martedì 2 febbraio 2016

Contecurte Day - Un struc

O vin lassât passâ un cualchi dì parcè che o jerin stracs e parcè che l'Ostîr al veve di finî di lavâ i plats (e... no, no je une batude) ma e je rivade l'ore di contâ alc a ducj chei che a jerin e a chei che no jerin dal prin grant Contecurte day, che al à incoronât chel che al veve di jessi il prin Cont des Contis e invezit a nol è stât.

Ma anin par ordin!
Si scomence a cjase dal Ostîr, in siet di lôr intune cusine che e rive a malapene a tignî dentri in cuatri, in pratiche come in galere. Salam e ardielut, muset, fasui, bistechis, panzete, vin sandro, bire, formadi e marmelade di pevaroncin.. Zontait un bongo une ghitare e lis cjampanis e us lassìn imagjinâ cemût che a son stadis lis leturis di prove e cemût mai che il trop de Ostarie, (Ostîr, Famei, Berlon, Cjantôr, Camarele e aiutants) al è rivât un tichinin tardut ae serade.
Juste par scuvierzi che:
a) no si rivave a fâ funzionâ i microfonis
b) 'nd jere plui int che cjadreis
c) ducj chei che a àn dite che a vignivin su facebook a son vignût pardabon!
Nuie pôre, dopo vê fat funzionâ dut, ve che l'ostîr - in version codin di nutrie e ocjai di farc e golarine furbe - par someâ plui inteligjent (tentatîf miseramentri falît cuant che dopo doi minûts i da de caramele ae camarele), insome, ve che si tache.

E si tache subit cun la formule de gare che e viôt lis contis sfidâsi a trê par volte, lete ognidune di un dai trê nestris letôrs, in forme plui che mai, e compagnadis de ghitare dal nestri Cjantôr, ae so prime aparizion in Ostarie, e che o crodin propit di scugnî assumi par lis prossimis voltis (ancje se al à cualchi dificoltât a fâ il viers de simie...)
Pobon, di dî al è che, la modalitât di votâ e je avanzadissime, doprant tecnologjiis che neancje al parlament interstellâr dal planet Apophis66. Velis chi che lis podês viodi, cui colôrs rose (par il famei), zâl, (par la Camarele) e vert (par il Berlon).
E al è di dî anche che nissun dai letôrs al saveve ce conte che i tocjave, ma al veve di pescjâssale intal scubulot de ostarie, che al jere plen di... contis!

Sì, parcè che a son stadis lis contis, lis veris protagonistis de serade.
18 contis di gjenars e stii une vore diferents, che lânt daûr dal sortegjo si son sfidadis, contant ancje su la braure dal letôr che i capitave e no ultime de fortune, che un al pense di no, ma invezit, pense se il cjantôr si dismentee di sunâ il so toc, o se la cjampane dal ostîr i cole il batecul, o se un frut al vai juste dilunc dal moment di pathos... insome, il biele da la direte.

E dopo vêus fat viodi i nestris letôrs in vore, a vin di lassâus ancje, e a chest pont al è oblic, i nons di chei che si son sfidâts, e lu fasin disvelant il tabelon des contis che al mostre cemût che si son disvilupadis lis sfidis.
 



E par chei che a àn voie di lei ve chi che o lassin non e conte dai partecipants e a cjapin la ocasion di saludâ e rigraziâ ducj, parcè che cence contecurtârs l'event nol sarès stât cussì ben jessût.
1 Pablo Gortan Il re dai simiots
2 Checo Tam La sentinele
3 Mariute La tenerece
4 Nello Malisano Il paradîs dai puars
5 Laurin Zuan Nardins SIP
6 Stiefin Morat La carote
7 Ivano Urli La ore di religjon
8 Gianfranco Pellegrini Fenomenologjis de disrealizazion mediatiche
9 Tiziana Novello Rogazions 1944
10 Bepi Zefon Checo cjastron
11 Luca Bellomo La gjaline
12 Christian Romanini La strie di Basandiele
13 Raffaele Serafini Cjampanili
14 Jaio Furlanâr Le cjice di Line
15 Pauli Jacuss Il crucifìs carulît
16 Carli Pup In vuaite
17 Jacum Trevisan Jackpot cosmic
18 Galliano di Buenos Aires Vencolade

E dopo, ce dî?
Nuie, che i prins trê, il vuestri Ostîr cuntune conte che e viodeve i cjampanii a scjampâ dai lôr paîs, Nello Malisano cuntune conte che e cjacare di un paradîs di puars e soredut Mariute, la gnove Contesse des Contis, contecurtare rivade di pôc, e uniche femine in gare, che e à tirât fûr dute la tenerece dai furlans, insome, chescj trê a no son lâts cjase a mans vueidis, ma in gracie dal agriturism Pituel di Talmassons a àn cjapât un zei di salam, luianie, vin, muset e altre mangjative. Al jere ancje il premi par la conte ultime rivade, ma sicome al jere rivât a Galliano, e al jere un muset di spedî a Baires, sal mangjarâ l'Ostîr (cul permes di Galliano, si intint)
La gare, ae fin, e je stade dome une biele scuse par rindi interessante la serade, che insome, fâ restâ li sentâts, o inpins, otante di lôr cence stufâsi masse, nol è robe tant facile, e lis contis a son rivadis in cheste imprese.
O zontin un ringraciament a Venusia dal sportel di Listize, pal jutori te organizazion, il Sindic Gjeremie, par la poie e la disponibilitât, e ancje Franco, chê altre metât dai in doi rive e no tocje, pal jutori aes cjampanis e ai simiots. 
Un mandi a ducj chei che a jerin, e a jerin tancj, e apontament al prossim event!
L'Ostîr di Contecurte



