lunedì 4 luglio 2016

Diu bêç e Madone palanche


- Driin, driin, driin - ”… ma cui puedial jessi a cheste ore, si domandave Gjino che si jere indurmidît denant de television? Cui isal?… ah, sêstu tu? cemût mai, nol è di te clamâ cussì tart!
Al jere un sabide di sere, dibot undis e al jere Pauli che al clamave. Puaret di cuant che chel ictus lu veve çuetât, le salût, chel om, lu veve propit bandonât. Cun di plui, di un an, al veve di scombati ancje cu la vissie. 
I vevin cjatât un cancar, cussì a disevin i miedis. Lui, par chest, al varès volût lâ sot i fiers subit, ma cemût podevial se tal ospedâl lu vevin metût in liste par la fin dal Istât dal an che al ven?
A dî la veretât il primari cun lui al jere stât onest. I veve proponût che se al ves paiât di sô sachete, lu varessin operât subit. 
“Vigji, o soi Pauli, passimi mê sûr, al je di tantis oris che no rivi a pissâ…”
Mariute, la femine di Vigji che e jere lade a durmî di un pieç, sintût tal sium il telefoni, subit e veve capît che al jere sucedût alc di no tant biel. 
“Se no tu rivis a disvuedâti di cussì tant timp, si scugne clamâ daurman il miedi - son stadis lis sôs primis peraulis. - Diu, no intint il primari, ma almancul chel miedesut zovin che plui voltis ti à visitât e che ancje lui al è tant brâf.
Dit e fat. Une ore dopo un infermîr che al lavorave cun chel zovin miedi, ancje se la ore e jere tarde, al jere lât a cjase di Pauli, che finalmentri cuntun catetar, ben sistemât jenfri la brucje al veve podût svuedâ la sô bufule.
Che canele e jere stade pardabon une benedizion, ancje se par Pauli, dome il pinsîr che al varès vût di tignîle tant a dilunc lu copave. Un vêr lambic, cence fevelâ dai trente euros che al veve scugnût tirâ fûr par paiâ chel infermîr. 
“Lunis, come che mi à dit prime il miedi al telefoni, ti puarti tal so ambulatori e soi sigure che par cemût che tu sês cumbinât al capissarà ancje lui che cumò a scugnìn operâti subit - e businave Mariute a pene lât vie l'infermîr."
E cussì a son ladis lis robis. Vignût lunis a àn puartât Pauli di chel miedi. A viodilu, puaret, çuet e cun chê buste che i pendolave jù pai bregons al faseve propit dûl. 
“Siore la cundizion di so fradi no je tant grave di obleâus a operâlu cun urgjence, al à sentenziât il miedi. Come che a viodês, par cumò, ancje se cul catetar, al pues disbevi lu stes. 
O sai che par lui al è un lambic. Dut câs e sarès une soluzion.Te cliniche indulà che o lavori jo, cuant che no soi tal ospedâl, par operâsi, a diference dai dodis mil euros che us domande il me primari, a bastin siet mil e, us garantis che sin brâfs ancje nô.” 
“Siet mil euros, un bon presit siôr dotôr, jo lu ringracii, ma gno fradi nol à nancje chei.” – e je stade pronte la rispueste di Mariute.” 
“Alore siore, cun so fradi e vin di lâ indenant cussì, ancje se o capìs che chel catetar che al scugne tignî, par lui, al è un grant sacrifici. Ma sperin che il timp al passi daurman. Dome une racomandazion: se viodês sanc tes urinis vês di cori di corse intal ospedâl.”
Il timp intant, ben planc, par Pauli, in chel calvari, al passave avonde spedît. Al jere rivât Dicembar e ancje se lis zornadis no jerin tant bielis lui si distraeve pierdintsi tai colôrs dal presepi e dal arbul di Nadâl che pe fieste de Madone la sô femine e veve za ben prontât.
Ma une dì alçant i voi di chês piçulis distrazions, cjalant chel sacut indulà che al finive il so pissariti, Pauli, si jere inacuart che al jere plen di sanc. No si podeve plui spietâ e in cuatri e cuatri vot al è finît tal ospedâl. Denant di chel sanc, che al fâs pôre a ducj, bêçs o no bêçs, finalmentri e àn scugnût operâlu. Pecjât, che une volte viert, chei miedis che lu àn operât si son inacuarts che il cancar, ben planc, come la grame, si jere slargjât fin tai budiei.
Ce marum, par la sô int viodi Pauli che aromai al veve lis zornadis contadis, ma piês ancjemò, savint che se un nol à bêçs par curâsi al scugne murî. E in chel ingôs sangloçant Mariute si domandave: “cui sa se la medisine e je une sience che l’om al à metût in vore par gjavâ la soference? 
No crôt, i varès rispuindût il puar Pauli se al ves podût scoltâle e rispuindi.
di Nello Malisano

5 coments:

Anonimo ha detto...

Le conte e à un grun di realtat intor,Diu beç. Forsit al è plui dongje di ce che si crot chel famos tren cal puarte in Svuizare cence biliet di tornade.Une biele conte di problemes atuai sepur te maluserie dal sucedut.Compliments a Nelo. Lussian

Galliano ha detto...

Nello,
Tu tocjis un teme che nol varès di sei cussì, ma che purtrop al è. Rivaraie chê rivoluzion umanitarie dulà che la salût no dovarès sei un probleme di bêçs, pai siôr o savin bielzà che nol è, ma soredut par chei che no àn i bêçs. E par finî ti dîs che "la sperance e je un confuart pai lodui".

Anonimo ha detto...

Sui "barons" de medisine o soi di acuardi cun te Nelo, no si pues ricatâ la puare int cun chei presis lì.
Ma mi vegnin ancje iniment i timps dal miedi de mutue - chel di Sordi - cuant che la int a si faseve scrivi la liste des medisinis e a leve in speçarie cu la sporte, straçant plui di miezis, cence fevelâ di chei che par lâ vie in ferìs a parcavin i nonos al prin socors, bandonant i cjans pe strade. Une sanitât aministrade in chest mût no podeve durâ a lunc e al dì di vuê a si viodin i risultâts, ch'a i jemplis lis sachetis dome ai barons...Sin finîts in brutis mans ma a vin metût dal nestri ancje noaltris - talians o vuei dî!!! Bepi

Giovanni Nello Malisano ha detto...

Gracie Lussian pai compliments, pes tôs peraulis che judin di sigûr ducj i contecurtârs e butâ jù une altre conte. Grassie ancje a Galliano che si domande se a vignarà che zornade indulà che la salût podarà mantignîle ancje cui che nol à un franc te sachete. E je la stesse domande che mi fasevi jo scrivint la cont. Bepi gracie ancje a ti, soredut pes tôs riflessions. Vere, cuant che un popul al à i siei politics, i siei barons, la sô classe dirigjent corote, al vûl dî che nol è tant onest nancje lui. Ma no sta dismenteâ che son tancj, chei che no son parons nancje dai botons de lôr cjamese, che no àn podût fâ nie, ni in ben, e tant mancul mal par che il nestri mont, in tantis robis, al sedi cussì brut

Anonimo ha detto...

Nelo, o pensi che une societât ben aministrade di int oneste a no lasse par strade nissun, pues dital vint vivût ta une di chês prin e daspò ch'a rivassin lis sanguetis.., ma sedi prin che dopo a 'nderin di chei che jemplavin lis sportis...Bepi

O varès alc di dî

Ti sêstu visât di firmâti? :)