domenica 16 ottobre 2016

E Berta e filave



Robis di no crodi, e invezit al jere propit cussì. Chês sacraboltadis di machinis, che a tacavin a zirâ pai nestris paîs cuant che Berta e jere fantate, a jerin deventadis il gnûf idul di adorâ. Nol jere impuartant il lôr colôr, se fossin curtis o lungjis: bastave dome che a vessin vût cuatri ruedis e lis clâfs par metilis in moto. E no stin fevelâ se e fos stade la mitiche 500 L, cu la senterabaltabile. 
Tant al è vêr che se un fantat al fos jentrât cun chê torpedo tal paîs, di sigûr al varès scugnût scombati e no di pôc, par sielzi la fantate, jenfri chês tantis, che a varessin volût scjampâ vie cun lui. Di sigûr chê machine, dopo tancj agns di scûr e di miserie, e jere un simbul di libertât, cun di plui un lûc, un cjanton miôr dal jet di chês fantatis, par di plui fat di scartòs, e des lôr cjasis pituradis cu la cjalcine. Là dentri, in chel spazi ben cumbinât, plen di botons, lusutis e orlois, ur pareve di stâ intune sorte di gnove cjasute. 
Ma ce che di plui al stiçave chês donzelis a saltâ dentri jenfri chês lamieris e jere la calamite di chel fantat dut ont di brilantine che la vuidave, e il pinsîr che cun tante gracie, plui indenant, lui si sarès fermât par bussâlis, magari slungjant la manute cun mistîr, metintle indulà che no si varès podût metile. Benedetis, denant a chei voi, a chel odôr di om e ai torments de lôr zoventût, cemût podevino disi di no? 
Ma Berta no jere come lôr, e veve intor dal salvadi, la fuarce di une gnove libertât. No i bastave chê cjasute mobile di chel fantat dai cjavei neris che di bot dome a viodilu i faseve sclopâ il cûr. Ancje jê si jere comprade la sô Bianchine che cundut di seconde man la faseve svolâ, tocjâ chei cîi che no varès mai crodût di podê cjareçâ. 
Tant al è vêr che une dì no à vût pôre di sfidâ propit il so biel che i coreve in bande cu la sô 500 L. A corevin come mats, cence pôre , cun di plui Berta cu lis notis tes orelis de cjason “pazza idea di far l'amore con lui” che e jesseve dai amplificadôrs de radio montade su la sô machine, che ancje se no tant biele, jê, la veve fate deventâ di dentri come un tinel. Pecjât che sul plui biel, propit cuant che a lave a dute buride, plui di 100, çuf, çuf, çuf…, la bianchina si jere studade. Mancul mâl che 500 L di chel fantat, potente come cinccent cjavai i jere vignude in socors. 
Cumò Berta sentade dongje di lui, dai siei riçots neris no cjantave plui pazza idea di far l’amore con lui. Pierdude tai siei voi, lu faseve pardabon. Contente come une Pasche, dentri la 500 L.

di... Barbara Battel, ma voltade e scrite 
di Nello Malisano

Version origjinâl: La impuartance de machine
Par me, che o soi nassude tal 1954, la machine di chei altris e rapresentave un status symbol di là de marcje, de potence o dal colôr che e ves! O viodevi lis clâfs de mitiche 500 L in man di un compagn di classe (colôr neri e.. detai dit a vôs basse cuntune ande di intese, “cu lis sentis che si ribaltin”!) e lu calcolavi di sioron parcè che, par me, vê la machine al voleve dî vê la libertât. Par tantis, anzit miôr dî par cualchidune des mês amiis (no pues butâ li numars che no puedin jessi verificâts), la machine e jere un dai prins lûcs là che il cûr che al bateve a fuart, lis bussadis “ae francese”, il cjapâsi a bracecuel, il ros su la muse, lis cjarecis e… a vignivin vivûts cu la dolcece tormentade dai sintiments dai fantats. Piçule oasi vie pal dì, ma plui dispès vie pe gnot, là che si scoltave il businâ dal cûr che al tonave tal cjâf sturnît di cjalt e di desideri, o tacavin a sintî lis sensazions di plasê che il cûr e il cuarp a devin fûr. La machine e valeve une stanzie e, par trop piçule che e fos, e jere simpri un cjanton che al deve bon acet ai nestris sintiments. Cualchi volte fintremai i innomenâts cussins personalizâts a deventavin mobilie. Dentri de mê prime machine, de mê Bianchina fantozziane – vernisade intune zornade plene di aiar e duncje cuntun efiet a cjarte di veri, e cuntun fonts che nol esisteve taponât par pietât cun tapeduts – o corevi dongje de 500 di chel zovin che mi veve fate incjocâ di amôr, tocjant i 105 chilometris ad ore, intant che par radio (Bianchina sì, ma plene di acessoris!!!) Patty Pravo e cjantave "pazza idea di far l'amore con lui, pensando di stare ancora insieme a te… pazza pazza idea...". Lis emozions a son aghe di vite pal nestri cûr e nol covente un ambient cun cualchi stele par vivilis di siôrs. Ae fin, inte 500 di chel fantat o ai vivût l’amôr, chel cul A maiuscul, par un Om fantastic. Sì, inte 500 parcè che, magari cussì no, ae mê Bianchina i ai sfolmenât i frens e .. brusât il motôr!
di Barbara Battel

21 coments:

Gjovane ha detto...

Propite une biele conte, biele come "Il svol dal Falcone", ... come nuie le à scrite L'Antescûr

Anonimo ha detto...

