giovedì 28 aprile 2016

Gibbium psylloides

A rivin. A rivin! Cu la biele stagjon a rivin…
Mi invadin la vecje cjase ma jo no pues fâ nie. O ai di tignîmai. O vevi simpri pensât che a fossin dai ragns ma dopo, cu la lint di ingrandiment, o ai viodût che a jerin come dai piçui scarabeus; sglonfs, di colôr moron che al tire tal bordò e lis gjambutis zalis. Gno nevôt Max, grant babio, al sgarbone spes tal interdet e mi à dit: “Nonno. È il Gibbium psylloides; un piccolo coleottero originario dell’Asia e importato da molti anni con le balle di cotone… il sito dice che è innocuo e si nutre di resti vegetali… lo si trova tra i cuoiami, gli erbarî…”
Strani. Chei sapientons di Italiauno a vevin fevelât di “pulci” che si cjatavin a miârs intun magazen bandonât di stofis a Milan: ûstu viodi che a jerin propit chês besteutis alì, i gibbii? Lu scrîf par talian, parcè che ancje tal plui grant vocabolari furlan no tu cjatis il non di cheste besteute che e vîf tes nestris cjasis. E je tant comun che il gno amion Remo si jere cussì spaurît che al à clamât a disinfestâ. I àn domandât 500 euros e al à scugnût lâ a durmî trê gnots a cjase di sô gnece! E jere une peste boboniche! Tornât te sô dimore si è nacuart che a ‘nd jerin ancjemò!
Baste tignî net mi à dit Nirvana, la zovine che e ven a fâ voris. Di cuant che e je jê a son diminuîts e cence butâ nissun velen! Clamait une brave femine a netâ e no stêt fâ come Remo!
Par chel che al rivuarde il non dal “gibbio” par furlan gno nevôt al propon “coleotar sferic”.
Ce pensino ducj i savints e i spudesentencis che a disin simpri la ultime su la lenghe furlane?
Mi plasarès savêlu…
di Milio dai cjans

4 coments:

Anonimo ha detto...

Miliu,no "coleotar sferic"mior coleotar toront(toront cu la o)cussi oltri il batesim in furlan e fermin ancie il mut di pronunsie di une determinade zone de furlanie.Chei pedoglats e son stats ancje intal gno curtil,e jo mi gratavi i cjavei sul lavandin par pore che vignissin di li.Lussian

Anonimo ha detto...

ti vares cognossùt ancje sence pseudonim cun chiste conte...tu mi plàsis!!!

Yaio ha detto...
Questo commento è stato eliminato dall'autore.
Yaio ha detto...

Cence sei un spudesentencins, o scuen spudâ alc distès:-) No sois sigûr che tal vecjo Pirona no si puedi cjatâ alc che i somee ma se in tun gnûf Sedona inmó nol esist si puès simpri inventâ alc furlanizant chest pedôli in Gjibi o Gjibiloide. Seont ce che si crôt, se a 'nd cualchidun che al sorevîf daspó de bome atomiche a son propite lôr. Al é duncje ore di insiorâ il nestri vocabulari si vin voie di pasâ in te storie cun lôr:-)

O varès alc di dî

Ti sêstu visât di firmâti? :)