lunedì 19 marzo 2018

O stin ducj intune scjate di biscots




La mê mestre: la bielece e la finece di Audrey Hepburn, la elegance di une modele, la dolcece di une mari, la braùre di insegnâti lis materiis cun semplicitât e ligrie, scuasi un zûc... e a scuele tu levis contente, lis vacancis a jerin tant lungjis di passâ inte solitudin dal cjasâl li che tu vivevis...
Inte ricreazion no ti interessave dal to panin ma tu la cjalavis a tirâ fûr da la borsete il tavaiuç blanc, displeâlu biel planchin su la catidre, podopo il noranç, e spelâlu cul curtis cun perfezion gjeometriche, o ancje il sacut di grissins e crevâ un tocut a la volte simpri di misure compagne, ma il plui biel al vignive dopo la mirinde: e vierzeve il barcon di une desene di centimetris, dal casset de catidre e tirave fûr il bochin blanc, lunc e fin, da la borsete un spagnolet, lu torzeave intal bochin, lu piave cul sfulminant e ti pareve di sintî un regjist che al zigave:
"Motore, azione, ciak, si gira!" e il bovul di fum lizêr al balave fûr dal barcon...
Sì, al jere il film de tô vite, tu le riviodis mîl e mîl voltis e tu sâs che inte sô cjase, inte sale, dentri une scjate di biscots vecje di tancj e tancj agns, a tu sês tu, cu la tô classe, jenfri lis plui piçulis, sentade a gjambis incrosadis in prime file cun bocje di ridi, no dome la tô classe, ma dutis lis gjenerazions di fruts che jê e à tirât sù come siei fioi, e si vise di ognidun di nô, dal prin al ultin e nus cjale ogni volte che e a voie di ricuardâsi di nô e nus fevele come se o fossin li cun jê.
"Ins. Maria Veronesi n. Zanello" al jere scrit su la puarte da la nestre classe, sù dopo lis scjalis in font a çampe, ma intai nestris cûrs e je e restarà simpri "la nestre mestre"...
di Barbara Battel

2 coments:

Anonimo ha detto...

Trop biele che foto cui segnos dal timp a fermâ le ore.Plasevule conte,somee pagine sbrissade fûr dal libri cuore di Deamicis.Simpri biel leiti Barbara. Lussian

Luciano Marinig ha detto...

O profiti par impuestâ i augûrs di buine Pasche a dute le clape di contecurte.Lussian

O varès alc di dî

Ti sêstu visât di firmâti? :)