Biele cjatade cheste. Cui sa, che metint cualchi premi par cui che la induvine no vignedi plui int a bevi un tai te ostarie di contecurte?. Pues jessi un libri, dôs penis, un lapis o un vecjo ma biel libri. La conte e je biele, e mi sa che e sedi la pene di Pauli Jacus.
Nello Malisano

Pauli Jacus ha detto...

Nelo, mi displâs ma no je farine dal gno sac.
Dut câs biele la conte e di sigûr chel che le a scrite al à di vê la nestre etât, par cognossi cussì ben chês machinis.
Pe croniche la me prime machine (di seconde man e cun 190.000 Km.) e je stade la 500 Giardiniera (pai zovins, nuie ce fâ cui "sotasêts"). L'abitacul, butade ju la sente daûr, al jere lunc e ni vore plui comut dai sedii denant ribaltabii. Aaah, ce biei ricuarts (intai cjamps).
Mandi

Anonimo ha detto...

Biele conte compliments a cui le à fate.Patti Pravo,i sedii ribaltabils,la 500,un "armarcord"che nol podeve jessi mior a suaza i agns sessante e alc dopo.

Anonimo ha detto...

Il coment fat al 17/10/16.08:13.Lu à fat Lussian.Perdon pa dismentie

Anonimo ha detto...

Pauli astu viodut che le machine e puarte une antene par cb???? Lussian

gelo stellato ha detto...

al è clar chel o che che le à scrite al à l'impegn di tasè o no depistà la int :)
in ogni cas, par il premi, viodarin... par cumò al è timp fin... usgnot a miezegnot :)

Anonimo ha detto...

Alore le à scrite cualchidun che al à za scrit il so coment. Cui isal chel salvadi o salvadi?

Pauli Jacus ha detto...

Lussian, o ai viodût la antene pe CB su la sîscent. Ancje chê e je in "sintonie" cui timps. Tu puedarèssis fâ une conte su cheste voie di libertât di espression che e jere la radio ricetrasmitente su la machine. In chei timps i smarfonts no ju vevin ancjemò inventâts e podê tabaiâ cun cualchidun a dîs chilometris di distance cun la radio, al someave un miracul.
Tornant a la conte, par me e je di Barbara Battel. Nome une femine e pues vê descrit cussì ben chei timps, e forsit la conte e je un pôc autobiografiche.
Mandi

Pauli Jacus ha detto...

Scusait, ma mi jeri dismenteât di fâ un coment su la foto. Podint sielzi fra la machine e chês cuessutis poiadis sul cofano, no varès vût dubis. La varès menade pai cjamps ancje sul fier da la biciclete.
Mandi a ducj.

Anonimo ha detto...

O pensi ancje jo che sedi manece dal antescur. Lussian

Gjovane ha detto...

Seis condivisions sot la conte su Facebook, a saran pur un indizi...

Gjovane ha detto...

... un indizi ca mi slontane da le idee che le autore a sedi L'Antescûr ...

Anonimo ha detto...

E se invezit al Bepi che nol a dit une peraule.Galiano nol pues jessi in Argjentine no vevin la 500 A.
Nello Malisano

Pauli Jacus ha detto...

Scusait, ma no saressie ore di no scuindisi plui daûr ANONIMO.
Rafaêl, o sin ducj granç e vacinâts, se jo o fos l'ostîr no lassarès meti su i coments dai ANONIMOS. Sù mo sù mo, dinsi une mote.
O vino di fâ un referendum (che al è di mode)?
Mandi

Barbara ha detto...

Un mea culpa o scugni dîusal: o soi une che no i sgnicave cuissa ce di voltà la conte in furlan, mi cognos avonde par savê tros erôrs di gramatiche e no dome che o soi bravonone a imbastî su e cussì o speravi che Nello lu fasés par me...Cuant che mi 'nd à rivade la conte "digjeride" di Nello o soi restade cence flât: la veve fate SÔ e no jere plui la MÊ! I ài proponût a Rafaêl un "escamotage" (repeç?) par cumbinâ su la robe...i ai fat une propueste...ehm...un tic indecente e lui a 'nd à vût dûl di me e l'à parecjât chest zûc. Dut par la me sflace tal voltà in furlan...mea culpa...mea culpa tros padri eternis e tropis avemariis..cun dongje ancje cualchi glorie par fâmi perdonâ????

Anonimo ha detto...

Compliments a Barbara pe imbastidure,e compliments a Nelo par vele ben vistide di lenghe mari.Lussian

Pauli Jacus ha detto...

Alore ce aio vint, un panin cul caco?
Dut câs brâfs ducj doi, a Barbara par vê imbastît la conte e a Nelo pal jutori e par vê menât il mus pa la glace.
Mandi

Anonimo ha detto...

Gracie a Barbara a vin zuiât come fruts. E cun tante nostalgje, cualchidun al è partît cun Berta cu la 500. O mandi scuse se o soi stât bausâr par confondi les aghis.
Nello Malisano

Barbara ha detto...

Sincîre fin in font o scugni dîus che une frute une vore biele e une vore zentile (cuntun coleghe)mi 'nd # voltade la conte dal talian e le 'nd à fate deventâ di un biel, ma di un biel ..che no mi pareve nancje vere di vêle scrite jo! Grassie Francesca Battistutta!!!!

gelo stellato ha detto...

E jo o sieri la proclamazion dal vincidor proclamant che nol è nissun vincidor, chest colp, propit par che al jere un esperiment e parcè che la conte e jere scrite a plui mans, in pratiche. Se propit bisugne però dà un vincidor moral al è Pauli che al par ve induvinat... Pes prossimis contis, invezit, un vincidor al sarà :)
e jo disarès che o podaressin fà simpri chest zugut. :)

O varès alc di dî

Ti sêstu visât di firmâti? :)