venerdì 13 gennaio 2017

Gjildo femenute

Gjildo, bielzà di frut al scugnive fâ dutis lis voris di cjase che Mariane, sô mari, e spesseave a ordenâi: “Gjildo, scove la cjase”, “Sì mame”, “Gjildo, va meti a suiâ la blancjarie”, “Sì mame”, “E je ore di lâ a molzi, moviti”, “O stoi lant, mame”. Insome, puar Gjildo al scugnive fâ di mat e di bestie e sô mari lu faseve cori dut al dì. A scuele nol leve plui, che nol jere puartât e, mancjant il pari, muart di un colp intal cjamp, al scugnive cori come un mus par ubidì so mari, che no i pocave masse di menâ il comedon e si profitave di lui ancje masse. Cussì a passin i agns e vênt schivât la naie, par vie di jessi fi unic di mari vedue, al scuen mandâ indenant la cjase e la campagne.
Ven a stâi che e ven a mancjâ ancje Mariane e cumò Gjildo al reste di bessôl. Cualchidun lu consee di cjatâ une cristiane e meti sù famee, ma lui usât a fâ di dut in cjase, al pense che se lis feminis a son dutis come sô mari, forsit al è miôr stâ di bessôl, e cussì al reste vedran.
La int dal paîs, viodint che lui si rangje in dut e pardut a mandâ indenant la cjase, lu batie Gjildo femenute. Lui no si scompon e al tire indenant par la miôr. La uniche sodisfazion che si cjape Gjildo, e je chê di scoltâ la radio a pene gustât. Ogni dì, daspò sintût il Gazzettino Giuliano sul Nazionâl, al va su Radio Capodistria, dulà che a son i auguris. A lui i plâs ni vorone sintî lis dedichis che la int a domande. Soredut cuant che e rive “Mamma” di Luciano Tajoli, e lui ogni volte si ingrope, pensant a sô mari. No i plâs masse sintî “Bandiera Rossa” che Radio Capodistria, jessint sot Tito, spessee a trasmeti ogni dì. Gjildo al à sintût di cualchidun, che i Comuniscj a mangjavin i fruts, e ancje se i pâr une bufule, nol sopuarte cheste cjançon. Ven a stâi che une dì, si inacuarç che no si rive plui a spostâ la lancete des stazions su Radio Capodistria, e che la manopule e zire a vueit. Avilît, al pense di puartâ a comedâ la radio, ma al è intun brut moment cui bêçs, par vie di ciertis spesis che al à vût e vênt savût che jo o soi a scuele di Radiotecniche e o comedi radios al ven li di me, par viodi se o pues cumbinâi cence spindi tant. O voi a cjatâlu e i fâs il lavôr in cjase. Gjildo, viodint la sô radio dute smontade su la taule, al è in pinsîr e cualchi dubi che la radio e torni a sunâ, lu à di sigûr. Cuant po che o finìs il lavôr e i fâs viodi che dut al va ben, a Gjildo i lusin i voi de contentece. Cun vôs timide po, mi domande trop che al è e jo, capît il brut moment che al passe, no i domandi nuie. Lui al insist un pôc ma jo no vuei jessi paiât. Dut câs Gjildo no mi lasse lâ vie cence nuie e o scuen acetâ doi salams e un fiasc di vin, che mi ufrìs cun dut il cûr e no pues refudâ. 
Ancje cumò, a distance di agns, ogni volte che lu incrosi pe strade, mi salude cun calôr e cuant che al cope il purcit nol mancje mai di puartâmi cualchi muset e jo o soi content, di vêlu contentât.
di Pauli Jacuss

5 coments:

Anonimo ha detto...

Cheste chi e je di chel che al è nassut cu le radio dentri. IW3QRC

Anonimo ha detto...

Biele, une vore biele la conte! Prin che e rivas la television ducj in famee si scoltave, a ore di gustâ, simpri e dome chês cjançons a li. Il scritôr de conte al fevele de sô gjenerositât, dal bon cûr e de inocence di Gjildo. Il ben che l'â fât chel zovin a pene vignût fûr scuele e la sensibilitàt che al à vût intal no volê jessi paiât mi fâs imagjinâ che l'om di cumò al puarte intal so cûr un grum di personis e di sigûr no lis pense come clients e vonde. Compliments al zovin de radio di Gjildo, al om e al scritôr di cumò!

Anonimo ha detto...

Cheste e je la man di Pauli. Brâf Pauli, come om, come tecnic e come scritôr di contis scritis in lenghe furlane. A mi bandiera rossa, invezit, no sai parcè mi plaseve une vore. Forsit parcè che la cjantave ancje gno pari cun radio capodistria.
Nello

Anonimo ha detto...

Oltre ai compliments pa conte,o vuei fa i compliments al secont coment,anonim,par ve esaltat i valors di cheste conte tra i doi personaçs,la volontat di juda il prossim,la prove pratiche gjavade dal studi,le bielece di jevasi un biel vivi no di palanchis ma di buines azions viers cui dibisugne,cence contà i ricuarts dai agns 50 -60 cuant le radio vosave pal borg cu le vos Istriane.E se vin di torna ai votos 10 plui a duci doi. Lussian

Anonimo ha detto...

Ma alore cui al à scrite cheste conte?

O varès alc di dî

Ti sêstu visât di firmâti? :)