giovedì 2 marzo 2017

Cumò vonde




La astronâf e je a pene jessude dal tunel spazi-temporâl, e aromai Alpha Centaurs e je lontanone. Dut câs il cjapitani Skzûtz e il secont pilote Skzôgz a son usâts a fâ chei viaçs ator pes galassiis, par meti lis robis a puest. Cumò a son in orbite a distance di sigurece de Tiere e a cjalin chê biele bale celestine sul monitor denant di lôr. L'ordin dal Comant Gjenerâl Intergalatic al è clâr, netâ vie dute la umanitât de Tiere, spietâ un centenâr di mil agns dal sisteme Solâr e tornâ a scomençâ cui esperiments, par viodi se cun cualchi altre forme di vite lis robis a laran miôr.
Il cjapitani Skzûtz al è un pôc displasût, par vie che su la Tiere nol è propit dut di butâ vie e cun chel che i tocje fâ, al scancelarà dutis lis vitis, di umign, bestiis e plantis. “Di cuant che o vin modificât il DNA des simis par fâur vê la inteligjence, la umanitât e je lade simpri piês! Barufis, sterminis e vueris cence fin. E, magari cussì no, par fâle resonâ, lis vin provadis dutis! Dal diluvi a lis cjaristiis, da lis muriis ai taramots, nol è bastât!” al sbroche Skzûtz. “E je vere!” al dîs Skzôgz: ”O vin provât ancje cun lis religjons, tal imprin a fasevin alc di bon, ma po ancje chês a son deventadis une purcitarije! Anzit, i maçarilis in lôr non a son simpri di plui”. “Nol è nuie ce fâ!” al zonte Skzûtz: ”O vin di vê sbaliât alc intal DNA, ma aromai al è masse tart par comedâ. La umanitât si sta distruzint di bessole e nus tocje fermâle, prin che e vadi a ruvinâ altris planets!”.
Il cjapitani Skzûtz, un pôc malvulintîr, al tache la procedure previodude in chescj câs e al frache un pôcs di botons. Al mancje nome un boton, chel ros cu la scrite SDRUME. Al cjale inmò une volte chê bale celestine e po, slungjant il so lunc dêt vert lu sburte sul boton, sbrocant: “Pecjât però, al sarès stât un biel puest pe umanitât, se e fos stade nome un pôc plui inteligjente!”. 
Di bot, sul monitor, la bale celestine si jemple di lamps zâi; dutis lis bombis atomichis de Tiere a vevin sclopât dutis insiemi e cumò si viôt dut grîs. Par un moment i doi militârs a cjalin cidins chel montafin e ancje se lôr, par mistîr, a son usâts a chest spetacul, ogni volte un pôc ur displâs par dute la int che e ven scancelade par simpri.
“Bon! Mission disbratade, Skzôgz tornìn dongje!” e cussì disint il cjapitani Skzûtz al frache il boton CJASE. La astronâf si zire e, imbocjât il tunel spazi-temporâl, intun marilamp ju ripuarte su Alpha Centaurs, dulà che lis fameis ju spietin par ore di cene.
di Pauli Jacuss

11 coments:

Galliano ha detto...

Jo o disarês che il responsabil al è Bepi Zefon, za che lui al è un capo tal “inzornânus” su cuistions di astronomie e cuant altri. Ben contade e cun sacrisantis veretâts sun ducj i strâts de raze umane. A mi mi displasarès sparî cence une sigurece di dulà che mi mandaran, ma pensant ben cui sa che là che o larai a finîle no cjati une altre ostarie come chê di Contecurte.

Anonimo ha detto...

Galliano, masse biele cheste conte par jessi mê. Culì cualchidun, par esempli Rafael, al à voltade la pagjine finâl di un romanç di fantasience..Bepi

gelo stellato ha detto...

ah no, jo e la fantasience no nin masse dacuardi :)
no soi nancje jo :)

Anonimo ha detto...

Une conte che po ve tant mani, viodint il davoi che sucet ator.Sperin no deventi subit, an tacat a ova lis gjalinis, e in campagne fluris l'urtizon, cui sa che Skuzut e sklesot no si fermin a cene ca di noaltris bandonant lis belichis intenzions.Lussian

Pauli Jacus ha detto...

Buine int, viodêt che in orbite atôr de tiere, e je une astronâf aliene cun dôs musis verdis che nus stan cjalant. Cuissà ce intenzions che e an. Stin in vuardie.
Mandi

Anonimo ha detto...

Al dibot un an che Jaio a no nus dîs plui nuie. Ch'al sedi lui alore su che astronâf ch'a scjampe su Alfa Centauri..cumò al sarès a distance di sigurece de Tiere.. Bepi

Anonimo ha detto...

Al è dibot un an...
(scusaimi) Bepi

Giovanni Nello Malisano ha detto...

No sai cui che le à scrite. Pues disi dome che e je une biele conte. Un biele conte, un biel furlan.

Pauli Jacus ha detto...

Cjârs amîs contecurtârs, gracionis par i coments positîfs. Viodût che chest prin esperiment di fantasience us à plasût, ogni tant tornarai su chest argoment. O sintarês ancjemò tabaiâ di Skzûtz e di Skzôgz (no ai cjatât nons plui alienos di cussì) o di int aliene, plui denant.
Mandi

Anonimo ha detto...

Pauli, cumò che Skzôgz e Skzûtz a an sdrumade ju la Tiere a no ti reste pi nuie di contâ. A tu âs di contânus nome storiis di Alpha Centaurs, ma prin a tu âs di insegnâur la marilenghe..Bepi

Pauli Jacus ha detto...

Bepi, l'univiers al è une vore grant e cun buinis pussibilitâts che a sedin une vore di planets come il nestri e cun intate di meti a puest. Di sigûr Skzûtz e Skzôgz no restaran disocupâts. Par la scuele di marilenghe su Alpha Centaurs, o stoi proviodint.
Mandi

O varès alc di dî

Ti sêstu visât di firmâti? :)