lunedì 24 aprile 2017

Il Meluç


- E Adam? Ce i contio a Adam?
- A Adam? Ma, Eve, ci distu? Tu ti tiris sù la cotule e vie lui Adam cul cjâf a nolis!
- Ma cuale cotule! Culì o sin intal zardin, sior sarpint!
- Bon, bon, se no tu âs cotule, tu sâs ben tu ce maniere faiale nasâ, lis feminis a san une plui dal diaul!
- Dal sarpint.
- Si, dal sarpint. Alore vele ca la pome, viot ce biel meluç, dut lustri, al ti dîs mangjmi!
- Ma al è chel proibît!
- Ma sveiti un pôc! Nol vûl, lui là su, nol vûl che o mangjais chest meluç dome par vie che o deventais compagns di lui, se lu mangjais!
- Come lui?
- Sì. Eternis! Sù, dài, mangje!
- Eternis...
- E daimo! Mangje, muardilu, dai, po!
- Va ben, va ben...
- Sù po!
- E il curtìs?
- Eh?
- Dulà isal il curtis?
- Ce curtis, ce ti saltial sù? Cruste, tu âs pûr biei dincj!
- Ah, sint mo, siôr sarpint, stami ben a sintî: jo il meluç ti lu mangj. Ma o varai ben di spelâlu, no?! 
- Ma par ce fâ? No viodistu ce biel lusint che al è!?
- Propite par chel! Cuissà cetancj glifosâts che tu i âs butât intor par fâlu vignî cussì lustri!
- Glifosâts? Ma no! Nol è incuinât, tal siguri jo, al è gjenuin!
- Possippò! O varai di fidâmi di un sarpint cumò!
- Di un diaul.
- Di un diaul! Se tu vevis chê di tentâmi, tu podevis ben pensâle di puartâ cun te un curtìs! O ben tu podevis fâ di mancul di inventâ i glifosâts! Aio jo di insegnâti il mistîr a ti?! O curtìs o nuie!

E Eve si refudà di mangjâ la pome cence spelâle!
Bon di chel!
Si impensaiso se le ves mangjade? Al creatôr i vares montade sù la futare! Al vares maledide la Tiere, i vares vosât a Eve che al vares fat cressi lis dois des sôs gravidancis e che e varès parturîts i siei fruts intal dolôr! E a Adam che al varès scugnût tirâsi fûr la bocjade a fuarce di vitis e che al varès scugnût mangjâ la jerbe dai cjamps e che insom di dutis lis sôs faturis al sares tornât inte tiere di dulà che al jere jessût! 
Insume nus varès tocjât, a ducj nô, nus varès tocjât di murî! Pensait vualtris!
Bon di chel che chê storie dal incuinament e dai glifosâts i à fati vignî a Eve chê biele idee dal curtìs! 
Nus à salvâts l’incuinament! Nus àn salvât i glifosâts!
di Laurin Zuan Nardin



8 coments:

Pauli Jacus ha detto...

Laurin, fossie lade pardabon cussì a cheste ore forsit o staressin miôr. Dut câs tu le âs metude ju une vore ben e pues nome zontâ che il sarpint di sigûr al à cjatât cetantis altris manieris par freânus .
Mandi

Anonimo ha detto...

Pauli, il sarpint nus à bielzà freâts, parcè che salvade la scusse al miluç, je restade la parussule cence cotule..une vore brâf a Laurin, Bepi

Anonimo ha detto...

Al à reson Laurin,vue al saress di condanà duci chei che le blestemin sot il non di"P..... Eve". Lussian

Barbara ha detto...

O jeri ali denant cuant che Checo Tam (il sarpint tentadôr che al stiçave cun vôs inmagante Eve) al contave, movintsi no dome cun bocie e vôs, ma ancje cun chel so cuarp sec incandît..Al jere dutun parmis conte, atôr e moviment intorteât dal cuarp!La camarele (Lussie) no jere di mancul cu la sô puntiliosetât intal pretindi il curtis par spelâ il miluç e tignive ben paradis lis lecadis ae sô sensualitât viers Adam dal sarpint, simpri ali a pretindilu (il curtis) par gjavâ vie il risi dai glifosâts. Ben, crodeitmi o jeri fûr cui cits par la gjonde intal scoltà e viodi cheste senegjade...sbati lis mans fuart che no mai par chel spetacul di conte e "contecurtârs". No pues tasê il gno grant displasê intal viodimi colade a scuintrâmi cun la mê conte propit cuintri Il miluç di Eve e dal sarpint! No 'nd ai podût fâ di mancul di votâmi e forsit ancje Pauli (sintât dongje di me) nol à volût dâmi un displasê...O soi stade une vore sf..disfurtunade cu la tirade a sorte des contis, ma in dute scletece la varès votade cun dute la foghe e la passion che o met intes robis che a mi plas..ononononin! Complimentons Laurin, o ai volût ancje contâti (e contaus) cetant che Checo Tam e Lussie a an dât lustri ae tô creativitât.

Anonimo ha detto...

ma mi par che checo nol vedi let cheste conte come madrac, le à lete michele, chel altri, e dopo l'ostier. :) che a ogni mut, brafs ducju doi
F.V.

Barbara ha detto...

Par F.V.: o domandi perdon pe mê imprecision cun Checo..dut just chêl che tu 'nd às dît. Jo o soi fate intune maniere strambe..ven a stai mi lassi incjocâ des emozions e, dispès, o sconfont cierts detais..

Laurin Zuan Nardin ha detto...

GRAZIS PAI COMPLIMENTS

Giovanni Nello Malisano ha detto...

Finalmentri che cualchidun al vedi cjatât il coragjo di contâ la creazion de bande juste. Biele conte. Mi à fat tornâ tal cjâf Menocchio cul so formadi e i viers. No dis cui che le à scrite, Diu nus vuardi che lu brusin par eresie.

O varès alc di dî

Ti sêstu visât di firmâti? :)