venerdì 3 febbraio 2017

Il pizighet

In chei agns lavôr no ‘nd jere par nissun. Tant al è vêr che ducj i coscrits de classe di Gabriêl a jerin lâts vie pal mont. Lui, cun sô Mari vedue e sô sûr vedrane nol veve podût fâ come lôr. Di mistîr al faseve il sblancjin, ma colpe de miserie presint in dut il paîs, a part cualchi cjôt o gjalinâr, no lu clamave nissun. Cussì par cuistâsi il pan al faseve ancje il peleâr. Par chest lavôr al partive di vinars e di Sabide a buinore, par imbusâsi in ducj i curtîi indulà che al copave lis bestiis che dopo si metevin in padiele pe fieste che si faseve indenant.
Al jere bulo tal copâ i cunins, che a jerin lis bestiis che i permetevin di cjapâsi pardabon cualchi franc, vendint lis lôr piels sul marcjât dai peleârs.
Ma in chel an, colpe soredut de murie di chês bestiis, si e no che al podeve contâ sui dêts di une man i cunins copâts intun mês. Une dì, par chest, al jere cussì avilît che no savint plui a ce Sant avodâsi al jere lât a preâ tal cimitieri su la tombe di puare sô none.
Sacrament, subit dopo che al veve dit par jê cualchi recuie, si è sintût clamâ.
“Gabriel âstu voie di cjapâti un franc? Lu àn a pene metût sul taulaç de cjase mortuorum e jo ai di veglâlu par dute la gnot.”
“Il maressial dai carabinîrs al à subit zontât, mi à dât doi mil francs, e se tu, tu ti fermis cun me, di chescj, cinc cent tai doi a ti”
Al jere Plos il pizighet, che i dave la pussibilitât di metisi pardabon alc te sachete.
Si tratave di passâ la gnot cun lui a vuardiâ chel puaret, che dome tal doman cu le autopsie a varessin podût capî se si jere copât, se al jere muârt di frêt o se i jere vignût un colp.
Gabriêl mai plui tant content, ancje parcè che, fevelant, al veve alçât il so compens a vot cent francs, cu l’impegn che al sarès tornât jù lui tal paîs par comprâ un butilion di vin par bevi vie pe gnot.
Dit e fat, intun moment, al jere za rivât tal mieç dal paîs. Il probleme al jere dome che al veve tante sêt, e cun di plui al à cjatât un so vecjo amì. Cussì par une robe e chê altre al è tornât indaûr che si jere fat scûr.
Intant Plos, soredut par chê schene che cui dolôrs lu lambicave, al veve pensât di impisulîsi. Ma là podevial pognisi e slungjâ lis gjambis? Nissun probleme. In cuatri e cuatri vot, metût par tiere il muart che aromai, lui nol veve plui bisugne di nuie, si jere metût tal so puest.
Cussì distirât al stave tant ben che intun moment in chel cidinôr si je propit indurmidît. Al durmive cussì ben che dome la fuarte ciulade dal porton dal cimitieri lu veve sveât.
Al jere Gabriel che finalmentri al jere tornât indaûr.
“Plos Plos o soi jo, pie il lum che no viôt nuie e o riscj di inçopedâmi in cualchi tombe” al vosave Gabiel par fâsi sintî che al jere tornât.
A chês perauilis nissune rispueste. Plos, par tant che al jere mataran, al veve pensât di fâi cjapâ un biel spac.
Cussì al à pensât di alçâsi di chel taulaç indulà che si jere distirât a pene che lui al ves vierte la puarte.
Cussì, Gabriêl viodint chê ombre che si alçave, nol varès che podût pensâ che al fos stât chel muart che si tirave sù dal taulaç di bessôl.
Dit e fat. Si veve alçât propit cuant che lui al jentrave.
La pôre che al veve cjapât il puar Gabriel, lassìn sta che si jere cagât tai bregons, no son peraulis par podê contâle.
Si sa dome che al à tacât a cori come un mat. Cui talons che i batevin tal cul al è scjampât vie pes campagnis fintremai che al è rivât tes palûts dal paîs, indulà che par fuarce di robis la sô corse si è fermade.
Pe pôre, oltri cjavei che di neris come il cjarbon che al veve i jerin deventât blancs al jere ancje lât fûr di cjâf. Tant al è vêr che jenfri chês grandis busis di aghe ferme lu àn cjatât dopo une setemane savoltât. E il butilion di vin ce fin aial fat?
Restât di bessôl, Plos, il pizighet, al à scugnût bevilu di bessôl. Nol varês mai crodût che Gabriêl al cjapàs tante pôre dome par viodi un muart che si alçave in pîts.
di Nello Malisano

11 coments:

Pauli Jacus ha detto...

