mercoledì 11 maggio 2016

Lis cjampanis a àn une anime

A Cjarlins lis cjampanis a compagnin il gno, il to e ancje il nestri vivi ore par ore, e nus fevelin di gjonde, di maluserie, di ligrie, di dolôr, di fieste e di sintiments.
Cuant che e nas une creature no, no sunin: ma a la prime ocasion che il frut o la frutute a jentrin dentri chel spetacul di glesie dal nestri paîs, eh alore sì, che ti scampanotin di no crodi, cun cetante fuarce e cetante gjonde par contâ a ducj i paisans che la aghe benedete e à bagnât chel cjavut maraveôs, che nol à fat nancje un “cit” di tant brâf ch’al è stât il frut, al à continuât a sbeleâ cu la bocjute par cirî la tete de mame.
Ti clamin a funzion di messe grande, e san a contâ al nestri paîs, ma si fasin sintî ancje fin a Maran e Nojâr, cuant che i frutins di nûf agns vistûts cu la tuniche preziose come dai nuviçs a fasin la Prime Comunion, la musute palide par vie da la gnot in blanc al pinsîr di dismenteâsi lis peraulis o indulà movisi li da l’altâr come che si son tant racomandâts il plevan e la catechiste.
Cu la Cresime e je un pôc diferente la cuistion: lis musis plenis di bruscs e cui voi spirtâts, i cjavei lecâts, vistûts a la mode a sfidin il fotograf scuasi cun baldance: in pocjis peraulis al somee che a disedin: “O soi deventât un soldât di Crist, ma cjalaitmi ben, trop figo no soio mai!”
Oh, e je rivade la nuvice, ma ce biele, ce lus chel "machinon" li devant de glesie, tante biele int elegante cun galis e cjapiei di cinematograf, a si disarès une sfilade di mode: intal marcjepît une cjapine di babiis curiosis (a sintî lis lôr cjacaris) di viodi il vistît de nuvice, ma sot sot si sa ben che e son a li par peteçâ cul “Cjale chê e cjale chê altre, lu âstu savût di chê altre là insomp?” Lis cjampanis a sunin a fieste, ma cognossìn chês polecis, a son simpri lis stessis e simpri li in ta chel cjanton; a sunin lis cjampanis e puartin pazience par chê voie di “gossip” che no puedin fâ di mancul...
A sunin… e ti ven un grop tal cuel cuant che tu capissis ce che a vuelin fâti savê: no je une robe biele, ma ti cjapin intun moment cualsisei de tô zornade e ti fasin stâ mâl cun chel bati profont e dolorôs. A ti stan contânt che al è lât vie cualchidun, ancje se nol è to parint, al è part da la famee che e à non Cjarlins, e ti vai il cûr par che persone che no tu viodarâs plui par la strade, no tu la saludarâs jentrânt li dal miedi, no tu la incrosarâs plui pes stradis blancjis di glerie lânt viers Ciamane. E je ben vere che di cualchidun in tal to cjâf tu i contis a lis cjampanis “Ma mi veve fât dal mâl, no si veve compuartât ben cun me.” E lis cjampanis di Cjarlins a ti rispuindin cussì: “Chel che à fât nol è afâr to, cualchidun altri al judicarà il so compuartament e lis sôs azions: tu tu âs di puartâ rispiet a cui che nol è plui tra di noaltris, il paîs al è plui puar cuntune persone di mancul par dut chel di bon che la stesse persone a dât a nô che o vivin a chi, che o sin di Cjarlins...”
Lis nestris cjampanis a sunin e fevelin: a àn une anime e un cûr grant cussì.
di Barbara Battel

4 coments:

Anonimo ha detto...

Sì Barbara lis cjampanis a an une anime che jo le viot cussi.Cjampanutis cjqampanutis jo us ai cetant agrat,dius gracjs al è poc pal jutori che veis dat---Veis cjantat al biel de vite,lagrimat dolor e muart,a seis stades maris, surs, simpri prontes a un confuart---No veis mai smenteat zornade tal dividi lus e scur,preant Diu a vos alçade su di no a tigni dur---E cumo il gno spirt al svole jenfri l' aiar de vuestre vos,sunait inmo mes cjampanutis poiait chel sun su la gno cros----Faseit cal vadi insot, insot, intal grim di mari tiere,e cal meti in lus il cuarp tal lusor di une preiere---E che il cur in ben s'inbevi in chel sun di cjare vos,a morest de lungje spiete sul eterni gno ripos. Domandi perdon par la lungjece dal coment,e la mancjance dai acents.Sierant il dut cui compliments de to conte veramentri biele. Lussian

Anonimo ha detto...

Poesie in prose che di Barbara, Poesie in rime che di Lussian, tant ben scritis ch'a somein fatis a cuatri mans. Nome une note Barbara, l'Ave Marie di matine a je un tininin mancul poetiche dal rest. Lussian, ce spietistu a meti adun lis tôs oparis poetichis? Mandi a ducj, Bepi

Galliano ha detto...

Barbara,
Leint la tô biele e descritive conte o sint dentri di me il sunâ des cjampanis dal gno paîs, soredut chês de sabide sot sere.
Graciis di puartâmi chescj ricuarts.

Andrea ha detto...

sperin che sunin "simpri di allegrie"

O varès alc di dî

Ti sêstu visât di firmâti? :)