giovedì 9 giugno 2016

Puartons


Se tu sês vignût sù intun paisut di clap e contadins, tu ju cognossis subit.
I zûcs di lûs, i mûrs di piere e muscli, une vuarzine inrusinide; la glerie che ti sclipigne lis peraulis, intant che tu domandis a dôs vecjutis fatis di grispis se tu puedis dâ un cuc. Lôr a disin di sì a la tô nostalgjie, di dentri dal scûr dai façolets di cjâf.
Tu jentris, il curtîl al è une esplosion di emozions: invidie, gjonde, corisi daûr, marcolâsi… ti saltin intor tant che la canicule. Tu sudis, tu tramis, tu tornis indaûr, a cirî il fresc. La memorie e torne a deventâ ricuart. Tu stâs par lâ vie, ma il soreli al cuei l’asfalt.
E je une tierce cjadree, dongje des vecjutis. Cence dincj, lôr, ti cjacarin dal timp.
Tu i dâs reson. Al è masse cjalt, par lâ fûr. Miôr restâ alì.
Tu ti cjalis lis mans, cuietis: no tu âs mai vût cussì tantis grispis.
Di cualchi bande a botin, ma tu tu crodis che nol sedi par te.
di Raffaele Serafini 
Contis dal Ostîr

13 coments:

Massimo Furlani ha detto...

Tu mi âs fat tornâ indaûr cul timp, cuant che me none a stave sentade suntun clap a scosolâ fasûi.
O pûr mi visi che intal mê curtîl, si vierzeve il puarton da la arie par scomençâ a scartossâ las panoles.
Al jere come un invît. Ben planc ducj i vecjos dal borc a jentravin pal nestri puarton a judâ la vore.
E no piçui a cori ator ator, tal mieç dal curtîl. Ricuarts...

Galliano ha detto...

Biele al è dî pôc. Ogni frase criptade te sô comprensibilitât ti mene dulà che tu tu vuelis lâ. Dulà che i tiei ricuarts ti puartin. Dulà che la tô fantasie e volarès poiâsi.

gelo stellato ha detto...

grassie! ma darest, di piçul, ancje jo soi stât ator pai puartons e pai curtii... ae fin cuissà, se tornin ducj di li che vignin :)

Giovanni Nello Malisano ha detto...

il paron di cjase, o miôr da ostarie ancje cheste volte al è un vêr maestri. No sai se di une biele conte o une biele poesie. Biele par dabon

Anonimo ha detto...

Difur di chei cutii ae simpri une cjadree di stram vueide dongjie di ches ocupadis,cui che si sentarà disore al cjatarà le furtune di ferma il sio timp sot lis cjarecis di chel ir,cuistant fuarce gnove tal fronta chel di vue.Bielone poesie. Lussian

gelo stellato ha detto...

la me interpretazione e jere plui di conte di fantasismis, stant al botà des cjampanis, ma che e risulti poetiche al è ancjemò mior. grassie!

Anonimo ha detto...

Seont el gno pont di viste mi à dismot visure di un che al à viodut e partecipat sacrificis e gjondes di une volte,te umiltat di savè trai plase su di ogni piçule cjosse.

Anonimo ha detto...

Gelo, o viôt gno nono Tin sentât su tune sinte di piere fûr dal puarton, coronât di fulminants di lens brusâts par fâ piâ la pipe. Al tirave jù il cjapiel a cuvierzi la muse cuant ch'a passave la coriere par Triest, sint ch'a nol veve plui voie di tirâsi sù par scjampâ dentri tal puarton a parâsi dal polvar.

Anonimo ha detto...

Il coment numar 8 al jere di Bepi

gelo stellato ha detto...

grassie!

Anonimo ha detto...

Puisie pure! Bulo e vonde!
Firmato: Hauptmann Thieme

Pauli Jacus ha detto...

Comunicât pai comentadôrs:
Che l'ostîr al sedi bulo lu san ducj.
Se l'ostîr al vendarès asêt invezit di vin bon al pierdarès ducj i clients.
Stin nome atents di no lustrâlu masse, che al metarès su chilos.
Mandi

gelo stellato ha detto...

Se no dopo mi tocje lâ a fâ i chilometris come Nello :D

O varès alc di dî

Ti sêstu visât di firmâti? :)