lunedì 10 ottobre 2016

Robotike


Pieri al jere pidimentât a cause di un incident. Agnorums indaûr, par chescj câs, no dome a esistevin struturis adeguadis, ma ancje a jerin lis assistentis di famee, o plui indaûr ancjemò cualchi buine anime che si ocupave, o plui indaûr ancjemò, cuant che la int e scompartive il curtîl, un al viodeve di chel altri cence mai domandâsi la reson. Ma daspò de grande crisi di identitât discjadenade tai ultins agns dal vincjesim secul, dulà che il mont al jentrà in “salvisi cui che al po”, ognidun al veve plenis lis sachetis di un esagjerât amôr viers di se stes. Par cheste reson Pieri al viveve cuntun piçul robot dai voi dulinciôs, che al rispuindeve al non di Fredo. 
I fîs di Pieri si sparniçarin in paîs esotics e oltrans, purpûr, ancje se intune altre maniere, a jerin simpri dongje dal vieli: vie skype, vie whatsapp, vie tablet e vie vie. La parintât lu saludave a traviers dal virtuâl in diferentis lenghis: - Hello dad, hola abuelo, mandi... mandi. 
Daspò di chestis modernis e galandinis dosis di afetuositât, l’argagn si distudave, e Pieri, che mai al corispuindeve, si leve sierant simpri plui in se stes. La presince di Fredo in chei moments di conturbie e jere oltri mût impuartante, za che il robot lu tignive come un dêt madûr e ogni dibisugne e vignive esaudide. 
Une dì Pieri al scomençà a fevelâi a Fredo come mai: lis peraulis leadis ae sô vite passade a sgorgolavin cun bondance come aghe cjacarone di sorzint. Il robot al steve in scolte cence pierdi olme. Tai moments di gjonde de fevelade, la voglade di Fredo e mandave lamps di ducj i colôrs, però, man man che la vicende e jentrave te part grise, i lusôrs si levin distudant. Metint lis palpieris in sfese, lui al cjalave e al scoltave a Pieri cun solidarietât, al poiave la sô man sore chê dal om e la sô musute slisse e tarondine e pandeve emozions mai viodudis prin di chê volte tai robots. 
Il vieli lu cjalave perplès. Une gruesse lagrimone e coreve jù pe metaliche muse dulinciose di Fredo.
di Galliano di Buenos Aires

5 coments:

Anonimo ha detto...

Galliano, chest sierâsi dentri di se ch'a tu fevelis tu, al è un mût di fâ une vore furlan. "O fasin di bessôi" a disevin daspò l'orcolat dal '76. "Riflùs tal privât" a lu clamavin ae fin dai agns setante, cul risultât di fâ deventâ umans ancje i robots. Po dâsi ch'a nol sedi un mâl. Bepi

Anonimo ha detto...

La conte us met sot il nâs il mont gnûf che si fâs indenant Cui sâ se al sarà miôr? Di sigûr un robot, tal netâ un vecjo sporc di mierde al sarâ plui graciôs di une fantate che lu fâs par cjapâsi un franc. Ma chê e je une ecezion. No lu sai se inte vite di ogni, Furlans o no, al sarâ lu stes biel ridusisi a fevelâ cuntun pipinot. Brâf Galliano
Nello Malisano

Luciano Marinig ha detto...

Galliano le to conte e je un grun biele,o crot che le robotiche e rivarà il cuarp uman, ma mai le anime,e sin no che sostituin i nestris afiets in cjossis diviarsis cuant e vegnin a clopa chei dai nestris simils,e crodint di ve une rispueste dopodut fate di noaltris.Cuntun mandi dal to Friul, Lussian .

Pauli Jacus ha detto...

Galliano, o soi sigûr che il nestri futûr al sarà chest.
Mi displâs nome par lis puaris badantis Russis o Ucrainis, che e saran disocupadis e no rivaran plui a molzi la pension o la cjase ai nestris vecjos.
No sai des tôs bandis ma culì al è un Diu nus vuardi.
Mandi

Galliano ha detto...

La idee di cheste conte mi je vignude leint l’articul de riviste “LiberEta.”
Ca us lassi il link dulà co cjatarês altris informazions sul teme.

http://www.libereta.it/ci-penso-tecnologia-servizio-degli-anziani-in-convegno-spi-cgil.html

O varès alc di dî

Ti sêstu visât di firmâti? :)