lunedì 6 giugno 2016

Stalker

“O mio tenero bel fior, il dolore dell’amor non mi fa dormir la notte”
“Ki 6?” i rispuindeve la biele Jenny. Cinc sîs voltis vie pe gnot i rivave simpri il stes msg. No saveve cui che al fos e cemût che al ves vût il so numar. E vie x seris e seris fin che si è stufade e jê stesse i à proponût al stalker “Dove posso vederti?”
E lui: “In Via Giuda 13 domani a ½ notte”
E cussì la biele Jenny, castagnole, snele, zovine, cu lis pivicjis (un bijoux) e rivà in Vie Jude civic 13 a ½ gnot cul spray al pevaroncin (ros) e une vuiscje eletriche no si sa mai ma… ce che no viodè…
La cjase e jere une vecje vile liberty bandonade come chê di Mortean prime che le comedassin. La puarte e mancjave. La fantate, cence pôre, e jentrà tal scûr di une stanzie impiant la torce dal so telefonut. Suntun scagn al stave sintât un om cuntun telefon in man, il stalker ma… orôr!
Al jere un scheletro! Un scheletro cun cualchi peleote intor e vistût in marsine e cilindri! Il telefon che al veve tai vues dai dêts al jere vecjo, distudât, rusin…
“Allora mi hai visto” i rivà sul moment il msg a biele Jenny: i sameve che il scheletro si movès!
E tacà a cori come une mate fûr di chê cjase striade x… sveâsi intun bagn di sudôr… al jere stât dome un vencul! Però i msg dal stalker sai visave… o mio tenero bel fior… a jerin reâi!
Fate la doce, gulizion e vie a vore in ufizi ma… il computer di bort de sô flamante OLDSMOBILE i mandà un strani msg:
“O mio tenero bel fior ora lo sai ki sono. Non ti tormento più se torni da me alla villa in Via Giuda 13 e mi porti un fiore”
SKREEEEEEEEEEEEKKKKKKKKKKKKK
E tirà une grande frenade a risi di copâsi. Si azionà parfin l’airbag!
Sot shock e passà cualchi dì tal H e dopo, dade dentri la Oldsmobile cul computer, si comprà une vecje DAF 66 di tierce man e e butà computer, tablet e celulâr inte roie.
Di chê volte il stalker no le à tormentade plui.
di Checo Tam

2 coments:

Anonimo ha detto...

Biele conte,ogni innovasion tecniche che ven dongje nus gjiave fadie dal cuarp par zontale su le anime,disore di un mont cal cor masse, e cu le so int che stente stai daur. Lussian

Giovanni Nello Malisano ha detto...

Cheste e je une des plui bielis contis che mi à fat lei Checo.Brâf par dabon!

O varès alc di dî

Ti sêstu visât di firmâti? :)