mercoledì 12 ottobre 2016

Aghe di simiteri

Un coredôr di biciclete gaiart come me al à spes, in astât, il problema di cjatâ di bevi e alore – vergognantmi di cjoli aghe intun bar – o cîr lis fontanis publichis o pûr o voi intai simiteris. E li, intun di chei, une dì o vevi viodût la tombe di une bielissime zovine muarte a 16 agns che mi à ispirat “Tornâ”. Mi plâs lâ tai simiteris ma o ai di jessi di bessôl. Il Verano di Rome al è un grant spetacul: e je une statue stupende cun trê figuris in bronç; un om tal mieç che al cjale par aiar e dôs feminis, une par bande che a alcin une man viers di lui. Al è biel ancje chel di Udin ma une dì mi plasarès visitâ Staglieno (Gjenue) e cirî il monument che al è stat fotografât su la cuviertine dal album “Closer” dai Joy Division, un dai complès di musiche rock che o preferìs.
E dopo al è ancje chel piçul simiteri di vuere di Aquilee dulà che o viodìn un agnul che al tire sù un soldât: no ai mai viodût une figure plui intense di chê!
Ta chel dal gno paîs ogni volte che o soi di bessôl mi fermi a cjalâ ducj chei che o cognossevi cuant che o jeri in vite e par ognidun di lôr mi tornin sù dai fats o des peraulis che mi àn dit. O varès di scrivi intun cuader dut ce che mi ricuardi di lôr.
No ai mai però di pensâ a ce che al è restât sot tiere: no rivarès a durmî vie pe gnot. Miôr concentrâsi su la lapide, su lis rosis, su la fotografie…

Une dì o jeri a Wachau, dongje Lipsia, a visitâ un piçul simiteri dongje di une glesie neogotiche dirocade. I protestants a son come i musulmans e i ebreus: no àn lis fotos su la lôr tombe. No son come nô catolics post-paians che o samenìn di statuis e di imagjinis i nestris zardins di chei che a no son plui. I protestants a son cuintri dal cult des imagjinis e cussì o viodevi dutis chês tombis che a vevin dome i nons e li datis ma a un ciert pont ve une tombe cuntune fotografie! Ma cemût? La foto e jere su la tombe di un zovin muart a 30 agns; velu li cuntun cjapiel a ûs borsalino tal cjâf e la ghitare in man. O pensavi: ce pecjât che al sedi muart cussì zovin chel li. Di sigûr, se lu ves cognossût, o varès vût alc in comun cun lui parcè ancje a me, lu savês, mi plâs une vore la musiche. Al jere li, tal simiteri di Wachau, dongje Lipsia: su la sô tombe e jere la stele di David.
di Checo Tam

3 coments:

Anonimo ha detto...

Checo a ti setu mai n'acuart di chel benefici psicofisic che si sint intor cuant si lasse un cimitieri dopo velu visitat,a je une fuarce strane che no ai mai capit di dula che ven fur. Lussian

Anonimo ha detto...

Sì però a mi mi ven ancje un fregul di malinconie...
C.T.

Pauli Jacus ha detto...

Checo, une volte a l'an o voi a fâ un zîr intal cimitieri di Codroip, li che o ai ancjemò parintât. Zirant pes tombis o viôt fotos di int che o ai cognossût e mi plâs visâmi de ultime volte che o ai tabaiât cun lôr. O pensi che alc di nô al resti simpri dopo muarts, almancul fin che al dure il ricuart in chei che a vegnin dopo.
Visìnsi ogni tant di chei che a no son plui, di sigûr il struc de lôr esperience di vite al pues lassânus alc di bon.
Mandi

O varès alc di dî

Ti sêstu visât di firmâti? :)