Ben po Nelo, bielissime conte e une vore ben contade. Cheste conte mi fâs pensâ a lis matetâts che a cumbinavin une volte, fatis cence pensâ a lis consecuencis, salacor ancje dramatichis, che a podevin produsi. Al dì di vuê, di sigûr nancje pensâlis.
Mandi.

Pauli Jacus ha detto...

... Cuss Gabriel viodint che che Ombre e alçave, nol Vares Che pensioni Che podut di fos statali e tirave calvo dal muart Che su di Bessol taulaç.
Dit è grasso. Veve e propile quant forma Che del jentrave.
Pore Che veve al CCPA si Pual Gabriel, il Che Lassin sedersi e Jere cagât tuoi bregons, piano senza figlio peraulis sembra conto...

Juste par curiositât, in ce lengaç ise chest estrat de conte di Nelo? Chel che al induvine par prin al puarte a cjase une guantiere di Rosis dal Desert, des mês. Ae prime ocasion dal Contecurte Day.
Mandi

Anonimo ha detto...

Santissime Marie nestre viot di no,cu lis astrusitats dal Checo globalizadis a ches dal Pauli e cu le funeste relazion di Nelo,culì o riscjn i modons sul cjaf de babeliche tor.Lussian

Giovanni Nello Malisano ha detto...

Se di une bande Keco ûs puarte cu la sô fantasie a massacrâsi dentri i fîi, tu Pauli cul to lengaç tu ûs puartis tal manicomi. Ma i artiscj a son fats cussì.

Anonimo ha detto...

Pauli, o ai provât a decifrâ il to scrit cu la machinute todescje ENIGMA, ma a nol è stât câs di cumbinâ nuie. Ch'al sedi il lengaç dai muarts? Ce disistu Nelo...

Anonimo ha detto...

O soi Bepi ch'al piert colps dismenteantsi di firmâsi..Bepi

Pauli Jacus ha detto...

Buine int, us ven incuintri. Disìn che al è un lengaç une vore vieri, viodût cuntun pont di viodude une vore moderni.
Se no induvinais cumò ...
Dut câs lis Rosis dal Desert lis puartarai di istès al Contecurte Day, par ducj chei che a vignaran.
Mandi
P.S.: Bepi, la machinute Enigma le ai inventade jo pai todescs, co jeri inmò al asîl.

Anonimo ha detto...

Pauli tu a tu ridis, ma il gno cjapitani sot la naie nus contave che al front de seconde vuere mondiâl, a dopravin radiotelefoniscj furlans par fâ vê i ordins in prime linie.. jeristu un di lôr? Bepi

Galliano ha detto...

Mandi Nello, par dîti il vêr jo no sarès lat a veglâlu nancje se mi vessin dât i doi mil francs.
Ti conti une storiute che circolave tal gno paîs in chei agns: "A Toni Lessane, un sacramentât di om, i vevin ufiert il puest di pizighet, al rispuindè che prin al veve di fevelâ cul miedi condot. Une volte devant di chest i disè de ufierte, e che lui prin di acetâ al voleve che i disès trops defonts che Lui come miedi condot i sigurave ogni mês".
Cjo!! al voleve sei sigûr che no i mancjàs il lavôr.

Anonimo ha detto...

Cjo mo Galliano, il pizighet dal gno pais a curt di palanchis invezit, ai domandave ae so femine pene jevât: "Mariute aie sunade l'Ave Marie" ..." Si Milio" ... "..e nuie altri daur?". Ta chei agns si usave sunâ a muart dome dopo l'Ave Marie s'al murive cualchidun ju pe gnot...Bepi

Giovanni Nello Malisano ha detto...

Bepi, Galliano o soi conten che la mê conte ûs vedi fat tornâ tal cjâf ricuarts dai pizighets dai vuestris paîs.Oms pardut di liende. E cui sa che no contedis une conte su di lôr ancje voaltris. Cussì vignarès fûr un gnûf gjenar di contis.

O varès alc di dî

Ti sêstu visât di firmâti? :)