lunedì 11 aprile 2016

La muart e Svualdin


Chê matine Svualdin si jere sveât di binore e al jere partît par lâ a fâ lens tal Cormôr. Al veve cun sè la gulizion intun scartossat di trê francs: scaloppette, scaloppine, saio jo cemût che si clame chel formadi? … ah! Scamorza! Ducj in paîs lu cjapavin par “velu-velu” parcè che al jere un pôc ritardât e ancje pe sô condizion di vedran.
La Muart e jere partide ancje jê a binore ma di Udin. La Muart e veve fat gulizion cuntun bevaron fat cun chês robis modernis di cumò… mi à dit gno nevôt… taurina, ercolina, hulkina…
Svualdin al veve une vecje Torpado mieze rusine e cu lis mantiis di cuar. Le veve pene piturade cuntun lavôr “a cjandele” ven a stâi al veve brusât la vernîs frescje fasint des riis e cussì e sameave a une tigre.
La Muart e veve une biciclete di titanio che e valeve 4000 euros e, in gracie dal bevaron, e jere za a Pagnà.
Svualdin al veve bielzà peât la prime fassine di lens bogns par piâ il fûc cuant che, inte Ipovie, a retis di Cjastelîr e rivà la Muart!
Svualdin al fasè apene in timp a viodi la Muart: chel coredôr cuntune strane divise cul disen di un SCHELETRO! Il coredôr al jere in bombe! A 70 a la ore… no si sarès fermât par un puaret cuntune vecje Torpado.
“Adiudiudiu… ma isal mat?” al pensà Svualdin e si butà viers il cjamp par evità il ciclist ma si inçopedà colant cu la muse ta lis gjambis di blave taiadis di pôc e... nie, si svuarbà un voli, ma la muart i passà su la schene e no si inacuarzè nancje di lui.
Di chê volte, a ducj chei che i domandavin cemût che si jere svuarbât, Svualdin al rispuindeve: "ah, jesus! Miôr vuarps che la biciclete!" e ducj a pensavin che al fos deventât ancjemò plui mat, ma savìn ben nô che no je vere!!!
di Milio dai cjans

5 coments:

Anonimo ha detto...

Benpo benpo Milio, tu le as poiade cusì ben in sostance che in scrit, che sol Miliu sà falu,Mi plasin ches peraulis dismenteadis tipo adiuadiu, velu velu,e altri mud di esprimi un furlan passat in dismentie. Lussian

Anonimo ha detto...

fuartonon ( a disin a Çarvignan, cuatri bielis ridadis fatis intal "viodi" la sene!!!Barbara Battel

Pauli Jacus ha detto...

Milio, Svualdin al à vût pôc da la vite, ma che al à vût i baste, e lu fâs vivi ben. Forsit la muart e dopre la sô belance par sielzi par prins chei che àn vût dut e di plui. E cheste e je vere justizie. Altri che chê dai oms.
Mandi

Yaio ha detto...

Mi fâs pensâ a une leiende popolâr di chês che le none a contave nulint une prêse di tabac tant che 'l nono al impiave il so cjic:-)

Anonimo ha detto...

Milio, disistu che la nere cul falçut su la schene a nus ponti un par un a la volte? Magari ch'a fos vere, cun ducj i miliarts ch'a sin su la tiere, sastu cetant ch'a varès di meti a fânus fûr ducj! Biele la to conte, cun tante fantasie e une vore ben scrite. Bepi

O varès alc di dî

Ti sêstu visât di firmâti? :)