martedì 4 luglio 2017

Checo Mat



Intun paîs dal Friûl di mieç al viveve Checo; al jere un pôc stramp e par chest al jere miôr cognossût come Checo mat.
Nol jere trist e ogni tant ancje al lavorave come sblancjin, ma al jere une vore puartât pal butilion e cussì dispès al tacave un lavôr e no lu puartave a fin. Cuant che la int si è stufade di dâi un acont e no viodi a finî il lavôr, e à dismetût di clamâlu.
Cussì in cjase sô la miserie e faseve di parone, ma dut câs la sô femine che e jere inmò biele e prosperose e spesseave a fâ fruts. No si sa ben se a jerin ducj di Checo o di cualchi benefatôr, che al leve a cjatâle cuntune sporte di verdure o cun cualchi salam.
Checo nol faseve câs e al cjapave dut ce che la providence i mandave.
Ven a stâi che une dì Checo al veve di puartâ i fruts, chei plui granduts, a cjatâ une agne che, pûr di viodiju i veve prometût un pocjis di patatis. Cussì 'nt cjarie un trê sul cjaruç che al jere simpri peât daûr de moto e che i siervive par puartâ i bidons di colôr o i lens pal spolert, che al leve a fâ dulà che si cjatavin, cence domandâ il permès al paron. 
Sô agne e steve intun paîs a cinc chilometris e la strade e jere asfaltade, ma ancje plene di busis.
Checo al veve une vuide une vore vivarose, come il so solit, e se al jere ancje un pôc bevucjât po nol faseve nancje i stops. Po ben, rivât a cjase di sô agne al ferme la moto e si zire par tirâ jù i fruts dal cjaruç.
“Orpo!” i scjampe, “No 'nd vevio cjariâts trê?”. Sul cjaruç a 'nd jere nome un. “Forsit ju ai pierdûts pe strade!” al pense. Al zire la moto e al torne indaûr, corint come un sfolmenât.
Fat cualchi chilometri, di lontan al viôt sentâts sul asfalt in mieç de strade i doi fruts, trancuîi come papis e che a riduçavin come nuie fos sucedût.
Checo nol stâ tant a fâsi scrupui par pericul che a vevin riscjât i fruts, ju cjame sù e al torne di buride là di sô agne che ju spiete su la puarte di cjase, cul sac di patatis.
Checo nol à plui pierdût i fruts pe strade; di chê volte ju à simpri peats cul filistrin.
di Pauli Jacuss

5 coments:

Barbara ha detto...

Pauli e je bielonone, un tic dolçe e une vore gustôse..cun cualchi pic (alcolic) che al conte di une realtât presinte chê volte e ..no dome chê...

Galliano ha detto...

Simpatic e furlan chest Checo mat. Dopo dut ancje se al jere bevaçon e ju peave cul filistrin, nol jere un mâl pari, nol voleve pierdi i siei fîs.

Anonimo ha detto...

Crodimi Pauli, a ju à pierdûts a pueste par pôre di no podè cjariâ il sac di patatis...propri un bon pari.. Bepi

Anonimo ha detto...

Forsit ju pierdeve di proposit, dut par medea il mud che son vignuts dongjie.Simpatiche e legre conte strissinade un grun dongjie fats di veretat. Lussian

Giovanni Nello Malisano ha detto...

Pauli, ancje chest al è e al jere il nestri Friûl. Ben contade. E brâf Checo che nol jere gjelôs. A pensale ben par un toc di pan pai fruts e veve reson la so femine a fale nasâ a cui che i puartave une sporte cun dentri, sperin, ogni ben di Diu.

O varès alc di dî

Ti sêstu visât di firmâti? :)