mercoledì 29 giugno 2016

Glagns di ricuarts intal glemuç de vite


Il vivi di une frute lontan de int, intai agns Sessante nol jere tant facil. Mi pareve di vivi dome cuant che o jeri a scuele e mi visi che a mi plaseve lei, oh chel sì che mi plaseve, e forsit in mût no tant… "normâl"! E cemût podevio fâ jessint che in cjase si viodeve dome “La famiglia cristiana” e la “Vita cattolica”, une volte a la setemane (si steve cussì pôc a ..divorâlis): o finivi par preâ che e rivâs Dileta, une siorute maranese che e rivave cul Mosquito e la sô cassute di saradelis leade al puartepacs, fin tai cjasâi cu la stale dongje (lì che o vivevin nô) di solit il vinârs.
Mê mari e comprave lis saradelis par fâlis in “saôr” e Dileta, chê benedete femenute vedue, cui voi celescj inta musute di madone, dute vistude di neri, come ch'al jere costum par lis veduis, e involuçave lis saradelis o lis masanetis cun cjarte di fotoromançs o di “intimità” e mi sintivi une siore a podê lei simpri une part di contis o pûr la fin, mai une robe interie, ma, come che si dîs, simpri miôr di nuie! Che si capìs, a scuele la mê mestre adorade mi deve ducj i libris che e veve a disposizion inte biblioteche, ma une volte finûts (e o stevi tant pôc a finîju) o jeri simpri cun chê fan...
O ài in tal ricuart une sene: o passavi, chê dì alì, dongje la cjase dal responsabil de Agjenzie 5 (jo o vivevi inte Agjenzie 4) e, butant il voli a traviers un barcon viert, o ‘nd ài viodûts tancj di chei libris, ma tancj, di no crodi trops che a jerin; cence flât no mi soi fate scrupul, o ài blocade la bici e no sai nancje jo par trop timp che o soi restade in adorazion di chel ben di Diu! Li al steve il Sior Vigo, la sô femine, maestra Maria, la bielece de Montessori cu lis strecis come une corone ator de bielissime muse, e insegnave a Malisane, li che o jeri a scuele jo, e sô fie, une volte deventade mestre ancje jê, e à vût come arlêf gno fradi piçul, Giannino. Passâts plui di cuarante agns, mi soi sintude a saludâ, intun discount, di une siore e i ài rispuindût: “Bundì, ma che mi perdoni, ese sigure di cognossimi?” La siore cu la vôs cuiete e zentile mi à rispuindût: “Si, lei è Barbara Battel ed io sono Marisa Vigo...” La mestre di gno fradi Giannino!!! O ài pudût contâi cetante maravee che o ài provât intal viodi ducj i centenârs di libris che e vevin inte sô famee e mi à fât tornâ frute! Ridint e comovude la mestre Marisa mi à dît: "Barbara, parcè no sestu vignude dentri… nus varès fat tant plasê..." Ta chei timps il comandament (di mê mari) in preonte i dîs di Mosè al jere: "Mai 'ndar pae case de chealtri" (jo o soi venite di divignince, ven a stâi, voltât par furlan) "Mai lâ inte cjase di chei altrîs".

2 coments:

Anonimo ha detto...

Barbara biel chest to riesuma ricuarts lontans, dongje la buine volontat di che frute avide di cognossi,tu as zontat une pagjne di plui al libri cuore. Lussian

Giovanni Nello Malisano ha detto...

Stes ambient,stessis leturis: la vite catoliche e la famee cristiane. Di cheste, mi visi che a mût foto romanz e contave la storie dai Sants. Mi visi come che al fos cumò la storie di Sant Rita e di chel omenat che a veve sposât che la pacave. Mi visi di chei agns, indulà che propit, come che e dîs Barbara, libis no nd jeri tes nestris cjasis, mê mari che us faseve lei i libruts dai Sants. San Domenico Savio e San Giovanni Bosco. Ches ultin cul so lupo, il grigio, che lu protezeve de pulizie liberâl. Sfidi lui al jere Giobertian a e al varès volût il pape a capo de Italie. Biei ricuart de nestre province furlane smenteâts tal non de modernitât di ducj. Cjastrons. Grazie Barbare.

O varès alc di dî

Ti sêstu visât di firmâti? :)