giovedì 6 ottobre 2016

La storie di Aide e Radamès


Dulinvie une spedizion militâr cuintri de Etiopie, i soldâts dal Egjit a fasin presonirie la principesse Aide e no savint pardabon cui che e je, la puartin a Menfi come sclave. So pari, il Re de Etiopie Amonasro, al imbastìs une incursion par liberâle e ripuartâle a cjase. Nol sa che sô fie si je inamorade dal zovin vuerîr Radamès, e che ancje lui al è inamorât di jê. 
Magari cussì no ancje Amneris, la fie dal Faraon, e à pierdût il cjâf par Radamès. Amneris e à nulît che al puedi jessi alc di tenar fra la zovine sclave e il so amât; e cussì, par sot, e cîr di consolâ Aide, par savê alc di plui. Il Faraon al ven a savê lis ultimis novitâts dal confin. L'esercit de Etiopie al sta vignint indenant par scombatilu. A Radamès i ven dât il grât di comandant dal esercit egjizian, cul impegn di fermâ la avanzade dal esercit di Amonasro. 
Aide e je scombatude fra l'amôr pe sô Patrie e l'amôr pal so Radamès. Amneris e ricêf tes sôs stanziis la sclave Aide e cun furbetât i da di intindi che Radamès al sedi muart in bataie. L’imbroi di Amneris al da il so efiet e la reazion cence volê di Aide la tradìs, palesant i siei sintiments. A chest pont ancje Amneris e met lis cjartis in taule e e pant il so amôr par Radamès. Cemût puedie une puare sclave contindi cun la fie dal Faraon? Mote di braùre Aide e pant la sô vere Identitât di fie dal Re di Etiopie. 
Dal front a rivin gnovis di vitoriis e Amneris e oblee Aide a viodi la gjonde dal Egjit e la disfate dal so popul. Une marce trionfâl e ricêf il tornâ vitoriôs di Radamès. Come ricompense, il Faraon i concêt cualsisei robe che al vueli e vent ni vore agrât, lu declare so sucessôr al tron e i ufrìs la man di sô fie. I presonîrs etiopis a vegnin menâts denant dal Faraon; fra di lôr al è ancje Amonasro. Aide e cor dongje so pari, cence palesâ lis lôr veris identitâts che a restin discognossudis ai egjizis. Il re dai etiopis pardabon, al è stât dât par muart in bataie. Radamès, par amôr di Aide, al dopre la ufierte dal Faraon e al domande che ducj i presonîrs a vegnin molâts. Cussì i presonîrs a tornin a cjase, mancul Aide e Amonasro, stratignûts su consei dal Grant Sacerdot Ramfis, par svuincâ che i etiopis a cirin svindic pe lôr resint sconfite.
Amonasro, dilunc la sô presonie al cîr di judâ le sô Patrie; al oblee di fat sô fie Aide a tirâ fûr notiziis su la posizion dal esercit egjizi diretementri di Radamès.Radamès, che pûr al à acetât la man di Amneris e il tron di Egjit, al sint ancjemò di volê ben a Aide e, in fidance di jê, ur pant lis informazions voludis dal pari. Amonasro e Aide a rivin a scjampâ e nome cumò la lôr vere identitât e ven scuvierte. Radamès, disperât par vê, cence volêlu, tradît la sô Patrie, si consegne presonîr al Grant Sacerdot Ramfis. Amneris, savint che Radamès al è inocent, lu pree di discolpâsi, ma lui al refude, condanantsi di bessôl par il malacuart at. 
Dulinvie il procès lui al tâs, no fasint peraule in sô difese. Amneris si rimet a la pietât dai Sacerdots, ma cundut il su ingropât apel, Radamès al ven condanât a muart par alt tradiment e menât vie. La condane e proviôt che Radamès al sedi sepulît vîf e lui al crôt di jessi di bessôl in te sô cripte, ma po dopo al si inacuarç che Aide si è taponade li, par murî cun lui. I doi morôs si confermin il lôr vicendevul amôr e a acetin il lôr gram destin. Intant che a spietin di murî, Amneris e vai su la lôr tombe, zigant: “… pâs, pâs, pâs …”.



Libare riduzion de opare “Aida” di G. Verdi 
di Pauli Jacus

3 coments:

Anonimo ha detto...

La conte a è biele parcè e ten cun se doi risultats,prin par ve cjatat un argoment diferent dai nestris solits, e dopo par fa capi le opare a di chei che no an atrative su di je. Lussian

Giovanni Nello Malisano ha detto...

Brâf Pauli. Un mût il to, par difondi la culture, E cumò ancje jo o cognòs la storie de Aide,. Gracie

Galliano ha detto...

Une storie che e ven e che e va dilunc i timps. Il mont al è nassût cun chel sclip: vueris, odis, zelosiis e vie vie. Il grant Mestri Verdi i metè une straordenarie musiche a cheste vicende umane, dantji un finâl che al riscate in cualchi mût al gjenar uman: L' AMÔR cun la maiuscule, un sintiment sintût ma pôc doprât.
Mandi Pauli

O varès alc di dî

Ti sêstu visât di firmâti? :)