sabato 17 dicembre 2016

Papavars e barburicis



Ma indulà jerial diret Tito, indulà lavial cjaminant su chel puint, tant avilît e cun chei cjavei su la muse? cussì malsestât e cun chei voi che di bot i saltavin di fûr.
Sburtât da l’aiar che lu sbandave di ca e di là, al lave indenant come un cjoc, tant che di un moment a chel altri, a cjalâlu, al pareve, che chel vint cussì fuart lu butàs jù, in font, dentri te aghe che e scoreve là sot in tal flum.
Rivât scuasi dongje da l’aghe, velu là che al sgarfave te tiere, come se al cirìs alc di platât. Si tratave dai bêçs che al veve robât, dopo vêle copade, a chê vecje che i fitave une stanzie. 
Ma parcè jerial lât a cjoli chei bêçs, che par pôre, al veve platât dongje chel flum par scuindi une des provis dal so maçalizi, ce vevial di fâ cun lôr?
In citât e jere rivade sô mari cun sô sûr. A vignivin di tant lontan, e nol podeve, dopo chel lunc viaç, par tant strachis che a jerin, presentâsi denant di lôr cence un franc inte sachete. E po al veve di sistemâlis intun albierc, no di gale, ma almancul di sest.
Daspò, al veve di judâ ancje Sonia che, puare frute, e scugnive fâ la putane par mantignî la sô famee. So pari, al jere muart cjoc, sot des ruedis di une caroce e dai çucui dai cjavai che la tiravin.
In famee e jere restade dome jê che e podeve disfamâ siei fradis plui piçui. Sô mari, puarete, di cuant che spudave sanc, colpe de tubercolosi, no podeve plui sfuarçâsi e tant mancul lavorâ. 
Puare frute, e faseve la putane pal grant cûr che e veve, ven a stâi par no lassâ murî di fan tantis bocjis inocentis.
Tito dopo vê copade chê femine nol jere plui lui. Lu roseave dentri il torment. Si sintive un danât: e jere la sô cussience che si savoltave cuintri di lui. 
Nol cjatave padin di nissune bande. Dome cui che come lui al jere colât jenfri la perdizion, sedi denant la leç di Diu, sedi chê dai oms, al podeve capîlu, judâlu.
Di sigûr par chest si jere dât dongje cun Sonia, ancje jê colade dentri tal vizi de cjâr, dal ses, intune vite sporcje, che la umiliave.
Puars fantats cui al podeve puartâ inte lôr vite un fregul di lusôr, solevâju di chel pantan che ju gloteve?
Ma une dì, cui sa par cuâl volê, no si sa, se dal destin o de divine Providence, Sonia si cjate tes mans un libri: e jere la Bibie. Le vierç e cence savê ce che e varès let, si cjate sot i voi une parabule dal Vanzeli di Mateo 
“ …e je vignude la ore che il Fi dal om al sedi glorificât. In veretât, in veretât jo us dîs: se il grignel di forment, colât par tiere, nol mûr, al reste di bessôl, se invezit al mûr, al butarà fûr tantis spiis."
Di front a chês peraulis ducj i doi, sedi che Sonia che Tito, si sintivin, come chel grignel, colât inte tiere e, che par podè tornâ a sflorî di gnûf al veve di lâ fraits, di murî.
Cussì, par prime robe, Tito al veve di confessâ il sassinament di chê puare femine, e acetâ il cjastì che i spietave pal delit che al veve fat, pûr savint che lu varessin puartât in Siberie indulà che lu varessin fat lavorâ sot scorie e cu lis cjadenis tai pîts e tes mans.
E cussì a son ladis lis robis. Sonia che pal tant ben che i vûl no lu à bandonât. E je partide cun lui, acentant la vite grame che ju spietave.
Une vite fate di stents: miserie, fan, frêt, ma lu stes cu la gjonde tal cûr di podê mondâsi; di vivi tal ben, te fuarce e te bielece dal lôr amôr; ma soredut cu la convinzion che ancje lôr, une dì, a saressin deventâts biei come lis spiis di forment intune zornade di Istât, cressudis dongje i papavar ros e lis barburicis turchinis.
Struc dal libri Delitto e castigo
di Nello Malisano

15 coments:

Pauli Jacus ha detto...

