lunedì 15 agosto 2016

Poche! Mone

Insome i telefoni. “Dulà sêstu?”
E lui: “Tal simiteri di Gusperch…”
“Ce fâstu tal simiteri di Gusperch?”
“O stoi cirint une robe, ven un salt ancje tu, dai…”
“OK”
O rivi li e lu cjati come sturnît, cul smartphone in man… al cjamine come un zombie tra i vecjos pipins di piere e i agnuluts plens di muscli sec; il cjalt di avost al à secjade la arbe tal chel simiteri bandonât disore Cividât. Lui al cjale fisse une arcje displantade e po al berle… “Lu ai cjapât! E jere ore! Finalmentri!”
“Sêstu mat, Rafaêl? Ancje tu pierdût cui Pokemone? Sâstu che chê altre dì un zovin al è stât cjapât sot a Udin? Al cjaminave tal mieç de strade inseminît…come te cumò… risultât? Seât di un camion! Muart vitim!”
“Be’, jo no soi cussì coion di lâ tal mieç dal trafic…”
“Sì ma tu trascuris la ostarie! Chel o vevi di dîti!”
“Ce isal mo?”
“Tachìn… Nelo ti à mandât la tierce version de sô ultime conte… ”
“Ma no jerie za rivade chê definitive? ”
“Al à fat une modifiche…”
“Signurut!”
“E dopo a son di publicâ la gnove di Pauli, chê di Milio, chê di Lussian, di Carli… e no je finide…”
“Ancjemò?”
“Sì, ancje l’Antescûr al à pronte une gnove… tu âs di viodi se e va ben e dopo Pieri Moràs al è tornât a la cariche…”
“Ce aial di vê chel vecjo sporcacjon?”
“Al continue a bati che no tu âs mai tornât a meti sù te gnove ostarie la sô Gruesse Sorprese, la storie di chel militâr che al va cuntun trans… al zonte ancje che cumò la ostarie e fâs schifo… e je plene di contis di une volte scritis di bigots e di preots…insome, il vin de ostarie, stant a Pieri, nol è bon… al è fat cul polvarin…”
“Be’, in efiets un pocje di reson le à… bon, âstu altri di dîmi? O ai di spostâmi intun altri puest cumò… o che tu vegnis cun me se no si saludìn…”
“Nie, alore…”
“Alore viôt tu, fâs tu o fâti judâ de camarele o de gnove massarie… jo o soi impegnât… mi cjapi une polse… va be’… o ai di cirî altris Pokemone…”
“Ah, Rafaêl, Rafaêl, cuant tornarâstu incà?”
“No sta preocupâti par me… al è dut sot control!”
di Checo Tam



11 coments:

Giovanni Nello Malisano ha detto...

Checo e tu ti sês dismenteât di Bepi che di bot al rive cuntune Navisele, un fregul plui piçule di chê di Apollo, te plaçute di Listize; di Galliano che al torne par simpri in furlanie; di Iayo, la vôs cjargnele plui autentiche di contecurte; di Barbara la nuvice de clape e di tancj altris. Tu âs reson, Contecurte e à di jessi rinfuarçade, no sai se cuntun vice ostîr, cun cualchi famei o camarele di plui. Ma Rafaele, o sai che nol vûl savint, che cuant che si met la man tal tacuin al devente pavonaç. (la int a coste)
Insome, Checo, viôt tu di dreçâ la barache, se no a lin ducj a sbati. Jo intant o promet, che lis mês contis no varan plui di dôs versions. Ma tu, dai ancje une ma a Rafaele che al cjapedi cualchi pokemone, magari ros cence che al sedi un comunist.

Anonimo ha detto...

A no ài vût timp di stai daûr ai Pokemonis, ma o soi sigûr che Rafaêl al tirarà fûr alc di gnûf cun cheste esperience. Mi somee che i Pokemonis a ti fasin svolâ fûr dal mont di ogni dì, a cirî gnovis ideis e cuissà ce ch'al saltarà fûr dal cimitieri di Gusperch. Mi pâr di capî che Checo al vores tirâ dentri plui zovins in Contecurte, e i Pokemonis a son il mût miôr par lâ a ciriju, Bepi

Anonimo ha detto...

Atént Al freccia rossa!!!SKREEEECK...!..Ehi...viarç i vòi çiale ca...un POKEMONE SPECIAL!!!!!!

Anonimo ha detto...

ma poke-mone isàl l'antitesi di: tante fighe?

Anonimo ha detto...

Jo o crôt che Rafaêl al vedi miôr l'antitesi, in rispiet de Pocje Mone, e lu sintarin in Sierade ch'a nus contarà lis gnovis scuviertis su lis Monis nostranis. Bepi

gelo stellato ha detto...

us confermi che o soi daûr a studiâ il fenomeno sedi di bande ludiche sedi di bande economiche. Cu la gnove stagjon us anticipi che tirarai fûr di sigure alc :)

Galliano ha detto...

