giovedì 26 gennaio 2017

Chel cul turibul



Mi vevin simpri dite che par un zago, rivâ a puartâ il turibul al sarès stât il top. Chest al voleve dî ancje une altre robe: si jere deventâts capo-zago. Sì, parcè che dome un capo-zago al podeve cjapâ sù e niçulâ chel argagn, dut lusint, come di arint. E no dome. Cuant che tu jentravis in glesie, o pûr jentrant da sacrestie, tu jeris il prin da la schirie di zagos, il plui impuartant, chel che al puartave un imprest di benedizion. Insome tu jeris chel cul turibul. Un ricognossiment!
E cussì o vevi fate la mê scjale viers il sucès. Fin di piçul o stevi dongje dal predi e no fasevi nuie. Po dopo o soi passât cul façolet, e jenfri l'an di seconde elementâr, dret viers las ampoles di aghe e vin. Eco, rivâts li, si podeve polsâ, come se la scjale a vês une plane. Za las ampoles a jerin un bon travuart.
Intal zîr di un altri an, si passave a las torces, chês che a stan dongje l'altâr maiôr. Passade cheste tape, si rivave in curt ai cjandelîrs. Chei a permetevin di vê une buine visibilitât, a stavin intune buine posizion dilunc la procession e, ancje lôr a jerin lusints, come di arint. Ma soredut a jerin la ultime plane das scjales dal sucès. Cumò a restavin dome cuatri pas viers il turibul.
La prime volte che o ai cjapât in man il turibul, e cui che lu cognòs al sa che nol è tant facil a prin colp, scuasit mi colavin las lagrimes. O jeri content come un frutut cun las sachetes plenes di cjarieses.
Eco alore rivât su la spice: capo-zago e “manovradôr” di turibul. Mico scherçs! E dongje di me, il gno plui cjar amì, pront a vierzi la navisele cun dentri l'incens.
La prime messe al è stât dificil, la seconde za miôr. Intal zîr di pôc, o vevi imparât dut ce che al coventave: cemût impiâ las cideles di cjarbon, trop incens meti parsore, cuant vierzi o sierà il bocheton. Cuant passâlu al plevan e cuant jessi pront a cjolilu, cuant fâ il zîr da l'altâr e cuant inzenoglâmi sui scjalins da glesie, salacor cun i bregons curts sot da vieste.
E mi visi ancjemò trop che si zuiave a gjespui, cuant che par benedî l'ostensori, il gno amì al jemplave las cideles di incens, fasint fum par dute la glesie e intosseant las vecjutes daûr di nô.
Ma pôc mi interessave. Cumò o jeri chel cul turibul.
di Massim Furlan

10 coments:

Galliano ha detto...

Ancje inte glesie come in ducj i strâts sociâi a esistin i scjalins che ti menin ai diferents sîts de cerimonie, bisugne dome vê chel tant di sotanance (tal bon sens) par podê rivâ cence inçopedâsi.
No mi sbelanci tal induvinâ il non dal autôr, za che no "sint" cui che al podarès sei.
Compliments, ben contade scjalin daûr scjalin. Sierant i voi o tornai a sinti il nasebon dal incens.

Giovanni Nello Malisano ha detto...

Checo Tam! Biele!

Anonimo ha detto...

Nelo e pensâ che jo o pensavi ch'a fos opare to! Ancje se a sai cemût ch'a tu la pensis, ma a chei timps là vie lis maris ti fasevin fâ ancje ce ch'a no tu volevis. Jo cjantavi tal côr de glesie e mi ricuardi ancjemò dutis lis messis cjantadis. Daspò espatriât in Piemont, cuant che tornavi in Patrie, cjatavi simpri un gno compagn te ostarie ch'a mi faseve cjantâ il duet dal Benedictus de messe Pontificâl... te ostarie... robis di une volte.. Bepi

Anonimo ha detto...

Cuant il mistir ven fur de gavete, su chel cal devente nissun a je pete.Sul autor,alci lis mans. Lussian

Giovanni Nello Malisano ha detto...

Bepi tu âs fat ben a convinciti che no podevi jessi stât jo a scrivile. Vere, di cuant che mi àn cjapât dentri chês ideis (...) o soi deventât un mangje predis. Ma spiete che ti conti. Sâstu che Sant Jacum che al sa dut non mi à cridât. Ma ti zuri, ancje se di che bande, la cjâr dai fruts, almancul chê, no la ài nancje cercjade.

Anonimo ha detto...

Nelo, lu sai ch'a ti plâs il salam di purcit che al è plui saurît.. ma scomet che prin di cambiâ ideis a tu às fàt il zagut ancje tu..Bepi

Giovanni Nello Malisano ha detto...

Bepi al jere gno fradi capo zago. Baste un par famee al diseve puar gno pari. Jo, di frut, o puartavi dome la crôs tai funerâi cuant che il muini colpe, des sôs cjochis no si presentave.

Anonimo ha detto...

Ancje jo o cirivi di procurâmi un ferâl, 'nderin cuatri ator de casse, ma e jere un grum di concorence parcè ch'a si cjapave cent francs (dîs conis gjelâts).. cualchi volte o cjantavi l'Ave Marie ai nuviçs ch'a mi devin cent francs ancje lôr..Bepi

Pauli Jacus ha detto...

Buine int, biele la conte e bulo chel che le à contade cussì ben.
Jo mi visi che a un gno amì, capo zago, fasint fâ la zirevolte al turibul par fâlu fumâ di plui, cuant che il predi nol viodeve, si è rote une cjadenute e al à sparniçât ator lis boris sul tapêt. Daspò i scufiots dal predi, al è stât degradât sul moment, cun grande gjonde dal vice capo zago, che al à cjapât il so puest.
Mandi

Massimo Furlani ha detto...

Grazie a ducj!
Jessi scambiât par Checo Tam al è pardabon un onôr!

O varès alc di dî

Ti sêstu visât di firmâti? :)