12 coments:

Giacomo Trevisan ha detto...

A è stade une fieste bielissime!

Anonimo ha detto...

Vere, come che al dîs Giacomo, une bielissime fieste Un fieste che oltri a bielis contis (dutis) e à pandût a la int presint, graciis al ostîr, famei, berlon, cjantôr, camarele e aiutants, la braùre di oms e feminis di spetacul. Une esperience che e ves di ripetisi in altris paîs pal potenziament di contecurte e de stesse lenghe furlane.
Par mê e che o tornavi in furlane, e je stade pardabon une vere zornade di gjonde. Tant al è vêr che une volte rivât al agriturism, dopo cualchi tai, jessint stade nomenade Mariute, la gnove Contesse des Contis, jo mi soi sintût il cont.
Ps. Mi è dome displasût che propit al agriturism, indulà che o crodevi di sigûr di bevi insiemi a la clape di conrecurte no si è presentât nissun. Mi jeri dismenteât che la fumate in chê di e jere penze e che la ostarie di contecurte e je soredut virtuâl, ma va ben lu stes.
Nello Malisano

gelo stellato ha detto...

eh, purtrop Nelo, par noaltris al jere plui che fumate il fat di meti vie dut e puarta vie la robe ecc... :(

Yaio ha detto...

Ce biele fieste e ce tante int. Pecjât chi no ai podût vignî.
Jaio

Galliano ha detto...

Un compliment gjenerâl, pal sucès di Contecurte day, scomençant dal Ostîr e vie indevant, rivant ai Contecurtârs e a une sale fisse di int. Compliments a lis trê contis vincidoris.
Cheste pal Ostîr: tu âs il gno permès di mangjâ il muset, tu mi fasarâs savê se al jere bon. La distance e fâs chescj scherçs.

Anonimo ha detto...

Ostîr, Famei, Berlon, Cjantôr, Camarele e aiutants, contecurtârs presints e lontans, ce plasê pensâus ducj insiemi in ligrie. Di cemût ch'a lu fasès viodi o crôt che il vuestri mût di fâ al sedi il plui intaiât par tirâ dentri la int in te furlanetât. Di sigûr une vore miôr des "glesiis" lontanis de int come la filologjiche ch'a reste come l'academie de crusche, ancje s'a fevelin e scrivin al 70% in talian e il rest in marilenghe. Bepi
p.s. perdonâimi la vierte a la Nuzio Filogamo.

Giovanni Nello Malisano ha detto...
Questo commento è stato eliminato dall'autore.
Giovanni Nello Malisano ha detto...

Podaressin fâ un libri cun dutis lis contis: il libri di contecurte day. E lu fasin comprâ, se lu vuelin, a dutis li bibliotechis dal Friûl, e magaria lis scuelis indulà che insegnin il furlan. Daspò ogni contecrtâr pues obleâsi a vendi une desene di libris ai amîs. E cussì vin paiade la pôre.

Anonimo ha detto...

Ce displasè no podè jessi stât. Isal pussibil sintì cualchi conte? Si podares meti intal sît une sezion multimediâl...

gelo stellato ha detto...

o viodarìn di proviodi sie pe publicazion des contis, sie magari rindint disponibil l'audio. cul timp :)

Anonimo ha detto...

Galliano, mi displâs che sês rivât ultin ma no tu meretavis... al è come se un Mennea al fos finît inte prime baterie cun Quarrie, Borzov e altris campiononons... Vencolade e je une biele storie oniriche...
Bulo!
SEGUONO 11 FIRME:
CARNEVALI, PERFUMO, WOLFF, HEREDIA, SA, TELCH, AYALA, BABINGTON. YAZALDE, HOUSEMANN, KEMPES

Galliano ha detto...

O volarès rispuindi a chest anonim par ringraciâlu dal so preseament. Di Lui o rivai a capì che al dovarès sei un patît dal balon e no dome.
Intune democrazie esercitade a traviers des elezions, o savìn che la volontât popolâr e je sovrane. Sicheduncje (come che al diseve gno barbe) al è just e al stâ ben che e sedi stade cussì.

O ringracii ancje i firmataris aderîts al anonim, a forin grandis figuris dal balon Argjentin, la grande part di chescj zuiadôrs a son ancjemò in vite.


O varès alc di dî

Ti sêstu visât di firmâti? :)