Nelo, par me al è "Delitto e castigo " di Dostojevskij.
Tu âs lassât ni vore di olmis (Sonja e la Siberie) e nol jere dificil induvinâ.
Dut câs il struc al è metût ju ben e mi plâs.
Mandi

Gjovane ha detto...

Bravissim Nelo, biel ancje il titul, jo no vevi mai sintût a dì barburicis e alore o soi lade a cirì la peruale tal dizionari.
Dacordo cun Pauli, si trate di "Delitto e Castigo.

Anonimo ha detto...

Le braure di tradusi cusì ben no je di ducj,compliments a Nelo.Lussian

Galliano ha detto...

Ben inmaneât chest struc sul teme de salvece concuistade a traviers de soference. Dacuardi cul rest che si trate de opare "Delit e Cjastì" di Fëdor Dostoevskij.
Bon Nadâl a ti Nello e a ducj chei altris contecurtars.

Anonimo ha detto...

Grassie pai preseaments a ducj.Ma un gracie particolâr jal dîs Gjovane. Finalmentri, dopo tancj agns che o scrîf, o ài rivât, pe prime volte, a meretâmi il siei compliments. O soi par dabon content come une Pasche.

Gjovane ha detto...

Nelo, ma jo no ai let dutis lis tos contis parcè par tancj agns no jeri plui vignude in ostarie, ma mi visi di vè let e fat un coment a "Nibil".

Anonimo ha detto...

Gjovane, che no tu vignissis plui ta ostarie no lu varès mai pensât. Tu ti visis di Nibil? Tu âs buine memorie. Ma lassimi disi i tiei preseaments no fasin di sigûr mâl di panze. Gracie di gnûf.
Nelo

Anonimo ha detto...

Nelo, o vevi iniment di tirâ fûr cualchi conte di Jacum di zeis, ma cul to Dostojevskij a tu mi âs fât vignî ros... Bepi

Anonimo ha detto...

Bepi, ma ce dîstu. Vere Dostojevskij al è stât par dabon un grant scritôr. Ma nol è di mancul, tal so gjenar, Jacum dai Zeis. Il prin di une bande, chel altri al di chê altre, ognidun a sô mût, e àn segnade, la nestre gjenerazion. Ricuardìnju ducj doi. O spieti la tô conte, ancje par fami di sigûr une biele ridade che mi fasarà ben.
Nelo

gelo stellato ha detto...

il libri di covas al è chel che o ai cjatat mior su jacum, lu vin ancje let in ostarie
http://contecurtegnove.blogspot.it/2016/01/lio-jacum-dai-zeis.html

Anonimo ha detto...

Lu pensi ancje jo Gelo, o ai il libri di Covas e lu ai let dut. A son 77 contis, e al sarâ dificil cjatâ fûr alc di gnûf cence lâ cuintri il copyright :). Jacum al è tant che Omero, a nol à lassât nuie di scrit, ma la int a si vise di dut passant lis contis di bocje in bocje. Disistu ch'a si puedi contâ cualchidune par Contecurte, cence "copie e incole" cambiant alc lant daûr de memorie? Bepi

Anonimo ha detto...

NON d'è nisun coment di podeti fa'. Tu seis grant come simpri e soredùt tu as...... tant ma tant let e cun tante pasion....escluso il titul che no sai propit ce che tu intints cun Barburicis. No podevitu dropa' alc di diferent??Brav tant chel furlan in giir par il mont!!!!!!!Mariangela

Mel Festor Lidiana ha detto...

orepresint e son tânt i Tito e Sonia... Pero' copâ no gjove

Mel Festor Lidiana ha detto...

orepresint e son tânt i Tito e Sonia... Pero' copâ no gjove

gelo stellato ha detto...

In realtat, parcè di no, si podarès conta une gnove, che no je mai sucedude, ma viodile come se e fos sucedude a jacum. ma po, ancje ches di covas son testemoneancis, plui che contis, fatis apont di intervistis e vie indenant, cuindi va ben dut, tal cas. :)

O varès alc di dî

Ti sêstu visât di firmâti? :)