giovedì 7 gennaio 2016

Contis curtis a Sclaunic!

Chest 2016 il vuestri Ostîr al scomence cuntune vore di iniziativis e ve chi, la prime, che e je inmaneade dal Circul Culturâl e Ricreatîf LA PIPINATE di Sclaunic, ma che e à come jutori nuiemancul che la nestre ostarie, fuarte di famei e berlon. Di ce si tratie?
Un spetacul di contis curtis par presentâ i doi libris dal Ostîr, par fâ cualchi cjacare su la narative curte, par sintî un pocje di musiche... viodi cualchi disen, forsit cualchi fotografie... insome, dut fûr che une presentazion noiose.
Chi parsore o vês la locandine in jpg di scjamâ, e se o volês sparniçâ la robe ator, ve chi la pagjine dal event facebook dulà che si pues fâ i invîts e dulâ che si cjataràn dutis lis gnovis sul event.
Ma nô us lassin 10 bogns motîfs par vignî a Sclaunic il 22 di Zenâr:
  1. Si presentarâ il libri Contis di famee, cun il nestri berlon de ostarie, Michêl, che nus regalarà une performance... eroiche!
  2. Si presentarà ancje Soreli jevât a mont, e magari o scuvierzarin ce che a son chescj benedets yokai, e cemût che si scrîf un haiku par furlan, e soredut il nestri famei, Checo, nus leiarà pe prime volte in public une conte dal libri che al à vinçût il San Simon. Robis di... insumiâsi!
  3. Luca Pagot, from Pipinate, al stiçarà il vuestri ostîr a disvelâ cemût che si scrîf une conte di famee e cemût che i è saltât tal cjâf di lâ a cirî gnot in Gjapon.
  4. O varin l'onôr, drete drete from Sclaunic, di vê une letore, Alice Passone, che no dome e sarà di jutori a berlon e famei, ma nus leiarà une conte... regâl!
  5. Si podaràn viodi i disens origjinâi de cuviertine dal libri di Soreli jevât a mont, che a son ancje un tichinin incuietants
  6. Si podarà sintî un duo che za dal non al è dut un programe e che al à il disc gnûf che al sta par vignî fûr: In 2 rive no tocje a saràn i responsabii dai incomuts musicâi
  7. Si podarà scoltâ une conte inedite scrite di pueste par la serade che e cjacare di Sclaunic, e tire fûr un personaç storic dal paîs e forsit... us fasarà pôre!
  8. Al sarà tal public un contecurtâr che al ven di lontan e che al è in patrie par cualchi dì: Nello Malisano, fantats, in cjar e vues! E o contìn di viodi ancje cualchi altri contecurtâr...
  9. Forsit lis contis ineditis a saràn dôs...
  10. In gracie dal Circul Culturâl, nol vignarà permetût di lassâsi come cjans...
Insome... cemût mancjâ? 
E ve chi, par cui che al à voie lis robis cuntun pocje di uficialitât, ancje il comunicât stampe de robe.


Presentazion dai libris

"Contis di Famee"
(Ed. Kappa vu 2015)

"Soreli jevât a mont"
(Ed. Forum, 2015)

di Raffaele Serafini

Canoniche di Sclaunic - Vie San Giovanni Bosco, 9
Listize (UD)
Vinars ai 22 di Zenâr 2016 - aes 8 e mieze sot sere


Il Circul Culturâa e Ricreatîf "La Pipinate" di Sclaunic, cu la poie de ostarie leterarie virtuâl Contecurte, al inmanee un spetacul di contis curtis par presentâ i lavôrs di narative in lenghe furlane dal so compaesan Raffaele Serafini, autôr di "Contis di famee" (ed. Kappa vu, 2015) e "Soreli jevât a mont" (Ed. Forum, 2015) editâts ducj i doi in tal mês di Otubar dal an passât.
I doi libris a son racueltis di contis, une vore diferents in tai contignûts. Contis di famee, finalist dal Premi San Simon di Codroip tal 2014, al cjape sù lis sôs storiis di un arbul gjenealogjic di une famee dal Friûl di mieç, contantlis in maniere origjinâl e slontanantsi dai stereotips de furlanitât; Soreli jevât a mont, invezit, al jentre di brut intal mont de fantasie e de internazionalitât, lant a cjoli lis sugjestions de mitologjie e poesie gjaponese (yōkai e haiku) e intiessint une trame fate sù ator di lûcs e personaçs dal Friûl mancul cognossût (di chei che a van di sfros a lis striis, dai puescj maraveôs ai personaçs innomenâts).
L'event si davuelzarà inte sale de Canoniche di Sclaunic. Al cjacararà cul autôr Luca Pagot e al sarà compit dal estri di Checo Tam, Michele Londero e Alice Passone proviodi a une leture seniche dai tocs. A inricji la serade e sarà ancje la musiche dai In 2 rive no tocje.
Ae fin de serade e vignarà lete une conte inedite, ambientade a Sclaunic, che no je dentri dai libris e e je stade scrite pe ocasion.

Jentrade di rive jù, ma… come che dîs la locandine, no si à di lassâsi come cjans!

7 coments:

Galliano ha detto...

Tancj auguris pal incuintri di vinars 22 di Zenâr, o doi par scontât che sarà une serade alc e ce.

Anonimo ha detto...

Nelo, o ai let ch'a tu vâs a Sclaunic pal spetacul di Contis di famee e Soreli jevât a mont, e par no "lassâsi come cjans" al sarà di sigûr "alc di mandâ ju par bocje". Po ben insiemi cun Gelo, Checo e ducj chei altris no stait dismenteâsi di bevi un tai a la salût di ducj i contecurtârs ch'a no son presints, soredut par chei tal forest ch'a no son podûts vignî pe distance. Bepi

Anonimo ha detto...

Galliano o stoi leint il to libri che mal àn mandât di Tresesin. Graciis! Une vore biel. Al à dome un difiet: al è stampât masse in piçul. Tu sês par dabon brâf e un om di culture. La fieste a Sclunic? E sarà di sigûr une biele sierade.
Nello Malisano

Anonimo ha detto...

Bepi, dome un tai? Se al è bon ancje une cjoche.
Nello Malisano

Anonimo ha detto...

Nelo, no vorès vê su la cussience la to patente... Bepi

gelo stellato ha detto...

ben po, ben po... cuietaisi voaltris doi, contecurtârs a distance, che no podîs bevi masse... o vîs un compit di fa. :)

Anonimo ha detto...

Po ben cuant che il sorestant al dispon, i sotans a àn nome di sometisi e cuietâsi! Se po il sorestant al è un Ostîr e un Salvadeat a si à di rindisi e vonde. Mandi Gelo, Bepi

O varès alc di dî

Ti sêstu visât di firmâti? :)