giovedì 24 novembre 2016

Font energjetiche rotamade


Di piçul o jeri a stâ framieç dai cjamps intun cjasâl dulà che vivevin pocjis fameis ma di chês bielis di une volte, plenis di fruts. Par menânus a scuele, a Malisane, che jere a trê chilometros di strade, al faseve servizi un biroç, cul telo narançon, precîs di chei dai pionîrs dal Far West. Framieç lis stangjis, il Moro, un bocon di cjaval dongje da pension che, aromai, al vignive doprât sôl par lavoruts di nuie e che nol jere nancje imparentât, di lontan, cui cjavai di corse. 
Il viaç al sameave plui lunc dal Passio e di Unvier, pal frêt, la robe e jere veramentri dure. 
Bisugne savê che tai agns Cincuante i Unviers a jerin plens di criùre, no come chei di cumò che a samèin a lis Viertis di une volte. Sintâts su lis sintis dal biroç, ducj intabarâts, o stevin scliçâts un cul altri. Lis musis ruanis come raiuts di sbruade, i voi che a lagrimavin, i nâs che a gotavin, lis bocis sieradis par no fâ jentrâ le buere fin tai budiei e, dentri lis bocis, i dinçj che batevin tra di lôr fasint il sun di une piçule scjarazzule. 
Ducj cu le muse dure, seriôs come il purcit ch’al pisse, fin che al rivave il zigo: “Velu, velu!” che, par nô, al jere di ligrie come il “Terra, terra!” pai marinârs di Cristoforo Colombo. Il cjaval al alzave le code par no sporcjale e al samenave su la strade cuatri o cinc tarondei calibrâts miôr dai krapfen di mê none. Une bugade di vapôr clip nus rivave in muse e, par nô, al jere un vêr regâl mandât dal cîl ancje se al nasave un ninin di puce. 
 Dopo, a planc a planc, al tornave il frêt che nus pareve ancjemò plui penç parvie che, par chê dì, o vevin piardude la speranze.
di Franco Vigo

7 coments:

gelo stellato ha detto...

Une bielissime conte che chest colp soi sigûr che no induvinais di cui che e je :)

Barbara ha detto...

Jo lu induvini, invezit, ninin il gno ostîr, ma no lu pant par vie che o soi la prime a jessi par aiar di chêl che o 'nd ài let! Inta chel biroc o soi lade a scuele ancje jo fintremai che in cjase no vin podût vê un bici in dôi (gno fradi al guidave e jo lu imbraçavi sentade sul puartepacs daûr cuntun cussinut sot dal cul). A cjase daspò la scuele o rivavin tor lis cuatri parcè che il nestri cjasâl al jere l'ultin, il cjaval al jere ancjemò plui bols dai timps de conte, il vjeri che al tignive juste le brene, cjapiel fracât sul cjâf, nu lu ài MAI viodût in muse, gjachete di fustagn e...ancje jo cul ricuart mi impensi di vê viazât suntun cjar dal Far West...Se o podes mi plasares meti "biele!" un miliart di voltiis!!!

Anonimo ha detto...

Par me cheste conte le à scrite Plume di Ingjustri. (Bentornade) Diu, pues jessi ancje farine di Bepi.che al à passade la sô zoventût di chês bandis, in chei paîs de Basse Furlane. Biele, scrite ben, une maravee di conte.
Nelo

Anonimo ha detto...

Biele la conte dal Scuelecjaval, no la savevi...Bepi

gelo stellato ha detto...

Alore Barbara... dinus cui che al è :)

Barbara ha detto...

Al è Franco Vigo, al jere za jenfri chestis pagjinis cul gno ricuart di trop che mi plaseve lèi e dal "colp che mi 'nd à trât" devant dal balcon de biblioteche de sô famee intal viodi. Imbambolade jo,ducj chêi zentenârs di libris mi 'nd àn stramurtide: daspo agnorum Marisa, sô sûr, mestre di gno fradi piçul, mi 'nd à ricognossude intun discount e di lì o vin començât a sintisi par telefon cun je e par e-mail cun lui...O soi come une sûr braurose di un fradi che no 'nd ài mai viodût ma insiemi o savin di vê dai ricuarts in comun

gelo stellato ha detto...

E... ma alore tu 'nt savevis di ancje :D Induvinade! :D

O varès alc di dî

Ti sêstu visât di firmâti? :)