lunedì 1 agosto 2016

Il mostri


Soredut di matine, al jere un puest bielissim. A levin ducj a passâ une ore o a fâ fotografiis. 
Ma une dì, il panorame al jere sparît: tal so puest al jere saltât fûr il mostri.

Si jevave sù par desenis di metris, un rodul supierbeôs, cence cjâf. 
A Bastian i plaseve bussâ Lise poiantle su chê uniche, grandonone, çate di fier. 

La creature e veve metût sù i braçs: doi, cuatri, sîs… Une divinitât in grât di spacâ il rigoi dal cîl dal mont. Lise la odeave. Al jere plui biel achì, prime, e diseve di continuo.

A rivarin cul elicotar. I pearin i braçs cun fîi finissims. Un pentagram arcuât che al cjapave sù tal so grim i uciei tant che notis, ma cence nissune poesie.

Lôr doi a vignivin chi a volêsi ben, il mostri ju cjalave, 'sisinant di intese, ma chei dal paîs no lu volevin. Al è brut, a disevin, al è un pericul.

Alore il mostri al metè sù ancje la muse. Voi di agnel e ridade di paiaso. Nissun al veve plui pôre di lui, cumò. Bastian al alçave lis spalis, Lise e rideve fintremai che i vignive la tos.

A tornarin a tacâ a fâ fotografiis. Il mostri al steve in pose, sfidant l'aiar. A Bastian e Lise i interessave dome l'imbrunî e si bussavin come se a vessin voie di supâsi i vuès. 

Al è ancjemò brut, a disevin. La muse no baste. Cussì a rivarin i writers: il cuarp si cuvierzè di univiers colorâts. L'odôr di vernîs cuasi ti sturnive.

Comprarai la moto, al diseve lui, O larìn al mâr. Jê e riduçave. Jo stoi imparant a fâ di mangjâ. Lui nol capive, ma jê e jere cussì contente che e steve mâl.

Il mostri al invecjà prin dal lôr amôr. La vernîs si scrostave e si intacave inte cjamese, intant che Bastian al fumave e al vaive. Lise no jere cun lui.

E veve pierdût i cjavei, Bastian nol ve il coraç di cjalâle. Ere bielissime, i vevin dite. Someave vive. 
Al mâr no lerin mai. Sot dal eletrodot, cumò, lui nol torne plui. 
di Raffaele Serafini
Contis dal Ostîr

9 coments:

Anonimo ha detto...

Purtrop il progress al puarte a chest,a le di spera che lis stessis irradiazions e vegnin disiplinadis plui ben a corezi il mal che an fat.Biele conte smicjade sul just. Lussian

gelo stellato ha detto...

Vere, ma in chest câs il progress al centre pôc, se ti disin che une robe e je cuintri la leç e tu la fasis distès... ben no sai se e je colpe dal progrès... e pûr...

Anonimo ha detto...

A je vere ancje che,e simpri purtrop, intal nestri contenitor nazional al sta dentri di dut e sa nol sta a lu sburtin par che al stedi di istess.Mandi Raffaele. Lussian

gelo stellato ha detto...

soredut a nô che nus passe dongje, nol è che nus stedin simpatics, chescj mostris.. :/

Giovanni Nello Malisano ha detto...

Copiu ancje se no tu ju viodis. A son malvagjis:no us lassin nancje durmî.


gelo stellato ha detto...

cui? chei de Regjon o chei de Terna? :D in efiets... :)

Giovanni Nello Malisano ha detto...

chei e chei e ancje chei altris...e al è cjalt

Barbara ha detto...

...biele di puartâ vie il cûr

Anonimo ha detto...

Za des primis riis o ai induvinat lu autòr! bulo! e vonde!

Firm. Hauptmann Thieme

O varès alc di dî

Ti sêstu visât di firmâti? :)