venerdì 1 luglio 2016

La cjamare di îr


O vevin let di trop bogns che a son i vins furlans inte Lonely Planet – une des perlis di un critic di New York che o adorìn – ma dome al ultin moment o vin decidût di brincâ un last minute e lâ a dâ un cuc veloç inte maraveose enogastronomie di provincie di cheste regjon.
O sin rivâts a Udin cence prenotâ nuie, ator di nô un davoi di berlis, blestemis e coiars che a rutavin une lenghe incomprensibile. Nus àn mostrât cemût rivâ tal mieç di chel sbit di citât e cjalant une tor cuntun orloi a muse di soreli, di une frescje loze jevade di une grampe di scjalins, o vin subit olmât il cinc stelis che nus coventave. L’unic.
Cjamaris finidis, a levin indevant a dînus li de reception, ma nô no sin int usade a sintîsi dî di no. O sin siors, i vin dit. Une vore, siors. Cussì al jere rivât il paron, une panze involuçade intun grumalat ont e une musate rabiose. 
Cuntun colp di sbessule a si jere intindût cul fantacin daûr dal banc.
«Pai… no sai se al è il câs», al veve trabascjât chel, «e se dopo a van a contâle ator?»
Nus platavin alc, al jere clâr. E alore i vin tirât fûr il scansel de lenghe cul cisôr dai bêçs di cjarte. «A sarès la cjamare di îr…» al bruntulâ l’om, pôc convint.
Cussì o vevin insistût. E lui nu sveve spiegât.
Vuê a vevin dutis lis cjamaris plenis, figurinsi, al jere Friuli doc… ma la dì prime la cjamare di îr e jere restade vueide. E jere une stanzie normalissime, anzit, ancje un tichinin cragnose, ma inte puarte di jentrade e veve montât un argagn dal timp: si podeve jentrâ intune cualsisei zornade dal passât. Si durmive e a matine si tornave intal presint. No jere però un machinari dal dut afidabil e bisugnave firmâ une liberatorie, dulà che tra l’altri si obleavisi a no dî nuie a di nissun e a no lâ fûr de stanzie fin a la matine dopo. Nus pareve avonde inverosimile, come cuistion, ma cuant che l’om al veve pandût che il presit al jere un centenâr di voltis plui alt di chês altris cjamaris, o vevin subit cambiade idee.
E o vin fat ben, parcè che e je stade une esperience incredibile. 
Si respirave un aiar sospindût, misteriôs, il timp al pareve sfantâsi e slungjâsi. O vin fat l’amôr come di agns no nus capitave e o vin fantasticât su ce che al podeve sucedi se a levin fûr de stanzie in plene gnot. E no je stade di sigure la penâl saladissime a fânus dismeti chel proposit. O vevin dome voie di stâ li, a vongolâ in chel passât.
Fûr, il davoi de fieste al centenave lis orelis, ma no nus interessave. Nô o jerin contents cussì.
Parfin il paron al jere simpatic, la matine dopo: cuant che nus à saludât e i vin paiât il cont al rideve di gust, come se al fos contenton. Di sigure, ancje lui al jere content par nô.
di Raffaele Serafini
Contis dal Ostîr

3 coments:

Giovanni Nello Malisano ha detto...

A colp. Se mi fasin un bon presit o firmi la liberatorie ancje jo. Cussì podarai rivivi une biele gnot de mê zoventût. Fantasie? o savarai a dilu dopo provât. Biele conte par dabon. Sfidi, le à scrite il paron di cjase.

Luciano Marinig ha detto...

Une conte ben argagnade,cui nol voress cjatà un luc indula vivi i mior dis dal so ir.Oltri al premi di sant Simon il nestri ustir al mertares un "nobel" di fantasie,e no di mancul il Checo. Lussian

Luciano Marinig ha detto...

Perdon, congegnade,e nò argagnade. Lussian

O varès alc di dî

Ti sêstu visât di firmâti? :)