât tal nuie. Al restà straneât cuant, un an dopo, i sunarin ae puarte di cjase sul cricâ dal dì: sul netepîts al cjatà il so tacuin. Dentri al jere dut come che lu veve lassât, cun in zonte une rifusion di 45 sterlinis e un biliet di scusis: “I ai pensât a lunc parsore. Mi displâs, i vorès no vêlu mai cjapât.”
Il siôr Jurai Nemec al zure di vê sintût un sgrisul cori jù pe schene.
di Jacum Trevisan