Nello,
Rispiet al to coment fat sul "Poche! Mone", ti disarai che tu âs centrât ben la mê necessitât: e je vere che ogni volte co mandi une storiute a Contecurte, o sint che ancje se son curts moments, come se a fossin lampadis, o torni in furlanie. Daspò, man man che il savôr de tornade si sfante e che la realtât e je une altre, vêmi ca cui pîts par tiere. Di cualsisei maniere che si le viodi cussì o culà e, ancje permetint che ognidun al à la sô maniere di viodile. Cui mai puedial gjavâmi chei moments?
Maman Nello e graciis

Anonimo ha detto...

Ai mei timps al ere il yo yo e dopo al è vignut fur il clic clac: si visaiso di che balutis? Dute une mode... come cheste ultime dai Poche e mone... si stufaran! La mone e je tante ma i nestris frutats no le calcolin, anzit, i fa schifo, mi samee... se e son dome a cori daur a Picaciù e ai siei fradis.
Jo ai mei timps o eri un piciul pleyboy, no scherzi... moro e riçot, cul custum celest di lane gugjade, piel scure come i terons... o vevi lis todescjis che le disniciavin apueste par me... ancje parcè che o eri lat a vore in Svizare e o vevi imparàt il todesc... ducj si maraveavin ma al ere un fat... chei atris potes e savevin disi dome eine spaziren e ches no ju calcolavin ma jo o ai vut lis mes batais... o speri che i zoventas di cumò si dedin une regolade...

Milio

Anonimo ha detto...

ma jo o ai plens i tabar si vecjos che no vivin il mont di cumò e a van indevant a disi che al jere mior chel di une volte... simpri che naine dai "zovins di cumò" di ca e di là. Jo soi vecjo, bon, 50 a son avonde, ma no fasares cambio cun cemût che si viveve une volte, se no ves watsup o il telefonut metat dai miei parincj no savares neancje ce muse che a an, non sintares amis, no leiares il gjornal, no cjalares il sport, ni films, ne sintares la me grande passion, la musiche che cumò si pues scoltà miars e miars di cjançons e informasi su dut. e dut chest lu ai imparat dai "zovins di cumò" che tant sturnei, a mi, no mi somein par nuie. Anzit,... a viot plui di cualchidun de me etât che al varès bisugne di sverarine, pront a difindi il so "al è mior no cambià" cence mai informasi su nuie. Sui pokemon, par esempli, gno nevot mi à insegnat une vore di robis, soredut che a je une picjule rivoluzion economiche e tecnologjiche, e mi son inacuarzut che tancj di chei che a comentin o a scrivin contis come cheste no san nancje ce che a son e no àn un minim di culture tecnologjiche, però i plas judicà su la robe distes, partint dal sentito dire o de idee che si son fats cjalant chei altris che a doprin la robe. mah... mi splas, ma si sa, deventa vecjos nol è biel, ma ancje restà tal passat nol è masse biel ;)
Sergjuti di Torce

Pauli Jacus ha detto...

Sergjuti, volarès dîti che no ducj i vecjos a son rincojonits. Di sigûr che a lu son chei che a passin la zornade inte ostarie a bati lis cjartis o a tirâ tais e se a cjapin il gjornâl in man a lein si e no i titui dai articui. Ma a son ancje chei ni vore plui vecjos di te che il smartfon a lu doprin ni vore ben e a son al curint di dute la tecnologjie che e ven indenant. Po dopo volarès diti che al è cualchi àn che o frecuenti l'UTE (Universitât de tierce etât) di Codroip e mi maravei dispès a viodi scuasit cinc cent arlêfs che a seguissin une cincuantine di cors diferents. Chest a vûl dî che no ducj i "vecjos" a son compagns, par fortune. Come che a son ancje zovins bielzà vecjos dentri, cul cjâf a nauli. Dut câs, inte ostarie di Contecurte la puarte e je vierte par ducj, sedi zovins che vecjos e ognun al puarte il vin che al à. A saran i aventôr a judicà se il vin al è bon, i coments a siervin a chel. E se a cualchi aventôr no i plâs il vin, al po simpri lâ intun bar a bevi Coca Cola.
Mandi

Anonimo ha detto...

Sergjuti,al è ancje ver che inte vite mancul si à e plui si gjolt,jo ai comprat le biciclete a 20 agns,dopo cjolte no vevi plui chel entusiasmo di cuant le insiumiavi prin di vele.E po dopo le contentece no je une costant ma une recipe variant che ognidun dopre a so mut pur di trai benefici sul cuarp e sul spirt.Lussian

O varès alc di dî

Ti sêstu visât di firmâti? :)