lunedì 4 aprile 2016

… Si o soi jo, Lisute, e tu cui sêstu?

Ogni dì, tor misdì, cuant che il soreli nol sparagne a di nissun il so lusôr, soredut a lis lisiertis che a jessin a pueste des busis dai mûrs par scjaldâsi, Lisute, cul telefonut ben stret tes sôs mans come se al fos une relicuie, si sentave dongje il pin suntune lungje bancje di clap, ben poiade tal zardin denant de glesie.
Lisute di un pieç malade tai gnerfs e tal cûr, cussì al diseve il dotôr e veve pierdude la voie di vivi, la sgrimie, la grinte che sbulie sot la piel de zoventût.
E dome tal clip di chê bancje che al scjaldave il so cuarp  sclagn, lunc e malât, e cjatave un fregul di salustri intes sôs grisis e lungjis zornadis.
“Nancje che la vessin striade” e diseve sô mari, che cjalantle e capive che a chê frute, di une vore di timp, tal cjâf i balinavin dome bruts pinsîrs e tal cûr e veve dome lancûr. E dut al jere tacât di cuant che pai siei sedis agns i vevin regalât un telefonut tant inteligjent che in plui des telefonadis, al misurave ancje la fiere. E no dome chê: dentri in chel tramai Lisute e podeve lei il gjornâl, viodi la television, ma soredut cu la sô imagjinazion e podeve rivâ in ogni lûc di chest mont, lontan o visin che al fos stât.
Chel imprest intun prin moment, par jê, al jere stât propit une maravee, une biele citât, un altri mont dut di scuvierzi.
E par chest e jere lade a stâ, cu la sô fantasie, jenfri chê scjatute fate di veri e di plastiche indulà che e veve cognossûts, no si sa trops  cristians. Forsit plui di mil.
Pecjât, che jenfri chel trabacul no podeve olmâ  l’odôr de lôr piel, sintì se puçavin tal flât o viodi se al cambiave colôr chel biel fantat che i veve fat capî che no si sarès tirade indaûr, se al fos stât li cun jê, e al vès provât a bussâle.
Insome chel telefonut, ancje se tant preseât, al jere stât la sô ruvine
Puare frute, si jere inmalade propit di cuant che jere lade a stâ la dentri, dismenteant il mont vêr che i stave dongje. Indulà che si mangje si bêf, si lavore, si fevele, si vai e si rît.
Lisute puarete, ingjanade des modis, chel mont lu veve dal dut bandonât. Di fat e jere simpri cui dêts sui botons de tastiere di chel telefonin che la veve pardabon striade.
Chel tramai, par jê, al jere deventât piês di une cole, une fissazion che no i lassave un moment di padin. Nancje in chês pocjis voltis che si sentave par gustâ cun so nono. Lui che la veve fate cressi cu lis sôs flabis e braçolantle come une pipine, forsit, al jere l’unic che al varès podût vuarîle di chê brute malatie: liberâle di chê ossession
Ma cemût podevial, se di cuant che al jere lât in pension, di matine a pene sveât, fin prime di indurmidissi al jere simpri tacât inte television? Si pierdeve dal dut dentri in chel scjatulon indulà che dome si bale si cjante e si sivile. Par no dî  jenfri chel stes mont che al veve glotude Lisute.
In chel mont virtuâl indulà che dut si smentee e no dome la vite vere di ogni dì, ma ancje i ricuarts. Alì che ancje chel puar om al veve pierdût  i siei, come la storie di chel pin, indulà che ogni dì e leve a sentâsi Lisute. Cui che lu veve plantât, i nîts di gardelin che tra i siei ramaçs, di frut, al leve a cirî.
E no dome di chê si jere dismenteât, ma ancje la storie dai claps su chei mûrs dongje de glesie, ancjemò maglâts dal sanc di chei partigjans che in timp di vuere a vevin fusilât i todescs une domenie a pene finide messe grande.

Puar nono, vessial smenteât dome chês storiis, chei ricuarts. Il so cjâf al jere vueit, ma piês ancjemò nol viodeve plui ce che al sucedeve ogni dì sot i siei voi: lis stagjons che cambiin, la int che e nas e che e mûr, lis vueris, che magari cussì no, si fasin simpri plui dongje.Vere, storiis, no simpri bielis, ma di vite vere: lis medisinis plui potentis par vuarî di ogni mâl; i imprescj adats par comedâ chest mont che al va simpri plui indaûr.
di Nello Malisano

8 coments:

Galliano ha detto...

La conte, plene di chei argagns che nus puartin intun mont virtuâl che nus fâs viodi di dut e di plui, nus fâs ancje capî che si stave miôr cuant che par divertînus o sivilavin, o cjantavin la melodie di mode, o zuiavin di platâsi, o a corisi daûr.
Ma!! Stant che dopo di ogni pas al ven chel altri, vuê si cjatin cun ducj chei imprescj che se no sin prudents nus scjafoin.
Une conte reâl che nus fâs pensâ

Yaio ha detto...

No crôt che chescj fonins-visions telemaledets a copin dute le ligrie dai vecjos o dai zovins ma a contribuisin a isolânus e ancje a copânus se no si sta atents par vie de sedentarisazion.
Dutcâs le conte a mi fâs pensâ cussí.

Luciano Marinig ha detto...

Ce biei timps Nelo cuant inte stale il nono al faseve il cjavalut di cjanusse cu le roncee,e il frut cjalave content cuistant manualitat a so volte,vue e cjatin dut za pront ma il plasè da la vite si dislid simpri plui

Anonimo ha detto...

Nelo, il nestri mont al è stât e al è ancjemò par noaltris come une bufule di savon. Chei dai "smartphones e vonde", no podaran mai capîlu. A son doi mont ch'a no si fevelin e s'a si fevelin a no si capissin, no val la pene insisti. Tant val lâ indevant te nestre bufule, sperant che cualchidun come Gelo e Checo a jentrin ogni tant a dai un cuc. Mandi Nelo, Bepi

Anonimo ha detto...

Nelo va sul messaggero di Udin vue cinc avril, cronache pagjne 21,a caratars cubitals contecurte a plen ingjustri. Lussian

Pauli Jacus ha detto...

Nelo, se o sin rivâts a chest pont o vin di fâ ancje un mea culpa. Il progrès al à di lâ indenant, sigûr, ma se i nestris fis e nevôts a son cussì cjapâts cun chescj imprescj e je ancje colpe nestre. Cui aial paiât i smartfons di cinccent o sietcent euros ai fruts?
Fasìn un esam di cussience.
Dut cas la conte e fâs pensâ e no viôt che la situazion e vadi in miôr.
Mandi

Pauli Jacus ha detto...

Nelo, se o sin rivâts a chest pont o varessin di fâ un pôc ancje un mea culpa.
Al va ben il progrès, di sigûr, ma cui aial paiât ai nestris fis e nevôts i smartfons di cinc o sietcent euros?
Fasìn un esam di cussience.
La conte e fâs pensà e jo no viôt che la situazion e vadi in miôr.
Mandi

Giovanni Nello Malisano ha detto...

Gracie Galiano, Jaio, Lussian, Paoli. Al è propit biel sintîsi dâ, par dile con Lussian, dopo vê publicade une conte, une pache su lis spalis. Cussì si è almancul sigûrs che cualchidun la vedi lete. Cun di plui i preseaments par ognidun e fasin si che contecurte no sedi dome un blog, ma une vere ostarie, indulà che i contecurtârs si cjatin par bevi un tai insiemi.

O varès alc di dî

Ti sêstu visât di firmâti? :)