sabato 16 luglio 2016

Semenant tal salvadi

Di pitinin, Toni al leve parmìs il nono e a i doi bûs, il vieli si ustinave a savoltâ chel toc di cjamp salvadi passant la ferade, une tiere che parturive dome claps e baraçs. Il von al jere convint che e jere cuistion di timp. – Bisugne dome meti cuince e tante man - i diseve, intant che al cirive di impiâ la pipe. 

Di frutin, si puartave daûr un seglotut e une palute come chês dai canais che a zuin cul savalon a ôr dal mâr. Biel che a levin cjaminant a pas di bûs, nol pierdeve di voli la strade, buiace che al viodeve, buiace che e finive tal seglotut, po le strucjave intal piçul ledanâr di chel toc di cjamp sterp.

Di fantacin al leve cun so pari. Il nono al jere lât a savoltâ tieris oltranis. I braçs dal zovenut cumò a podevin sopuartâ il pês di un seglot. Tal dì di marcjât, chel des bestiis, Toni al jemplave variis voltis il seglot, za che di vacjis indi jere tantis, prin o dopo dutis a varessin fat i dibisugns sul lûc.

Di grant e bielzà sposât, si lu viodeve cun pale e cariole zirâ par stradis e stradelis in cercje di chel substrât che al varès cambiât la muse a chel teren rampit e glereôs. Il mandât dal nono no i dave padin, al jere sagrât. Al sarès rivât a fâ florî chel salvadi. Al smondeà par ben, gjavantji cuasi in forme ossessive ducj i claps, cun lôr al cenglà il contor. I steve dant a chel lûc une identitât, une paronance e une braùre ferbinte. 

Toni, bielzà nono, al fumave la sô pipe a cuarnet sentât sul muret di claps. Il salvadi al jere stât domât, ancje i raclis a menavin mintri che a sostignivin lis plantis cun dai pomodoros mai viodûts inniò. 

Il vieli, cun bocje di ridi, al cjalave i smursiei blancs e ros come miluçs dal so piçul nevôt. Il frutin, cul seglotut e la palute in man, lu ripuartave indaûr tal timp.
di Galliano di Buenos Aires

5 coments:

Anonimo ha detto...

Biele conte Galiano,conte che insegne a tira dongje il pagnut,puare mariute di talmo e jere compagn,e tal tirà su buiacis dilunc le strade cun scove e scovacere,diseve, ai vul ledan e no plevan. Lussian

Giovanni Nello Malisano ha detto...

Lussian, lu stes e faseve mê agne Bine che e cjapave su lis buiacis no dome par tignî nete la strade dal borc, ma soredut par coltâ chel ort plen di claps che e veve indulà che si spacave la schene. Biele conte Galliano.

Anonimo ha detto...

Galliano, a tu âs la bravece di cambiâ il ledan in poesie, che palete a le ài tai voi ancje jo e par chel o ài capît ce ch'a je la miserie economiche, ch'a pues deventâ fuarce vitâl, graciis di cûr di vemale fâte tornâ iniment, Bepi

Galliano ha detto...

Lussian, Nello,
Graciis pai vuestris coments.
La Mariute di Talmo e la agne Bine a vevin la miserie in comun cun Toni il personaç de storie, di sigûr che no jerin i unics a puartassile in spale. Al pararès che a sedin epochis passadis, ma dome al pararès, parcè che cumò o vin altris tips di miseriis.

Galliano ha detto...

Bepi,
Graciis des tôs peraulis, o crôt che ducj o vin vût une palete plui o mancul compagne in cualchi moment de nestre vite. E brâf tu a capî che ancje une buiace e po deventâ poesie pure, se no, baste cjalâ l’ort di Toni, no ti parial?

O varès alc di dî

Ti sêstu visât di firmâti? :)