giovedì 8 settembre 2016

Gnocis a riscjo



Bepi al è un mataran che a nol piert ocasion par fâ scherçs a ducj. I siei amîs a no rivin mai a parâsi dai siei mateçs, ancje ni vore pesants, e a spietin la ocasion juste par svindicâsi. Ven a stâi che Bepi al si maride e al pense che i siei amîs di sigûr, pe ocasion, a volaran tornâjai cun l'interès e al è un pôc preocupat. 
Il dì des gnocis lui al è su lis spinis e al stâ ben atent che a sedin ducj in glesie, e no magari fûr a involuçâ la sô machine cu la cjarte igjieniche o a molâi il flât a lis gomis, o piês ancjemò a gjavâi dutis 4 lis lis ruedis par lassâ la machine sui blocs, come che al veve fat lui ai amîs tes lôr gnocis. 
Viodint che dute la clape dai siei compagns e je daûr dai bancs, Bepi al tire un suspîr: “Mancumâl, che mi è lade drete ancje ste volte”, al pense.
E tache la cerimonie, ma cuant che il plevan al rive a la frase fatidiche: “ … parli ora o taccia per sempre!” a si spalanche il puarton de glesie e un toc di om, mai viodût prin, si fâs indenant e cuntune vosone di fâ vignî il pêl dret, al zighe: “Fermi tutti! Che achì no si maride dinissun!”. Il nuviç, incantesemât, al devente blanc come un peçot; la nuvice e à un mancjament, ma prin di colâ e fâs a timp a cjapâ doi scapelots di sô mari, che forsit e saveve alc che il nuviç nol saveve. I parincj e ducj i invidats a son di clap e cualchidun al murmuie sotvôs: “Ma cui isal chel mat?”. L’om, al ven indenant cu la sô calme e rivât dongje dai nuviçs, al si ferme, ju cjale ben in muse e al sbroche: ”Scusait, o ai sbaliât glesie!”. Po al si zire e cu la sô calme al torne indaûr, cence che nissun al olsi di fermâlu.
No si è mai savût ce che i amîs a àn spindût pe senegjade.
Bepi a nol à plui fat scherçs a dinissun.
 di Pauli Jacus

6 coments:

Anonimo ha detto...

Pauli,ma indula vatu a cirilis,tù tu vevis di là a vore cun Fellini. Lussian

Pauli Jacus ha detto...

Lussian, a cualchidun i vegnin fumant jerbe, o pûr nasant polvarinis blancjis, intal gno câs no sai se al è par il blanc o par la bire, cuissà.
Mandi e grassie.

Giovanni Nello Malisano ha detto...

Biele conte Pauli. E se e funzione cussì ben ten bevût e la jerbe lassìnle a lis vacjis inte stale.

Pauli Jacus ha detto...

Nelo, o tignarai cont dal to sugjeriment.
A proposit, daspò dal Paradîs dai puars, bielonone conte chi tu âs fat pal Contecurte Day (bon il muset?) e che o cognossevi bielzà, cuant burissistu fûr alc di gnûf? Stes invît a Lussian, a Bepi, a Galliano, a Barbara e a ducj chei Contecurtârs che a àn la pene inrusinide.
Mandi a ducj.

Mel Festor Lidiana ha detto...

Bepi al è un vêr Furlan. Mi plâs

Anonimo ha detto...

Ma ese sucedût pardabon al puar Bepi?
E la nuvice ae tornât i scapelots a sô mari?
Ce robis!

O varès alc di dî

Ti sêstu visât di firmâti? :)