domenica 21 maggio 2017

Siôr Lello

Ducj a Codroip a àn sintût fevelâ di siôr Lello Moro, personaç innomenât e di grant cûr che al à lassât un biel ricuart intal nestri paîs.
Siôr Lello al jere une vore siôr di famee e al veve une vore di campagne che al dave di lavorâ, a cundizions onestis, a cetante int che e veve dibisugne. Come ducj i possidents dal timp al veve un vuardian, che i tignive di voli la campagne e che al faseve il so lavôr cun cussience e cence rivuart par nissun. Une dì, il vuardian al brinche trê feminis a robâ lidric intai cjamps di siôr Lello. E jere a pene finide la prime vuere mondiâl e la miserie no mancjave; lôr puaris, no vevin nuie di dâ di mangjâ ai fruts e a vevin pensât ben di cjapâ sù alc li che 'nd jere une vore. Po ben, il vuardian, par rispiet dal so lavôr e ancje se un pôc malvulintîr, al mene lis trê feminis a cjase di siôr Lello, che di sigûr lis varès metudis a puest. Siôr Lello, sintût il vuardian, lu lasse lâ e po al scolte lis scusis des feminis, che vaint i contin de lôr misare situazion. Siôr Lello, seri: “Ise cussì? Spietait achì!” e al va in cusine a tabaiâ cun la massarie. Lis feminis a son disperadis: “Cuissà ce che nus fasarà!» a murmuin cul cûr in man. “Sarà lât a clamâ i carabinîrs!” e zonte une di lôr, vaînt. Passe un cuart di ore, une vore brut pes feminis e finalmentri siôr Lello al torne dongje, compagnât de massarie che e veve trê gruessis borsis pes mans. “Cjapait achì!” al dîs e ur consegne chestis borsis plenis di patatis, cocins, cudumars, pomodoros e altris verduris. “E la prossime volte stait atentis di no fâsi becâ dal vuardian!”. Lis feminis, cui voi lustris pe contentece, a volaressin bussai la man par ringraciâlu ma lui cuntun: “Sù mo, sù mo!” lis fâs lâ a cjase, a fâ di mangjâ pai fruts.

Chest al jere siôr Lello, om just e di grant cûr.
di Pauli Jacuss

4 coments:

Barbara ha detto...

Bielonone la tô conte Pauli! Lis personis daben a lassin il bon rivoc ancje daspò agnorum de so partence viers un altre vite...

Anonimo ha detto...

Biele conte, tu as disvoluçat un monument di bontat che oltri jessi ricuardat in peraulis al mertaress materializat cul marmul su ogni place di pais.Altri che il famos ditt"fora dei miei copi"tant usat a novembre di altre int abenade come lui. Lussian

Anonimo ha detto...

Lelo al à fat nuie altri che il so dovè. Cun ducj i bêçs e proprietâts che al veve cuntun fregul di caritât, forsit, si è salvât dal infier. Brâf Pauli.
Nello Malisano

Pauli Jacus ha detto...

Nelo, siôr Lello, par chei timps al è stât une moscje blancje. Al à vût la fortune di cjatâsi une vorone di robe dai siei, ma al à savût aministrâle ben e, bêçs a fasin bêçs, al jere deventât sioron. Dut câs, inte so vite al à simpri fat dal ben, al contrari di ce che an fat i Manin e dute la gjenie di nobiltât dal timp, che par fortune e je lade dute a remengo. Siôr Lello no si jere mai maridât e cuant che al è muart, al à lassat 850 cjamps e une vore di cjasis, ai comuns di Codroip e di Morsan.
A Codroip, cun chescj bêçs, a àn fat la cjase di ripôs e la fondazion intestade a so non la puarte indenant cence robariis.
Di sigûr nol jere un sant; a disin che al cambiave feminis come cambiâ cjamesis, ma chês che i stavin no lu fasevin par dibant e si son dutis sistemadis ben.
Par il rest o pues nome ripuartâ il biel ricuart che e à di lui la int di Codroip.
Mandi

O varès alc di dî

Ti sêstu visât di firmâti? :)