mercoledì 30 marzo 2016

La haine


Nol jere nie di fâ, par Clementina al jere antipatic. E jere chê che e odeave di plui il nestri Dree. E jere di Milan, plene di caghe. Jessint fie di un militâr e jere vignude a stâ tal Friûl des grandis casermis. Si jere iscrite a la Scuele dal Grant Pindul, la orende scuele di mumiis, come che le clamave il nestri Dree: scuele plene di bidei mutilâts e alcolizâts e professôrs cagons. Se no tu jeris de creme di Udin, fi di cualchi miedi, avocât o nodâr, tu partivis za in svantaç. Ma ce jerial lât a fâ ta chê scuele li il nestri Dree, fi di operaris, brut, plen di bruscs, vistût mâl, cui dincj in disordin e i ocjâi di Nicola di Bari?
Al veve veleitâts di deventâ gjornalist. Al veve ancje dât un esam suplementâr di latin par podê iscrivisi ma… nie di fâ, une batoste daûr di chê altre: -1, -2, INCLASSIFICABILE… la uniche suficience le veve in religjon!
Clementina e jere bieline, riçote e castagnole, cu lis orelis un pôc a la Spock. E flirtave cul plui biel de scuele, Zuan, che al faseve ancje l’atôr.
Une dì te ore di sience e jere vignude fûr la storie dal ses. Dree al veve 14 agns ma al jere une vore indaûr e nancje svilupât. Nol saveve nie di nie e ducj lu coionavin, massime Clementina che e jere intun banc dongje di lui. Ancje il professôr si jere mitût a ridi viodint la ingjenuitât dal zovin ocjalon.
Di tantis che i à ditis Clementina a chel puar frut lui, arcistuf, al à alçât la man par domandâ al prof “Posso uscire?”
La lengate de fantate di Milan i à dât a Dree il colp dal K.O. disintji a basse vôs… “Sì, sì, vai a farti una sega…” e dongje ducj a sgavarâ.
Puar Dree lu cjatarin pôcs minûts daspò: si jere butât jù pal barcon di tante vergogne. Dôs oris plui tart al murive tal ospedâl.
di Checo Tam


Note
(Ogni riferiment a personis o acjadiments reâi al è dal dut un câs)

5 coments:

Anonimo ha detto...

Checo mi par che le to conte e paie tant i dis nestris,classe social,nevodisim,racomandazions,busterelis, e il bulismo dai protets di cheste cape d'aur a sdruma le buine volontat e la vite di tancj mior di lor. Lussian

Yaio ha detto...

Par un pôc o petavi a ridi se nol fos che si si fâs une idee des situazions seont il moment e o savin che se viodi colâ cualchidun al pués fânus ridi, chel ch'al cole a nol rit mai:-)
Le conte mi somee un pôc plui rapide dal solit. Nuie mâl, anzit. Un salût
Jaio

Giovanni Nello Malisano ha detto...

Une ocje la plui brave e il profesôr che al rît cun jê. Infin l'atôr. E chete la nestre puare scuel e che ben fûr in cheste biele conte.

Anonimo ha detto...

Une ocje la plui brave e il profesôr che al rît cun jê. Infin l'atôr. E cheste e je la nestre puare scuele che ven ben fûr in cheste biel conte. Brâf Checo.
Nello Malisano

Anonimo ha detto...

La conte no mi displâs ma o pensi che la fotografie sielte dal nestri ustîr e sedi veromentri azzecade... disìn une marce in plui... e no je la prime volte. Insumis l'ustîr al à fat une altre volte un lavor fin di cesel! Brao!
ADN

O varès alc di dî

Ti sêstu visât di firmâti? :)